[dropcap]Н[/dropcap]оябрь зурул 20-22-нний Москавлив хьусса цIуллу-сагъшиврул мушакъатшиву дусса оьрчIал дянивсса захIматрал пишардал усттаршиву ккаккан
дуллалисса Миллатирттал V «Абилимпикс» чемпионатрай гьуртту хьусса Дагъусттаннаясса оьрчIал цалчинсса кIанттурду бувгьуну бувкIссия.
«Веб-дизайндалул» пишалул усттаршиву ккаккан дурну, мусил медаль ларсъсса Ринат Арсланаьлиев кьамул унни Аьрасатнал цачIун дур командалувун. Утти гьунар бусса жагьилсса пишакар гьуртту хьунтIиссар 2021 шинал май зуруй Москавлив хьунтIисса Х «Абилимпикс» чемпионатрай «Пишакар» тIимур номинациялий.
Имара Саидова
Ринат Арсланаьлиев цIана ур Хасавюртуллал Аграр-экономикалул колледжраву «Веб-дизайндалул» пиша лахьхьин буллай.
Аьрасатнал цачIун дур командалул пишакартал чемпионатрайн хIадур буллантIиссар декабрь зурул 16-нния 21-ннийнин Анапа шагьрулийсса «Смена» тIисса щалагу Аьрасатнал оьрчIал центрданий.
Дунияллул халкьуннал дянивсса «Абилимпикс» чемпионатрай конкурсантътал бястлий буккантIиссар 55 журалул компетенциялий: IT- технологиярттал, дукиялул, промышленностьрал пишардал, сервисрал, творчествалул ва медициналул пишардал усттаршиву ккаккан давриву ва презентацияртту давриву.
Пишардал усттаршиву ккаккан дуллалисса дунияллул даражалийсса «Абилимпикс» чемпионатрай Ринат Арсланаьлиев гьуртту хьунтIишиву бувсунни Дагъусттаннайсса WorldSkills Russia ва «Абилимпикс» суккушиннардал каялувчи Шамил МахIаммадовлул.
