ХIакьину жула республикалий къуртал хъанай дур Дунияллул халкьуннал дянивсса театрал форум.
[dropcap]Ф[/dropcap]орум тIитIлатIисса шадлугърай, Республикалул БакIчинал цIания форумрал хъамал ва гьурттучитал барчагу бувну,
культуралул министр Зарема Буттаевал бувсуна республикалий Театрданул шинал дурсса давурттая.
Зулайхат Тахакьаева
Агьамсса ишруну ванил кIицI лавгунни дунияллул халкьуннал лагрулийсса проектру: Каспий хьхьирил дазуцIухсса паччахIлугъирттал миллатирттал театрдал фестиваль; БРИКС-равун бухлахисса билаятирттал ссихьрал театрдал фестиваль «Волшебный мир театра кукол»; халкьуннал театрдал фестиваль «Аьдатирттал театр»; щалагу Аьрасатнал театрал марафондалул лагрулий Театрданул шинал символ дулаврил эстафета кьамул даву.
Му бакъассагу, республикалул театрду гьуртту хьуну бур цайми регионнай хьусса фестиваллай ва форумирттай.
Министрнал кIицI лавгунни махъсса шиннардий «Культура» национал проектрал лагрулий щалагу билаятрай хъуннасса ва агьамсса къулагъас дуллай бушиву театрдах, цIу буккан буллай бушиву театрдал къатри, хьхьичIуннай хъанай душиву гастроллал даву.
— Вана, Театрданул шин лакьлай, жула республикалий тIитIлай буру ца ттигу хъуннасса мероприятие. На дакI дарцIуну бура ва форумрал даврия хъунмасса мюнпат хьунтIишиврийн театрал магьирлугъ хьхьичIуннай дан, режиссертурал ва актертурал пишакаршиву ларай дан. Цала даврил опыт кIибачIин жула республикалийн хъамалу бувкIун бур, жула билаятраясса бакъасса, Египетнавасса, Сириянавасса, Кьиблалул Кореянавасса, Италиянавасса, Аьрабнал Эмиратирттаясса цIанихсса театрал ишккаккулт, — увкунни министрнал.
Республикалул Национал музейран дуллунни ттигъанну Санкт-Петербург шагьрулий магьирлугърал форумрай хьусса щалагу Аьрасатнал театрал марафондалий гьуртту хьусса 85 региондалул ларсъсса Театрданул шинал лишан.
Муния махъ хъамаллуран яргсса концертрал программа ккаккан дурунни Дагъусттаннал паччахIлугърал филармониялул ва «Дагестан» паччахIлугърал балайлул ва къавтIаврил ансамбльданул солистурал, Опералул ва балетрал театрданул артистурал, МахIачкъала шагьрулул цалчинмур музыкалул школалучIасса оьрчIал театрал студиялул ва “Balletschool_gk” балетрал школалул тарбия буллалисса оьрчIал.
Муния махъ Оьруснал театрданул ЧIивимур залдануву ккаккан бунни Аьрасатнал лайкь хьусса артист Скандарбек Тулпаровлул бивхьусса комедия «Номер 13».
Форумрал лагрулий спектакль ккаккан бансса тIайлабацIу хьунни Лакрал театрданунгу. Ккаккан бунни жучIавагу, чIаххувсса республикарттал шагьрурдайгу хъунмасса тIайлабацIулущал кьамул бувсса Гоголлул «Ревизор» спектакль (режиссер-постановщик, Аьрасатнал халкьуннал артист Руслан Хакишев). Ва кьини театрданун тапшур дурунни Театрданул шинал символ.
Сайки нюжмардул дянив нанисса форумрал лагрулий хьунни режиссертуран ва актертурансса мастер-классру, семинарду, «ккуркки столлу», Аьрасатнал жагьилсса режиссертурал спектакллал презентацияртту.
