«Къачаннасса лачакравусса чанипарсса хъамитайпа»

Ларгсса ххуллункьини МахIачкъала шагьрулул 34-мур школалий дия хъуннасса байран. Шикку, чIявусса агьлугу бавтIун, бюхттулсса даражалий кIицI ларгунни СССР-данул кIулшиву дулаврил отличник,

 Аьрасатнал лайкь хьусса учитель, «Лучший учитель России-2006» грантран, «За заслуги перед республикой» ордендалун лайкь хьусса Къараева Гуржигьан (Галина) Къараевнал юбилей.

---

Зулайхат Тахакьаева
ЖучIава хъинну бусраврай кIицI лагай магьирлугърал иш­ккаккултрал, спортсментурал юбилейрду, амма ттун цалчинни ккавксса укун сийлий ва лахъа-хъунну учительнал юбилей кIицI лаглай. Мува зад исват буллай бия га кьини Галина барча бан бувкIсса цинявппа хъамалгу.
Шадлугърайн бувкIсса бусравсса хъамаллуравух бия: АьвдулхIалин Мачаев, ДР-лул Жяматийсса Палаталул хъунама (Галина Къараевал ученик); Ссалам Хавчаев, «Да­гъусттан» ГТРК-лул председательнал хъиривчу; Зумруд Багъдуева, МахIачкъала шагьрулул кIулшиву дулаврил управлениялул каялувчинал хъиривчу;
Интизар Мамутаева, Да­гъусттаннал Хъаннил союзрал хъунмур; МахIачкъала шагьрулул школарттал директортал, Галина Къараевал дарс дирхьуми ва гъан-маччами.
1965 шиная шихунмай школалий зий бур ванил каялувшиндаралу сакин бувсса Талатаврил славалул музей.
ТОКС-рал кьюкьращал цачIуну ванил дурну дур Талатаврил славалул 15 поход, сакин дурну дур 8 телепередача.

Зумруд Багъдуева:
— На дахьва школалийн зун бувкIсса чIумал вил цIа дия рес­публикалул тарихраву мусил хIарпирдай чирчуну. Жу ва школалийн бучIайссияв практикалийн, щябикIайссияв вил дарсирдай, лагайссияв музейравун. Ва музей ванил сакин бувну бур, щилчIав тIалавшиндарай ба­къача, цилва гъирарай ва мурадирай. БувчIлай буну тIий ватандалул цIаний талай бивкIминная буслай, му ччаву дуруччин шайшиву хъиривсса никирттайгу.

Ссалам Хавчаев:
— Ттун къакьисмат хьуссар вичIа дуклан. Амма ттул оьрмулуву ина учительнал кIану бувгьуссар, хIакьинугу бугьлай бу­ссара.
На вил яла хъунама икрамчигура. Гьашину республикалул ТОКС-рал кьюкьлун там хъанахъиссар 50 шин. Щала рес­публикалул пахрулун лайкьсса ишри му, цанчирча жула билаятрай чувчIав мукунсса кьюкьа цамур дакъассар. Цуппа 34-мур школалул оьрмулувугу ва агьамсса юбилейри, цанчирча шикку цалчинсса кьюкьа сакин дурну диркIун тIий Галина Къараевал. ХIасил, ванил кьюкьлуйн чул бишлай диркIссар республикалул ТОКС-рал кьюкьагу, му кьюкьлуясса передачагу, на навагу.

Интизар Мамутаева:
— Ина кунмасса хъаннийри аьрщи дарцIуну дусса. Ина кунмасса хъами бусалардаву личIайссар. Ва школалийн бувагу кIира шинай занай бивкIсса, 5-6-ми классирттаву, ттул душнин ина дакIний ливчIун бура жинжиларттащалсса лухIисса лачакравусса исвагьисса, чанипарсса хъамитайпану.

Анжела Байрамбекова, Да­гъусттаннал педагогтурал ассоциациялул хъунмур:
— Ина бивтсса педагогнал ххуллу хIакьсса тарихрайн кIура бавну бур. Барчаллагь вин педагогикалул яргсса тарих чичаврихлу. Вил даврил опыт билаятрал школарттал ишла буллан лайкьссар.

ТОКС-рал кьюкьлул даву хьхьичIуннай дан бивхьусса захIматрахлу барчаллагь тIий, ХIурматрал грамота дуллуна Республикалул ТОКС-рал дирекциялул каялувчи Арсен ХIабибуллаевлул.
Бусравсса пишалул уртакь барча бан увкIун ия Гумбетуллал райондалиясса тарихрал учитель Ибрагьим Ибрагьимов.
ЧIявусса бия ялагу Галина Къараевнахь барчаллагь тIутIими, чIяруя грамотартту, барчаллагьрал чагъарду, ванил ччанналу дихьлахьисса тIутIив.