Гьашину, октябрь зурул 1-нния 31-ннийн дияннин щалагу Аьрасатнаву хьунтIиссар циксса инсантал бурив жям дуллалисса перепись.

Мунийн бувну на уттигъанну хьунаавкьуссияв Ккуллал райондалий ва переписьрал даврил жаваб дулун ккаккан увсса Амиров МахIаммадрамазан Апаннинал арснащал.

Ванал буслай ур укун:
— Перепись дувайссар ацIра шинай цал. ХIасул бувну бу­ссар Ккуллал райондалий перепись дувансса комиссия. Ккаккан дурну дуссар комиссиялул дуллансса давурттугу. ХIадур дурну дуссар циняв шяраваллал инсантал яхъанахъисса адресру ккаккан дурсса сияхI, цивгу ларсун дуссар компьютерданийн. Сакин дурну дуссар инсантурал сияхI дуллансса ххюра участок. Ца участокравун бухлай буссар 600 къатта. Цалчинмур участокну хъанахъиссар: Хъусращи, 2-мур ЦIувкIул, ЦIущар. Микку бур 580 къатта. КIилчинмур участок – Ккуллал шяраваллил 600 къатта. Шамилчинмур – Ккуллал шяраваллил ливчIми къатригу, СумбатIуллалссагу. Мигу хъанай бур 601 къатта. Мукьилчинмур – 1-мур ЦIувкIул, ЧIяйми, Хъюйми, Ваччи. Мигу хъанай бур 631 къатта. Ххюлчинмур – Вихьул, Къян, ЦIуйши, Хъювхъи, Ссухъиящи. Мигу бур 570 къатта. Август зуруй ялтту бувк­ссар регистратортал.

Гьашину январь зуруй гьарца шяраву хIасул бувантIиссар перепись дуллансса коми­­­ссия. Ва базилух дуллалисса перепись хьхьичIараминнуяр личIисса дикIантIиссар: ин­тернетрайхчIин, планшетирттайну, ва, гьарца къатравун лавгун, цими инсан яхъанай урив ххал уллалисса.Мукунма переписьравун инсан утан хъанахъиссар МФЦ-лийхчIингу. Шайссар переписьрайнсса хIадуршинна цукун най дурив ххал дигьлагьисса батIавурттугу. Ялагу ца укунсса затрал ялув тавакъю буван ччива шяраваллал каялувчитурахь. Утти­гу диян дурну дакъар миннал шяраваллал кIичIирттал цIарду ва къатрал номерду кка­ккан буллали­сса планну. Ми анаварну диян дуван аьркинссар.

Ихтилат бувссар
ХIажимурад ХIусайновлул