[dropcap]Ц[/dropcap]Iусса дуккаврил шин нирхиравун дагьайхту, лавайми классирттаву дуклакиминнащалсса хьунабакьавуртту дувай вузирдал, дуклаки оьрчIан пиша язи бугьан кумаг буваву мурадрай.
Ва мурадрай Дагъусттаннал паччахIлугърал техникалул университетрал (хьхьичIва ванийн политехнический учайва) преподавательталгу чIун-чIумуй хьунабакьай 10-11-ми классирттаву дуклакиминнащал. Вай гьантрай преподавательтал бивунни Лакрал райондалийн.
П. Рамазанова
Лаккуйнсса делегациялуву бия кьатIаллил билаятирттал мазурдил кафедралул хъунмур Нажават (Жанна) Абуева, информацион мюхчаншиврул кафедралул хъунмур Гульханум Къачаева, прикладная математикалул ва информатикалул кафедралул хъунмур Тамила Исабекова, информацион системардал, финансирдал ва аудитрал факультетрал деканнал хъиривчу, доцент Земфира Раджабова, финансирдал ва бухучётрал кафедралул хъунмур преподаватель Аймисай Къажлаева. Вай цал бивунни райондалул кIулшиву дулаврил управлениялийн, ххал бивгьунни райондалул школарттал техникалул университетращал дахIаву цIакь дувансса чаранну. Яла Гъумучиял школалий 10-11-ми классирттаву дуклакисса оьрчIащалсса хьунабакьаврий вайннал гьарза-гьартану бувсунни цивппа зузисса вузраяту, тарихрая ва хIакьинусса кьинилия. Вайннал маслихIат бунни дуклаки оьрчIан вузрал сайтрайн буххаван ва вузрал оьрмулия бусласисса хаварду Инстаграмрайсса страницалий буккаван. Райондалул хъунаманал хъиривчу Ансар Къажлаевлущал вайннал ххал бунни ванал сипталийну ва хIарачатрайну уттигъанну тIивтIусса музейгу. «Жул кьюкьлуву шанма лакку душ бия, кIива лазгири душ, вай Гъумуча ххаллилсса асардащал зана хьунни. Жугу, гьай-гьай, ххарину, рязийну зана хьуру, амма лазгири душру Гъумуксса аьрххилия укун хIайранну личIаву жунгу тIааьнну бур. Дуклаки оьрчIру итххявхсса бия, гъирарай жу бусласимунихгу вичIилий, суаллу буллай бия, кIукун кIулшивурттал хъирив багьсса оьрчIал дуклан жулвамур вуз язи бугьарча, хъинну хьунссия!» — увкунни Нажават Абуевал.
