Гъумук хъуннасса шадлугърай тIивтIунни цIуну бакьин бувсса паччахIххуллул бутIа. ЦIанакул ванийн учай Сурхай-ханнал кIичIира.
Шадлугърай гьуртту хьунни райондалул каялувчитал, депутатътал, шяраваллал администрациярттал хъуними, идарарттал каялувчитал, школарттал директортал, Гъумучиял школалул учительтал ва дуклаки оьрчIру.
Райондалул бакIчи, «Единая Россия» партиялул кIанттул отделениялул каялувчи Юсуп МахIаммадовлул кIицI лавгунни Гъумучиял дякIичIира бакьин бувшиву «Формирование комфортной городской среды» тIисса «Единая Россия» партиялул федерал проектрал лагрулий.
Лакрал район гьарца шинал гьуртту шайссар, ва дакъасса, партиялул щурущи дурсса цаймигу программарттайгу – «Мюхчансса ххуллурду», «ЧIири ватандалул маданият» ва цаймигу. Юсуп МахIаммадовлул агьали вихшала дишин бунни Гъумучи ва щала район цIудуккан дансса давуртту вания тихуннайгу дуллантIишиврийн.
-Зун къачIалай бакъахьунссар махъсса шиннардий район цукун хьхьичIуннай хъит тIий дуссарив ва му иширах республикалул бакI дургьуминнал цуксса къулагъас дуллай буссарив, — кунни райондалул бакIчинал.
Ва проект зузи дан итадаркьуну дусса дур кIива миллиондалия лирчусса арцу. Гъумучиял паччахIххуллийх даркьуну дур ххялчIив, дурну дур цIусса чапарду, бувтIуну бур асфальт, бувгьуну бур ацIния ряхва мурхь, бивхьуну бур цIусса скамейкартту ва урнарду, концертру дайсса майдан.
«Единая Россия» партиялул Дагъусттаннал отделениялул каялувчитурахь ва райондалул бакIчинахь барчаллагь увкунни Гъумучиял шяраваллил администрациялул бакIчи МахIаммад ХIусниевлул. Гъумучиял школалул учительница Роза Бавасулаймановал кIицI лавгунни Юсуп МахIаммадов райондалул бакIчину авцIуния шиннай район чIаланну хьхьичIуннай хьушиву, шиная шинайн райондалий хъанай душиву ххуй чулийннайсса дахханашиннарду, оьрмулун ва бигьалагаврин къулайсса шартIру дузал даврил масъала тIурча, райондалул каялувчитурал хьхьичIунсса ххутайн лавсун бушиву.
Зулайхат Тахакьаева
