ДурмуницIунсса ва данмуницIунсса щугълурду

Юсуп МахIаммадов, Лакрал райондалул бакIчи:
— Жуятура ларгсса шин Лакрал райондалун тачIав дакъачIин алши бусса хьунни.

Республикалул БакIчинал най бунува лалавсунни райондалул агьалинал яла цIуцIими кIанттурду ци буссарив ва цукунсса буссарив, ва мунинна лархьхьусса хьунни ганал чулуха­сса къулагъас.

Цалчинма-цалчин кIицI бавияв ШавкIрату Щарав нани­сса кIанттайсса нигьал ва хьуллил дянивсса ххуллул буруккин ахиргу бартбигьин бюхъаву. ЦIанакул кIикку щиривкIуну буллай буссар Ухссавнил Ккавкказнаву чувчIав бакъасса лагрулийсса кIива-кIива ламу. Аллагьнал кабакьаврищал архIал цIусса шинал вай ламурду къуртал бансса умуд буссар.

Райондалул оьрмулуву хьусса ца цамургу тIайлабацIусса иширан на ккалли бавияв Дагъус­ттаннал Премьер-министр Артем Здунов бакIчисса Республикалул делегация Лакрал райондалийн бучIаву. Ва аьрххи сававну чулийн буккан бан бювхъунни чIярусса шиннардил дянив салкьи хьусса масъаларттугу, къуртал дан бювхъунни дайдирхьуну, дязаннив лирчIун диркIсса давурттугу. Масалдаран, чулийн буккан бавай буссару 2010 шинал буллай байбивхьуну бивкIсса Гъумучиял школалул къатри. Умуд буссар ялунчIилсса цIусса дуккаврил шин цIусса школалий дайдишин. ЦIусса шинаву къуртал дантIиссар, на райондалул бакIчину зун учIаннин шиннардил хьхьичIра дуллай дайдирхьуну, дайкъалитIавайсса цIусса азарханалул къатри. Бувну чулийн бувкссар Гъумук ттуплий буккайсса майданну. «Единая Россия» партиялул программалий Гъумук бувссар ххаллил­сса жагьилтурал парк, цин лавхьхьусса кIанттайн бувцуссар Гъумучиял дякIичIира. Бакьин буллай буссар шяраваллавунсса ххуллурду. Вана ттигъанну тIитIарду ШавкIрату ГьукIравсса ххуллу. Кьубиял шяраву тIивтIуссар Шяраваллил хозяйствалул министерствалул пландалий бувсса ФАП. ЦIусса шинаву бан ккаккан бувну буссар ттигу шанма ФАП.

Республикалул премьер-министрнал аьрххилийн цIунилгу кIура аллай, кIицI лаган ччива биттур хьушиву агьалинал чулухасса тавакъю –ялунсса шинал Гъумук дан ккаккан дурну ду­ссар детсадрал къатри. Махъсса зурул дянив Лаккуйнмай аьрххи багьнан ккаркхьунссар Гъумукун бухлахисса кIанттай Хан-Муртазааьлил гьайкалданучIа дуллай дайдирхьуну душиву эмаратсса арка. Дуллай дайдирхьу­сса давуртту чIярусса дуссар. Миннуя «Илчи» кказитрай ттининнингу бувсъссар, вания тинмайгу бусанссар.

Райондалул оьрмулуву хьусса ца агьамсса иш цамургу лях итабакьин къабюхъанссар – Аьрасатнал гьарца мурцIния чIявусса хъунисса хъамалгу бувкIун, район сакин хьуну 90 шин шаврил юбилей бюхттулсса даражалий кIицI лаган бюхъаву. Миксса бусравсса хъамал бучIаврилгу бусласиссар район итталу душиврия.
На Заннайнгу щукрулий, чIарав бавцIуминнайнгу барчаллагьрай ура вай кIицI ларгсса давуртту дан бюхъаврихлу. Даркьу­сса хьуннав ялун нанисса шин щалагу Лакку билаятрангу, лакрал миллатрангу! Мукунсса ниятрай лаизлай ура ялувсса Заннайнгу.

МахIаммадхIажи Айдиев, ЦIуссалакрал райондалул бакIчи:
— 2019 шин ЦIуссалакрал райондалул юбилейрдал шин дия. ЧIявусса бусравсса хъамаллурайнгу оьвкуну, жу кIицI лагарду район сакин хьуну 75 шин хъанахъи­сса ва дунияллул террористурацIа район мурахас дурну 20 шин бартлаглагисса юбилейрду. Жул кьини хъун дан бувкIун буссия Аьрасатнал личIи-личIисса регионнаясса – Къиримнавасса, Липецкаллал ва Костромаллал областирдая­сса, Ингушетиянал, Татарсттаннал республикардаясса хъамал, Да­гъусттаннал цинявппагу миллатирттал вакилтал. Шадлугърал мажлис дусшиврул фестивальданийн кIурабавунни.

Байрандалул мероприятияр­ттай гьуртту хьун Дагъусттаннал БакIчи Владимир Васильевлущал райондалийн бувкIунни хъунма­сса делегация.
Аьмну хIисав дурну, ларгсса шин райондалун даркьусса хьунни учивияв. Ххуйсса ккаккияр­тту хьунни социал-экономикалул, шяраваллил хозяйствалул аралуву, социал объектру давриву. ЦIуминалийсса Аьхъардал, Шушиннал, ДучIиннал, ЦIуссачIурттащиял, Гьамиящиял шяраваллаву дарду канализациярду.

Навагу, жяматгу рязисса иш хьунни халкьуннал арцух Гьамиящиял шяраву спортзал баву. Да­гъусттаннал Шяраваллил хозяйствалул министерствалул кумаграцIух ДучIиннал ва Шушиннал шяраваллаву буварду ттуплий буккай­сса майдан, Аьхъа­рав ва Шушияв дайдишарду жямат бигьалагансса парк буллалисса давуртту. Шушияв, Гьамияхь, ДучIив буллай бу­ссар оьрчIал садикру. Инвестициялул программалийн бувну бакьин був­ссар ЦIуссалакрал шяравунсса ххуллу.
Ялагу кIицI лаган ччива, жул райондалий аьдатравун багьну буссар шинал ахирданий мусил медаллай школа къуртал був­сса оьрчIру лахъа-хъун баву. Ларгсса шинал февраль зуруй хьуссар вузирдаву хьхьичIунну дуклаки­сса райондалиясса студентътуращалсса шадлугърал даражалий­сса хьунабакьаву.
ЦIусса шин жу хьунадакьлай буру налогру ратIаврил чулуха­ссагу ххуйсса ккаккиярттащал. Налогру ратIаврил масъала райондалул 108,5%-рал щаллу був­ссар.
Ялун нанисса шинал райондалул агьалинал оьрмулул даража гьаз баву, багьу-бизу ххуй баву мурадрай, дан дакIнийсса давуртту чIярусса дур. ДакIниймур бартбигьин бюхъанссар тIисса умуд бур. ХIарачат банну.
Жула оьрмулуву ххаримургу, пашманмургу архIал най бур. Пашманмур, тIааьн бакъамур ларгсса шинащал гьаннав, цIусса шин жула оьрмулувун ххаришивурттащал, хъиншивурттащал, бахтти-тIайлабацIулущал духханнав. Жувагу, жула лагма-ялттумигу цIуллуну, сагъну битаннав. Дуниял паракьатну личIаннав.

Шамил Рамазанов, Ккуллал райондалул бакIчи:
— Бунияла ялун дуркIсса шин чутсса шин дур. Чутшаврил хъаттирдайрихха инсаннал талихI тIайлабацIулул ххуллийн буккай­сса. Му чулуха жуятура ларгсса шин ттул давривугу тIайлабацIу бусса хьунни. Бювхъунни ттуща республикалул каялувчитурал дакIурдичIансса «нузру» тIитIин. Ми «нузру» тIитIаву хьунни райондалул жяматрал оьрму бутаврил хIалурду хъит учин дуван бюхъавуну. Яний цаппара социал масъалартту щаллу бан бювхъунни.

Хъусращиял, Вихьуллал шяраваллаву инсантал бигьалагансса паркру тIитIин бювхъунни. Ччянива буллай бачIи бувну бивкIсса, Ккул-Хъусрал чулинмай нанисса ххуллийсса ламу щаллу бан бювхъунни. Мукунма, 2018-ку шинал ахирданий байбивхьуну, 2019-ку шинал октябрь зурул дязаннив къуртал бувунни Хъуннеххайхсса Хъюйннал чIаравсса ламу. На барчаллагь тIий ура вай давуртту лябуккули дурсса Дагъусттаннал Ххуллурдал министерствалухь. Паркру ва ламурду тIитIарду шадлугърал даражалий, МахIачкъалалия бувкIсса хъамалгу гьуртту хьуну.

Мукунма ЧIяйннал шяравусса школалул байбихьулул классирттал къатри, жяматгу гьуртту хьуну, «Дагъус­ттаннал 150 школа» тIисса программалул лагрулий бакьин бан бювхъунни. Найнна дур Ваччав, Хъюйннал шяраву, Къянив щин дуцлацисса давурттугу.
Гьай-гьай, райондалий хьусса ххуйшивуртту циняв кIицI къадулларчагу, хьунни фольклордалул фестиваль, Ккуллал шяраву школа тIивтIуну 90 шин там шаврин хас дурсса шадлугъ ва цаймигу агьамсса ишру. Шяраваллаву­сса жямат чIявучин ятту-гъаттара ябаврийну маэшат буллай бур. Гьай-гьай, ччива шяраваллаву­сса СПК-рдалгу цала даву кка­ккан дурну. Умуд бур дуванссар тIисса.
На барча тIий ура циняв­ппагу лакрал жяматрахь ялун дуркIсса ЦIусса шин! ЧIа тIий ура тIайбацIуртту!

Шарип Шарипов, экономикалул элмурдал доктор, профессор:
Жуятура нанисса шин ттун бигьа дакъасса, амма личIи-личIисса, дакIний личIансса иширттал авадансса дия. ЧIявуми ххуйсса ишругу, тIайлабацIурттугу ттула хIарачатрайну хьунни. Амма инсаннал оьрмулуву гьарзат цанма ччикун къашай. Цуксса хIайпнугу, ххари-ххуймунищал архIал, пашманмургу най бур. Ттунма ххира­сса, гъансса инсантал дунияллия лавгунни. Амма ттул пашманшиву ххиен дуллай, на тяхъа-таза ­уккан уллай бия мудан лагма лавгсса ххирасса оьрчIал оьрчIру.

Ларгсса шинал хъинну дакI­ний личIансса, тIааьнсса асардал вибувцIусса хьунни 11 шинавусса ттула душнищал Санкт-Петербурглив лавг­сса аьр­ххи. ЧIивисса душнин Санкт-Петербургливсса тарихрал ххазинартту асар хъанахъи­сса куц чIалай, тайннул агьамшиву, кьадру-кьимат хъиннува гьаз хъанай бия ттул итталу.

Цаймигу аьрххи-ххуллурду багьунни ттул билаятрал личIи-личIисса шагьрурдайн. Гьуртту хьура билаятрал агьамсса экономикалул форумирттай – кIийла М. Ломоносовлул цIанийсса Мос­кавуллал паччахIлугърал университетраву ва Гайдардул конгрессрай.
Ттунмагу, цайминнангу хъуннасса агьамшиву дусса иш хьунни махъсса 30 шинал лажиндарай республикалий хьхьичIра-хьхьичI ттула сипталий сакин дурсса, личIи-личIисса районнайн ва шяраваллавунсса элмийсса экспедицияртту. Жу бивру республикалул 6 райондалийсса 25 шяравун, миннувух – Ккуллал ва Лакрал районнайнгу, ххал дуварду шяраваллал тагьар.
Цуксса хIайпнугу, жула шяраваллу дачIра дуклай дур, ливчIсса инсантал шяраваллаву бугьансса чаран лякъин багьлай бур.

Террористал ххит бувну 20 шин шаврицIун бавхIуну ттунгу дуллунни юбилейрал медаль. Та жула халкьуннайх кьини дурксса чIумалсса иширттацIун дархIусса ва наградалул кьимат хъунма­ссар ттучIа.
Ялун нанисса шин циняв­ппагу лакрал агьалинан даркьу­сса хьуннав.
Цинявппагу «Илчи» кказит­рал буккултрангу чIа учин ччива цIуллу-цIакьшиву. Цуксса мажал бакъа бунугу, лякъияра зунма ххирасса инсантуращал, гъан-маччанащал щябикIансса чIун. Ххари хъанахъияра чIивисса тIайлабацIулиягу, мабацIари чIири-хъунсса, чIумуйсса дайшиширттал дакI гъагъан дан. ТачIавгу хаин машари зува язи бувгьусса ххуллийн, дакIнил ларсъсса даврийн. Оьрмулуву чIявусса затру жуйнма хъар шай­сса бикIайссар, жула мурадру-хияллу бартбигьин жулва бияла хъунмассар. Гьарца инсаннал хьхьичI лахъисса ххуллу бу­ссар. А. Блоклул тIийкун, ла­хъисса ххуллу бигьассар. Ххувшавуртту, хьхьичIуннайшивуртту, тIайлабацIуртту чIа тIий ура гьарцагу чувнан!

Эльвира ХIасан­хIусайнова, Ахъушиял район­далул бакIчинал хъиривчу:
— 2019 шин жул райондалун тIайлабацIусса хьунни. Райондалул бакIчинал хъиривчу хIисаврай нава социал масъалартталсса буллай бухьувкун, ва чулуха­сса тIайлабацIурттая бусан ччива. «КIулшиву» нацпроектраву гьур­тту хьуну жуща бювхъунни райондалул 7 школалий «Точки роста» тIисса центрду тIитIин. «150 школа» тIисса проектрайн бувну бакьин бан бювхъунни 3 школа. ЧIярусса хьхьичIуннайшивуртту хьунни туризмалул давриву. Мунил потенциал хьхьичIунмай баву мурадрай, администрациялул дуллалимур ва Туризмалул министерствалул форумирттай чялишну гьуртту шавугу хIисавравун лавсун, жул райондалун буллунни дипломру ва грамотартту.

[dropcap]Я[/dropcap]лагу, ларгсса шинал райондалул жямат ва хъамал ххари бан­сса иш хьунни Бархъаллал шяраву «Бархъал» цIанилусса хъамаллурансса къатри тIитIаву. Вай «Да­гъусттаннай шяраваллил туризмалул яла ххуйми къатри» тIисса рес­публикалул конкурсрай ххув хьунни, шяравун бувкIсса чIявусса туристуралгу вайннун лавайсса кьимат бивщунни.
Ноябрь зуруй Дагъусттаннал Хъаннил союзрал председатель Интизар Мамутаеващал на гьуртту хьура гьарца шинах Москавлив шайсса Аьрасатнал Хъаннил союзрал форумрай. Шикку ххал бивгьунни федерал проектру бартдигьавривусса хъаннил гьурттушиндарал масъала. Ихтилат багьнавхьур, кIицI лагавияв цалла дуллалисса даву жула хъаннил дакIнихтуну, лажин кIялану дувайшиву.
ЦIусса шин Дагъусттаннал халкьуннацIун даркьусса хьуннав. ДакIниймур бартдигьинсса каши-кьудрат дулуннав. Миллатирттал дянивсса дусшиву цIакь хьуннав, цаннан ца бувчIлай личIаннав!

Гулизар Султанова, Аьра­сатнал искусствалул лайкьсса зузала:
Жуятура нанисса шин магьирлугърал, культуралул, хаснува театрдал оьрмулуву авадансса шин дия.

Ва дия Аьрасатнаву Театрданул шинну баян бувну.
ВаницIун бавхIуну, чIярусса агьамсса мероприятияртту хьунни -Дагъусттаннайгу, чIаххувсса республикарттайгу, аьмну щала Аьра­сатнавугу. Пахрулий бусан ччива, жула Лакрал театрданул ккаккан бунни цала творчествалул лавай­сса даража. Миллатирттал театрдал фестивальданий «Оьтту ва макь» тIисса спектакльданул лавайсса даражалул режи­ссуралухлу диплом буллунни театрданул хъунама режиссер Аслан МахIаммадовлун. «Федерация» тIисса Аьрасатнал миллатирттал фестивальданий гьуртту хьун конкурс баян бувну, Аьрасатнал миллатирттал 200 театрданува язи бувгьуссар 14 театр. Миннувух – жула Лакрал театр­гу бивкIссар. Ва хъунмасса ишри, Дагъусттанная ца Лакрал театрди фестивальданий гьуртту хьусса. Театрданул ккаккан бувссар «Камаллул Башир» спектакль (режи­ссер Аслан МахIаммадов ва Муса Оздоев, музыка Ширвани Чаллаевлул). Ва бакъассагу, ларгсса шинал театрданул бивхьунни классикалул комедия – Н. Гогольлул «Ревизор». Комедиялул премьералийн бувкIун бия Дагъусттаннал БакIчи В. Васильев ва ХIукуматрал вакилтал.

Ларгсса шинал ттул оьрмулуву ххарисса иш цамургу хьунни. На дуллуссия президентнал грант ласунсса мурадрай чIярусса шиннардий зий бивкIсса «ХХ-мур ттуршукулул Дагъусттаннал драматургия» тIисса ттула даву. Вара грантрайн дирхьуну дия цала-цала давуртту 13 инсаннал. Миннава язи увгьу­сса 3 авторнавух нагу хьунна.
ЦIусса шин барча дуллай, чIа учин ччива ттула кулпатран, уссурссуннан, цинявппагу лак­ран, да­гъусттанлувтуран цIуллу-цIакьшиву. Жула лакрал миллат­рал цIа-кьини бюхттул хьуннав, иш бачиннав. Лайкьссар жула миллат циняврдагу хъиншивурттан. Шаннагу лакрал райондалул экономикалул, багьу-бизулул, культуралул, кIулшивурттал даража гьаз хьуннав.

Жавраил Хачилаев, жяматийсса ишккакку:
Ларгсса шин аьмну оьккисса къархьунни. Гьармуния къатIунна, амма дакIний личIансса ххари­сса иш хьунни чIярусса шиннардий чIу-чIитI къабавсса, ттунагу хъинну ккаккан ччай ивкIсса, ттула дус Ровшан Кьасимов хьунаакьаву. ДакIнийн бутарду жула жагьил замана, цачIу аьралуннаву къуллугъ буллай бивкIсса шинну. Ровшан хъинну итххявхсса, гьунар бусса жагьил икIайва. Зий икIайссия «Лезгинка» ансамбльдануву. Ва роль дугьлай уссар Хочбардуясса киноравугу. Та чIумал ванал оьвкуну, на навагу гьуртту хьуссара му кинорал чIивисса бутIуву. Кино ласлай буссия Дарбантлив, Нарын-Къалалий. Вай иширттацIун дархIусса тIааьнсса дакIнийн бичавуртту хьунни. ЦIунилгу цаннан ца лявкъуну, жула дусшиву цIу дуккаврия рязину ура. ЦIана Ровшан иш бавчусса бизнесмен ур.
Ялун нанисса шинал чIа учин ччай ура дунияллий дакьаву, паракьатшиву, гьарнал ужагърай нахIушиву. Инсантурал оьрмулуву ххари-хъинсса ишру ххишала хьуннав!

Аьбдулкарин Айгунов, ДР-лул жагьилтурал иширттал министрнал кумагчи, тренер, каруннай бияврил дунияллул халкьуннал дянивсса спорт­рал мастер:
— Жуятура нани­сса шин ттуцIунна даркьусса, тIайлабацIусса дия. Ссаха зий, ци къуллугърай унугу, хIарачат буллай ивкIра жула республикалун, жагьилтуран мюнпат бусса давуртту дан. Амма шинал ахирданий на хъинну пашман унна ттула хъинсса дус Муслим Даххаевлуй тахсир ккаклакисса тIааьн бакъасса хаварданул. Ва иш ттун хъинну асар хьунни, нирхирава личин унна. Амма дакI дарцIуну ура органнал тIайламур бацIан баншиврий, Муслимгу ччяни ичIунай, аьзизсса ниттичIан АминатлучIан, кулпатрачIан, уссурссунначIан зана икIаншиврий.

ХIакьину мукунсса чIунну дуркIун дур, инсанная дусгу, уссу­гу уллай бур цанма хайр буссаксса. Рязину икIара, аьпа биву, ттула буттал ттунна зунтталчунан лайкьсса тарбия дуллуну тIий. Ттул дустал, гьалмахтал чIявусса бур, амма унгу-унгусса кIия дус уссар ттул – ца Муслим Даххаев, цагу – МахIаммад ХIамзаев. На учивияв, цIакьсса дусшивручIан дирсса цичIар дакъассарча, буруччияра зула дустал, куну.
Ялагу на Аллагьнайн щукру тIий ура, захIматсса операциягу бувхIуну, хIакьину ттула аьзиз­сса нину ттущала душиврийн ва, сант дирирну дунура, оьвчаву дуллай ура цинявннайн: зущава шай­сса хIурмат бувара ниттихъал, ми чIарав бунува тIий.
Ялагу хъуннасса рязишиву дикIай кIулшивтту ласун гъира бу­сса, лавайсса кьиматирттай дуклакисса ттула оьрчIая. Уттиния тихунайгу нава вайннал ххари уллан­ссара тIисса умуд бур.
ЦIусса шинал гьарцагу инсаннал цанма чIа тIисса мурадру бартлаганнав. Амин.

Разита Мушидова, Аьра­сатнал ПрезидентначIасса Да­гъусттаннал вакилханалул инсаннал ихтиярду дуруччаврил комиссиялул член:
— Шин дакIний лирчIунни личIи-личIисса мероприятиярттайну. Чансса бакъая, кумаг аьркин багьлай, жуйн бувк­сса инсанталгу. Гьарнал мурад лалавсун, шайсса кумагру буллай бивкIру жу личIи-личIисса захIматшивурттахун багьсса инсантуран шинал лажиндарай. ХьхьичIмур шинал кунна, лавайсса даражалий тIайла дуккарду Дарбант шагьрулий кIилчин хьусса миллатирттал культуралул ва искусствалул фестиваль World Folk Vision. Хъуннасса ххаришиву дия дакIниву фестивальданий гьуртту хъанахъими шиная шинайн чIяву хъанай бушиврия, Дагъусттаннай вайксса чIявусса гьунар бусса оьрчIру бушиврия.

[dropcap]Ш[/dropcap]инал ахирданий нава рязи­сса цамургу мероприятие хьунни. Ва дия чил билаятрал мазурдил ЕГЭ дукьан даврил хIакъиравусса мероприятие. Щалагу Аьрасатнаву най ду­ссия тIайланнасса эфир. Ххуйну хьунссия чил билаятрал мазурдил ЕГЭ мяйжаннугу дукьан дарча. Агана ва экзамен дуллан багьарча, чIявусса жула оьрчIру аттестат бакъа личIан най бур. Хъуни шагьрурдай дулун бюхъарчагу ва экзамен, шяраваллаву, мюрщисса шагьрурдай ва къахьунссар оьрчIаща дулун. Мунияту, жула оьрчIру къак-щук къахьун, ва масъалагу жунма ччикун щаллу хьурча ххуйну хьунссия.
Ялун нанисса шин жула агьалинан даркьусса хьуннав. Дяъвирду, питнарду къахьуннав. Гьарица инсаннан цIуллушиву, талихI-тирхханну дулуннав. Инсантал куннан ку бувчIлай личIаннав. Халкьуннал дянив­сса дусшиву цIакь хьуннав. Гьарица ишираву аькьлу-кIулши ялтту дукканнав. Миллатирттал дянив ссивцIу къабагьаннав.

Таисия МахIаммадова, «Аьрасатнал нинухъру» тIисса суккушиннарал региондалул отделениялул хъунмур:
Ттула давриву шин оьккисса дакъая. Дан дакIний диркIсса чIярусса давуртту бартдигьин бювхъунни. ТIааьнну бия ттула даврин лайкьсса кьимат бишлай, дуллусса наградартту ласлангу. Аьрасатнал Ветерантурал комитетрал чулуха ттун дуллунни «За укрепление содружества» тIисса медаль, Ярославуллал областьрал УМВД-лул чулуха – медаль «100 лет Ярославской милиции». Шинал ахирданий, Ниттихъал кьинилуцIун бавхIуну, Дагъус­ттаннал БакIчи Владимир Васильевлул паччахIлугърал наградартту дуллунни паччахIлугърал давурттай хьхьичIунну зузисса ниттихъан. Ва кьини республикалул БакIчинал Барчаллагьрал чагъарду буллуминнавух нагу бияв. Ва бакъассагу, ДР-лул Миллатрал политикалул министерствалул ттун дуллунни «За укрепление межнационального мира и согласия» хIурматрал лишан. ХIарачат банна ттиния тихунмайгу нара дуллалимур лажин кIялану дан.
ЦIусса шин гьарицагу да­гъусттанлувнан ларгмурнияр даркьусса, ххарисса, тIайла­бацIусса хьуннав тIий бура. Гьарца ужагърай барачат ли­кканнав.

Асият Буттаева, философиялул элмурдал доктор, профессор:
Ва оьрмулувусса гьарцагу лахIза на Хъунасса Заннал дур­сса бахшишран ккалли бувара ва барчаллагьрай кьамул бара, цукунсса иширттацIун бавхIусса бухьурчагу.
2019 шин аьрххи-ххуллурдал, творчествалул ва цIуну хьусса дус­турал чулуха авадансса дия.
ТIааьнсса асардал бувцIусса ва мюнпат бусса хьунни Къаза­хъисттаннайнсса, Къиргъизнавун­сса, УзбакIисттаннайнсса аьрххи-ххуллурду. Вай республикарттай хьунни личIи-личIисса даражалул хьунабакьавуртту: министерствар­ттай, землячестварттай, школардай. Хьунабавкьуру жу къавтIаврил ансамбльлащалгума. Чичарду кьутIив вай республикардал ВУЗ-ирдащал – Ташкантливсса Экономикалул университетращал ва Мирза Улугбеклул цIанийсса Национал университетращал, Актау шагьрулий­сса Есеновлул цIанийсса университетращал. Чирчуну меморандум, документру гьан бувссар вай цинявппагу вузирдавун. Укунна­сса кIивайннанвагу мюнпатсса элмийсса дахIавуртту дарду Татарс­ттаннал республикалийгу: Къазаннайсса, Болгардайсса Исламрал академиярттащал.
Шиккува кIицI бан, вай вузирдаву хьусса дунияллул даражалий­сса олимпиадарттай ттул студентътурал бувгьуссар 1-сса кIанттурду. Вагу ккалли бансса ишри.
Ялун нанисса шин цинявннан тIайлабацIу бусса хьуннав, дуллалимур дузрайн дукканнав, дакIниймур бартлаганнав.