Гьашинусса шин Аьрасатнаву ккаккан дурну дуссия Театрданул шинну. Мугу хIисаврай буну, вай гьантрай жу хьунабавкьуру А. Къапиевлул цIанийсса Лакрал паччахIлугърал музыкалул ва драмалул театрданул каялувчи,Аьрасатнал магьирлугърал лайкь хьу­сса ишккакку, Набинал душ Бадрижат МахIаммадхIажиеващал. Барду чIиви-хъунсса ихтилат.

---

— Бадрижат Набиевна, вил ябитаврийну, цукунсса хьур Театрданул шин аьмну театрал магьирлугъран?
— ХьхьичIва-хьхьичI, ттун хъинну агьамну чIалай дур театрал иширттахсса билаятрал БакIчинал къулагъас. Кьамул дунни чIярусса мероприятияр­тту дан ккаккан дурсса хасъсса программа. Программалул лагрулий хьунни чIярусса регионнал, щалагу Аьрасатнал ва дунияллул халкьуннал даражалийсса фестиваллу; форумру, конкурсру, выставкарду.
Театрданул шинал хьусса иширттал, махъ бакъа, агьамсса кIану бугьан аьркинссар, жула билаятрал театрал магьирлугъ хьхьичIуннай даврил ххуллий бакъассагу, театрданул тамашачитурал аьдад хъун дангу.
Театрданул шин кIицI лаглай бушиврул бусласиссар театр сагъну бушиву, мунил инсаннал пикрирду ва рувхIанийсса асарду лахъсса даражалийн буцлай бушиву, тасттикь буллалиссар театр жяматрал агьамсса бутIану бивкIшиву ва личIантIишиву.

— Ссайну дакIний личIан­тIиссар Театрданул шин жула республикалун, Лак­рал театрданун?
— Театрданул шин республикалий кIицI ларгссар чIявусса хъунисса театрал акцияр­ттайну. Миннува ца яла асар биянсса ишну хьуссар Каспи хьхьирил зуманицIухсса паччахIлугъирттал миллатир­ттал театрдал дунияллул халкьуннал дянивсса цалчинсса фестиваль. Къазахъисттаннаясса, Азирбижаннаясса, Татарсттаннаясса ва Аьрасатнал регионнаясса 18 театрданул ккаккан бувссар цала язи-язими спектакллу.
Пахру бан лайкьсса ишну хьуссар Театрданул шинал чIяву миллатру бусса Дагъусттаннал аьрщарай цалчинсса дунияллул халкьуннал дянивсса фестиваль «Волшебный мир театра кукол стран Брикс». Цилгу цачIун бувссар шанма континентрая­сса ххюва билаят. Дагъусттаннал чIивиссагу, хъунассагу тамашачи кIул хьуссар Бразилиянал, Индиянал, Китайнал, ЮАР-нал ва Аьрасатнал ссихьрал пишакарсса театрдал ляличIисса магьирлугъращал.
Мунищала архIал Поэзиялул театрдануву хьуссар А.С.Пушкин дунияллийн ув­ккун 220 шин там шаврин хас дурсса шеърирдал театрдал фестиваль.

Республикалул БакIчинал Грантрал кабакьаврийну Республикалул опералул ва балетрал театрданул дагъусттаннал тамашачи кIул увссар Москавуллал, Германнал ва Тюрингскаллал филармониярттал солистуращал.
Ва шинал чIалансса кумаг хьуссар республикалул театрдал материал-техникалул база цIакь баврингу.
Ноябрь зурул ахирданий, декабрь зурул байбихьулий республикалий хьунни хъунмасса Дунияллул халкьуннал дянив­сса театрал форум, цил лагрулий хьу­ссар «Мастер-классру», семинарду, конференцияртту ва цаймигу журалул мероприятияртту.
Жула Лакралмур театрдания гъалгъа тIурчаннив – Театрданул шин жун дия тIайлабацIусса. ТIайлабацIу бакъаривла, туну, му Аьрасатнал кIиттуршва миллатрал театрданува «Федерация» тIисса Щалагуаьрасатнал миллатирттал фестивальданий гьуртту хьун язи бувгьусса 14 театрданул сияхIрайн ласаву. Фестивальданий Грозналлал шагьрулий Лакрал театрданул кка­ккан бувссар спектакль «Камаллул Башир».

[dropcap]В[/dropcap]а фестиваль хьуссар театрдал дянивсса уртакьшиву хьхьичIуннай дан кабакьу буллалисса агьамсса ва гьуртту хьуминнан хъама къабитансса ярг­сса ишну. Тикку гьуртту хьуминнан ккавкссар, дунияллул опытрайнгу чул бишлай, цаламур ляличIишивугу дуручлай, цукун хьхьичIунмай хъит тIий буссарив Аьрасатнал миллатирттал театрду.
Театр гьуртту хьуссар Каспи хьхьирил дазуцIухсса паччахIлугъирттал миллатирттал театрдал дунияллул халкьуннал дянивсса цалчинсса фестивальданий ва муний С.Кьасумовлул пьесалиясса «Оьтту ва макь» спектакльданухлу режиссер Аслан МахIаммадов лайкь хьу­ссар «За лучшую режиссерскую работу» дипломран (спектакль бивхьуссар 2018 шинал Республикалул БакIчинал Грантрал кумаграйну).
КIицI бан багьлай бур театрданул творчествалул ва сакиншиндарал даврилмур тIайлабацIугу.
Лайкьсса даражалий хьу­ссар Апанни Къапиев дунияллийн увккун 110 шин бартлагаврин хас бувсса аьпалул мажлис. Гьарун Саэдов дунияллийн ув­ккун 125 шин, аьщун ивзун 100 шин шаврин хас бувну цIу бу­ккан бувссар спектакль «Къалайчитал». Спектакль бишин Москавлия бучIан бувссар режи­ссер ПатIимат МахIачева, цуппагу Гьарун Саэдовлул ссил арснал душ.
«Уттарасса театрал дарсру» тIисса театрдал вивсса проектрал лагрулий бивхьусса Н.В.Гоголлул «Ревизор» ккалли бан бучIиссар республикалий резонансъсса иширан.

Ххариссару жула жагьил­сса, гьунар бусса ва ялун бучIантIимур бусса актертураягу: гьашину Дагъусттан Республикалул лайкь хьусса артистнал цIа ларсъссар Зинаида Чавтараевал, Грознай шагьрулий «Гьунардал ттиркьюкьив» тIисса дунияллул халкьуннал лагрулийсса конкурсрай шанма номинациялий ххувгу хьуну, «КIялаарцул чIу» цIанин лайкь хьуссар Зульфия Архилаева.
Гьашину жула театр цIунилгу гьуртту хьуссар «Хъуни гастроллу» тIисса Аьрасатнал Культуралул министерствалул кабакьулийнусса регионнал дянив­сса программалувух. Хъунма­сса тIайлабацIулущалсса хьунни ноябрь зуруй Къалмукьнал Элиста шагьрулийнсса гастроллал аьрххигу. Лахъа-хъунсса хIурматрай кьамул бунни шанмагу спектакль: У. Шекспирдул «Гамлет»; Апанни Къапиевлул «Духкъалагайсса макь» ва Усачевлул «Айболит».
ТIайлабацIусса хьунни ДР-лул Культуралул министерствалул кабакьаврийну щурущи бувсса «Культура» проектрал лагрулийсса гастроллугу. Да­гъусттаннал, Нальчик ва Грозный шагьрурдал студентътуран ва дуклаки оьрчIан ккаккан бувссар спектакль «Ревизор».

— Цукунсса чIалай бур вин театрданул ялун бучIантIимур ца ацIра шинава?
— Ччива ккаккан гьунар бу­сса актертурал ва режиссертурал жагьилсса ник, хьхьичIва кунма, билаятрал хьхьичIунсса театрал вузру къуртал бувсса. Ччива хьхьичIуннай хьуну миллатирттал студиярттал практика.
Бугьара хъанахъисса актертурал кIану бугьансса ник хIадур даврицIун театр хьхьичIунмай шаврил ца агьамсса буруккинну личIлай бур театрданувун зунсса инсантал кIункIу бансса ва ши­кку цIакьну бацIансса шартIру дузал даву.

Пиша кIулсса жагьилсса актертал театрданува ликъахъланшиврул багьлай бур миннан буллан социал къатри ягу ипотекалул сертификатру, ягу творчествалул зузалтрансса къатри.
Республикалул цумурцагу миллатрал театр кунма, Лакрал театргу хъанахъиссар театрал пространствалий бувагу бусса ца театрну. Ванил дуссар цила тик­рал къашайсса аслийсса лажин, миллатрал мазгу, ттуршукурдай цачIун дурсса рувхIанийшиврул аьдатругу дуручлачисса. Ва мунищала архIал, ччива, дунияллул опытгу лахьлай, ттизаманнул агьулданун тIалавнугу бикIан.

[dropcap]Ч[/dropcap]чива жула театрданул лавайсса даражалул спектакллан эбратну бацIан бансса спектакллу бишин ва ми билаятрал хъуншагьрулул ва европанал сахIнардай кка­ккан бан.
Ахирданий, ччива кIидачIин театрданул дус-ихтивартурал ва тамашачитурал ккуран гьарта-гьарза хъанай душиврия­сса ххаришивугу. Ялув кIицI лавгсса тIайлабацIуртту ва хьхьичIуннайшивуртту тIурча – му жул ххаллилсса коллективрал, творчествалул зузалтрал, цинявппа цехирдал ва къуллу­гъирттал гьунар ва гуж цачIу бивхьусса хъунмасса захIматри.

Ихтилат бувссар
Зулайхат Тахакьаевал