Аьрасатнал печатьрал байран кьини АьФ-лул премьер-министр Дмитрий Медведевлул хIукуматрал премиярду дуллунни журналистътуран.

П. Рамазанова
Дагъусттаннал машгьурсса журналист Алик Аьб­дулхIамидовлунгу дуллунни ларайсса награда – «За мужество, большой вклад в профессию, за заслуги перед обществом» тIисса. Аьрасатнал хIукуматрал премиялун цувалу лайкь хьусса Дагъусттаннал цалчинсса журналистри А. АьбдулхIамидов. Уттинин ва премиялун лайкь хьуссия «Черновик» кказитрал коллектив 2014 шинал. Дагъусттаннал Журналистътурал союзрал ва ккаккан увну ивкIун ур Самур вацIа хха­ссал бувансса мурадрай чирчу­сса макьаларттахлугу, шяраваллаву цала харжирацIух школарду буллалисса бизнесментуран дайшишру дуллалисса чиновниктал дащуй бихьлахьи­сса макьаларттахлугу, вара журалул цаймигу аьнтсса макьалар­ттахлугу.

-Журналистика хIакьину аьл­тта чIалай даххана хъанай дур, ванил качество хьхьара хъанай дур, журналистикалувун ххуллу ласлай бур фейкирттал, пиардал ва рекламарттал пишакартал. Регионал властирдалгу биял­сса хIарачат бур, СМИ-лул бияла ва каширду ишла дурну, цалламур цIа-кьини ядуван. Журналистътурал даву, жяматран дакъассагу, властьран цаннагур аьркинсса. ХIакьсса журналистикалул жяматран кумаг буллалиссар цахва цамур чулуха буруган, цIуцIи кIантту, агьам­сса масъалартту ялун личин бувну, ванийн вари учин, властьрангу журналистика тIайласса информациялул кюруну хьун аьркинссар, – увкунни Алик АьбдулхIамидовлул.