[dropcap]Н[/dropcap]оябрьданул 26-нний «Дагестан» РИА-лий «Мой Дагестан – Комфортная городская среда» приоритетсса проектрал ялув

бивтсса жяматийсса вакил Рукьият АхIмадовал пресс-конференция хьунни.

---

З. АьбдурахIманова
КIицI бунни ванил цила ихтилатраву ва проект билаятрал Президент В.Путиннул майрал ХIукмурдавасса ца яла хьхьичIунмурну душиву.
— Жулла республикалий проект щурущи дурну дуссар республикалул БакIчи В.Васильевлул къулагъасралу. Ванил лагрулий, шагьрурдал ва щархъал кучарду, майданну, къатрал хьхьичIсса хIаятру дакъасса, бакьин буллай буссар ххуллурду ва бихьлай буссар щинаххуллурду, -кунни Р. АхIмадовал.

Гьашину жула республикалий бакьин бан ккаккан бувну бивкIссар 228 кIану: 14 хIаят ва 214 агьали бигьалагайсса, щябикIайсса кIанттурду. Вай давурттугу дурну, ххи лирчIми арцухгу хIукму хьуну бур ялагу 7 кIану (майдан, куча, хIаят) бакьин бан. Шиккува кIицI бан, циняр вай давурттан итадаркьуну дур 1 миллиард ва 1 миллион къурушрал. Вайннува 991,151 млн. федерал бюджетрава итабавкьуну бур, 10,01 млн. – республикалул бюджетрава ва 47 млн. – муниципал бюджетирттава.

— ХIакьинусса кьининин сайки 700 миллиондалунсса давуртту дурну дур. Цала къатрал хьхьичIсса хIаят дакьин дурну ччисса, цала оьрчIан тIуркIу тIунсса майдан бувну ччисса гьарцагу инсаннаща бюхъай­ссар, аьрза чивчуну, тIайла бу­ккан цала-цала муниципалитетирттайсса ЖКХ-лул управлениярттайн, ягу тIайланма районнал бакIчитурайн.

Аьрза чичиншиврул ду­ссар итадаркьуну стандартрайсса бланкру. ДуцIин дурну ми бланкругу, дартIун чIаххув-чIарахнаясса къулбасругу, тIайла буккан аьркинссар ялув кIицI бувсса кIанттурдайн. Ца зурул мутталий хасъсса коми­ссиялул, зул аьрзри ххалгу бивгьуну, зухьхьун жаваб дулунтIиссар та, ци чIумал щаллу буллай байбишинтIиссарив зул мурад, — кунни журналистътурахь Р. АхIмадовал.

Пресс-конференциялул ахирданий журналистътурал, цинявннал ца зумату кунмасса, суалданухьхьун: «Жул Издательствалул хьхьичIсса майдан бакьин бан бур. Жуща бюхъайссарив зучIан аьрза чичин?» — кувкун, ванил жаваб дуллуна: «Бюхъайссар. Чичара аьрза ва агьалинахьгу бусира ва проектравух гьуртту хьира куну. ЧIявусса халкьуннан кIулну ба­къар, ягу вихну бакъар, укун­сса давуртту республикалий щуруй душиву. Гьарцаннахь ихтияр дуссар цанна ххуйсса, къулайсса шартIру тIалав дан».