[dropcap]У[/dropcap]збакIнал ЖКХ-лул сайки министрну зий ивкIсса Уриннал шяраватусса, хъунмур оьрму, жаваблувсса къуллугъирттай зий,

цал Екатеринбурграй (Свердловскалий), яла Ташккантлив лавгсса МахIаммадов Кьурван-МахIаммад буттал миналий яхъанай ур цIана.

---

[dropcap]Ч[/dropcap]Iирисса зунттал шярава увккун, лахъсса къуллугърай итан лайкь хьунну оьрму бувтссар тIий щия-бунугу бусласийни, циваннив къакIулли, ттун ттула ца язисса буржну чIалан бикIай мукунсса инсаннащал хьунагубавкьуну, жула кказитрайгу чIивину-хъунну чичин.

 

Залму АьбдурахIманова
Уттигъанну Лаккуя ттула ниттил ссурахъищал, жула Мукьархъиял махIлалийсса Урувусса уссурссунначIангу бувххун, нанийни: «Шиччагу УзбакIнал ЖКХ-лул сайки министрну зий ивкIсса инсан увкссар», — куна ттухь ниттил ссурахъил.
МахIачкъалалив бувкIун махъ ччясса мутталий ттулва «бурж» биттур бан хIарачат бувссия. Икьрал дурсса куццуй, жу лавгссияв гайнначIан хъамалу. Макьала чичин ттувунма гъира бувтсса Уриннал шяраватусса, хъунмур оьрму, жаваблувсса къуллугъирттай зий, цал Екатеринбурграй (Свердловскалий), яла Ташккантлив лавгсса МахIаммадов Кьурван-МахIаммад цала кулпат Лидия Афанасьевнащал Ватандалийн занагу хьуну, цIана ялапар хъанай бур, Сулакьрая най, МахIачкъалалив буххавайсса кIанай, вайннан кIиннанмагу ххирасса Каспий хьхьиричIан гъанну.

Жу хьунагубавкьунав, къатлул залуннал бакъассагу, жу кунма, га кьини хъунама уссичIан хъамалу бувкIсса, уссу Аьбидинал ва ссу Муслиматлул. Вайннал буттал Халидлул Урувун кулпат ЗугьрачIан ва гъан-маччаначIан чивчусса чагъарду бивщуну бу­ссия жул кказитрай 2015 шинал, Ххувшаву ларсун 70 шин хъанахъисса иширан хасну. Дяъвилул майданнив личIан нясив хьурчагу, буттахсса кIялабарз арсваврал бивщуну буссар щарнил хIатталлив.

Увну ур Кьурван-МахIаммад 1936 шинал Уруву. Шяраву 8 шинал школагу къуртал бувну, цала кулпатрал кьадардануцIун бавхIусса Свердловскалийн лавгун, ливчIми кIива класс тикку къуртал бувну бур. Дук­лангу увххун ур Свердловскаллал политех институтравун строитель-инженертал хIадур байсса факультетрайн. Дуккаврищал архIал спортрахунгу агьну, шагьрулул личIи-личIисса бяст-ччаллай гьуртту шайсса ва хьхьичIунсса кIанттурдан лайкь шайсса, зирангсса ва тивтал­сса жагьил ивкIун ур.

Студентну уна ваная хьуну ур спортрал мастер. Лахъми курсирдайн ив­сса чIумал, ххуйну дуклакисса Кьурван-МахIаммадлуйн оьвкуну бур шагьрулул БТИ-лий отделданул хъунаману зун. 1976 шинал ва Свердловскаллал горисполкомрал управлениялий хъунама инженерну ивтун ур. Кьурван-МахIаммадлуйн, хьхьичIунсса пишакар хIисаврай, оьвчайсса бивкIун бур Свердловскаллал областьрал 1-ма сек­ретарь Борис Ельцингу гьур­ттусса хъунисса батIавурттайн.

Б.Ельциннул каялувшиврулусса Свердловскаллал область тани ца яла хьхьичIунсса областьран ккаллину диркIун дур. Микку зий уна Кьурван-МахIаммадлул, Халкьуннал хозяйствалул институтравун увххун, экономистнал пишагу лавхьхьуну бур. Тиккува кIул хьуну, ванал цанма щарну бувцуну бур архитекторну зий бивкIсса Лидия.

Дянивмур Азиянаву лахъсса къуллугъчитурал кьюкьри «лулттурасри ласултрая» марцI дуллалисса 80-ку шиннардий УзбакIнаву хъинну биял къа­хъанай бивкIун бур ЖКХ-лул аралуву зунсса, за кIулсса пишакартал. Щала Союзрай ххал увну 8 инсан, миннавух Кьурван-МахIаммадгу, тIайла увккун ур УзбакIнавун. Ванал даврил сантирая гьарзат хъирив лавну кIул бувну, Кьурван-МахIаммад Ташккантуллал ЖКХ-лул каялувчинал хъиривчуну ивтун ур. Ва къуллугърай Кьурван- Ма­хIаммад зий ивкIун ур 1987 шиная 2012 шинайн ияннин.

КIивагу шагьрулий зий бивхьу­сса захIматрахлу ванан ду­ллусса наградарттал, барчаллагьрал чагъардал, ХIурматрал грамотарттал тасттикь буллай бур Кьурван-МахIаммад «кабинет­рал» къуллугъчи къаивкIшиву. Кьурван-МахIаммадгу Таш­ккант­лив кьаивтун, ванал кул­пат Лидия Афанасьевна МахIач­къалалив бувкIун, цалла дуллалисса къатрал дузалшиннагу дурну дур. Дагъусттаннайн, уссур­ссу бунийн арс зана хьуну ччай бивкIун бур дугьара хьусса ванал ниттин Зугьрангу. Таш­ккантлия Ватандалийн нани­сса чIумал, Кьурван-МахIаммад ва Лидия тIайла буккан бувккун бивкIун бур щала министерствалул коллектив, чIахху-чIарахми ва вай кIулми.
«Архсса шагьрулий къуллугърай зузийни жула ватанлувталгу гьурттусса ишру шайвав?» тIисса ттул суалданухун Кьурван-МахIаммадлул бувсуна ца укунсса ишгу.

Цув ура тIар цала кабинетраву чагъардаха зий. Нузай «МахIаммадов» тIий чивчуну ххал хьуну, ялун увххуна тIар, «Ассалам аьлай­кум!» тIисса, лахъ-лахъсса жагьил. Ургарча, га лявкъуну ур жула Да­гъусттанная тихун зун тIайла увксса, цувагу ЧIурттащатусса, жагьил­сса хIакин, даврия хъинну ар­хну яхъанансса къатта бу­ллай, гъансса кIанай цан къатта багьан бан къабучIиссарив учин Жилуправлениялийн увхсса. Мадара хIаллай яхши-хашгу бувну, Ватандалиясса хавардахгу вичIи дирхьуну, Кьурван-МахIаммадлул ганал мурад щаллу бансса чаран лявкъуну бивкIун бур.
Чув, ци къуллугърай зурчагу, Кьурван-МахIаммад мудангу цала принципру дуру­ччайсса, яхI-къирият хьхьичIунну къуццу буллай ивкIун ур.

МахIачкъалалив ивзун махъ, цаппара хIаллава ванайн оьвкуну бивкIун бур ДР-лул Строительствалул ва ЖКХ-лул министерствалий зун. Гиккусса даврил низамрай дакI къадаркьу­ссияв, ягу гиччаллил хIалкьазия ваналми тIалавшиннардая арх­сса бивкIссияв, хъунма хIал къалавгун, кьадиртун дур га даву.
ЦIана тIурча, цIуллу-сагъ­шив­рул ивтни, хьхьирийнгу занай, махъунайгу укIлай, щарнил жяматрал, кIулминнал дянив кьимат-иззат ххину ялапар хъанай ур.
ЦIуллушиву дулуннав, Кьур­ван-МахIаммад ва Лидияй, зу­хьхьун! Екатеринбурграй яхъа­нахъисса зула арсная, мунал оьрчIая тирхханну ккакканнав!