[dropcap]Н[/dropcap]оябрьданул 27-нний Дагъусттан Республикалул ХIукуматрай хьунни ва шинал мартрал 20-нний региондалул
БакIчинал ДР-лул Халкьуннал Мажлисрайнсса Рисалалий ккаккан бувсса агьамми кIанттурду цукун щаллу буллай бурив ххал буллалисса батIаву.
Бадрижамал Аьлиева
Мунил дайдихьулий Дагъусттаннал премьер-министр Артем Здуновлул дакIнийн бувтунни Рисалалийсса агьамми положенияртту иширайну щаллу баву мурадрай хасъсса План сакин дурну диркIшиву.
Му пландалийн бувну бивхьусса бигарду цукун щаллу буллай буссарив бувсуна ДР-лул экономикалул ва территориал развитиялул министр ХIажи Султановлул. Мунал бусаврийн бувну, Пландалувун бухлай бусса бур 106 пункт, цайн бувнугу 2, 5 азарда мероприятие дуван аьркинсса. Ми дувавугу цIакь дурну дур республикалул министерстварттацIун. ХIажи Султановлул, гьарца министерствалий цийва-цийва авцIуну, бувсунни ми давурттава цуми дурссарив, махъми ссайн дирну дуссарив ва ци даражалий дуссарив. Министерстварттал бакIчитуралгу бувсунни цалла-цалла дуллалисса давурттая, ци дурссарив, ссал хъирив къалавссарив.
Гихунмай Артем Здуновлул гьаз бунни инвалидтал даврил щаллу баврийн, республикалул электросетьрал комплексрал даврийн, ххуллурдайсса апатIру чан баврийн багьайсса ва цаймигу масъалартту.
