Декабрьданул 3-нний Дагъусттаннал БакIчи Владимир Васильев къуллугърал аьрххилий увкIунни Къизлардайн ва хьунаавкьунни ДР-лул Ухссавнилчулийсса округрал районнал ва шагьрурдал Хъунисриннал советрал вакилтуращал.
Хьунабакьаврий ххал диргьунни инсантурал маэшат лахъ бансса приоритет проектру.
Владимир Васильевлул тIимунийну, АьФ-лул Президентнал мунал хьхьичI бивхьусса хъуними масъаларттавасса ца хъанай бур хъинчулийсса дахханашивуртту инсантуран хIисав шаву ва бюджетрал арцу цала ххуллий ишла дуллалаву.
Региондалул каялувчинал ляличIисса къулагъас дунни зузалтрал политикалух. ХьхьичIва цалва мурадирттаха зий бивкIсса пишакартуран кIанай цIана зий бур паччахIлугърал, жяматрал мурадиртталсса буллалими. Мунийн бувну бювхъунни бюджетрал арцу ядан ва закон лиян дуллалаврил хьхьичIалу кьукьин.
Владимир Васильевлул бувсмунийну, Хъунисриннал совет чялишну зий бур ва кабакьлай бур хъинчулийсса дахханашивурттацIун.
Чара бакъа дузал бансса масъаларттавасса цаннун ккаллину бур республика щинал щаллу даву. Къизлардай щин итадакьлай бур ссятрая ссятрайн. Му масъала цалчин ярглий дузал бан аьркинну бур Къизлардай. ЦIанасса ппурттуву муниха зий бур, ялунчIил шагьру щинал дузал бантIиссар, инсантурачIан щин дачинтIиссар хьхьугу, кьинигу. Дагъусттанлувтал щинал дузал баншиврул личIи дурну дур 2 млрд. къуруш, миннува 1 млрд. ва 900 млн. жулла республикалул арцу дур.
Махъсса 20 шинал лажиндарай республикалул агьали щинал дузал бавриха зий къабивкIун бур. Школарттугу бакьин къабуллай бивкIун бур 30 шинай.
Муния махъ ххал бивгьунни школартту баврил ва бух хьуми бакьин баврил масъалагу.
Ххал бигьлагьисса масъаларттал хIакъираву махъ лавхъунни ДР-лучIасса Хъунисриннал советрал председатель Аьбдулла МахIаммадовлул ва Советрал член АьбдурахIман Бексултановлул.
Лажин хIадур дурссар
ХI. Аьдиловлул
