Райондалул бакIчи хьунаавкьунни лакрал студентътуращал

«Лакрал райондалул бусравсса инсан» тIисса лишан

Рязину ливчIунни хьунабакьин бувкIмигу, лув лявкъумигу

«ВУЗ-РЕГИОН» проектрал лагрулий ттигъанну Дагъусттаннал паччахIлугърал медуниверситетраву хьунни Лакрал райондалул бакIчи Юсуп МахIаммадовлущалсса хьунабакьаву.

Муний гьуртту хьунни ДГМУ-лул ректор Сулайман Маммаев, культуралул министр Зарема Буттаева, Лакрал райондалул бакIчинал хъиривчу Абакар Къюннуев, райондалул азарханалул хъунама хIакин АьвдурахIин Дибиров, «Илчи» кказитрал хъунама редактор Руслан Башаев, университетрал аьлимтал, зузалт, Лак­рал райондалия бувксса студентътал ва ординатортал.

З. Тахакьаева
Хьунабакьаву дайдишин хьхьичI хъамаллурал ххал бунни медициналул университетрал музей.
Хьунабакьаврил бакIрай Сулайман Маммаевлул бувсунни ДГМУ-лул жагьилтурал комитетрал сипталийну буллалисса «ВУЗ-РЕГИОН» проект­рал хIакъираву. ДакIнийн бивчунни Дагъус­ттаннал цIанихсса хIакинтураву хьхьичIунсса ххуттай бивкIсса Лакрал райондалия бувк­сса хIакинтал – цал цIарду цахлура цирда гъалгъа тIутIисса: Хайруттин ХIажиев, Наби ЦIаххаев, Дибир Дибиров, Аскандар Масуев ва м.ц. Бувсунни хIакьину зузисса хIакинтураягу: АхIмад Хасаев, ХIусайн ХIусайнов, ХIажи ХIажиев, МахIаммад Минкаилов, ТIагьир ХIусайнов ва м. ц.. КIицI лавгунни жагьилсса хIакинтурал дянивгу ялун буклай бушиву гьунар бусса специалистал.

[dropcap]З[/dropcap]арема Буттаевал чIурчIав дурунни Дагъусттаннал цIуллу-сагъшиву дуруччаврил бушиву авадансса тарих. Му тарих чивчуминнал хъирив лайкьсса варисталгу ялун буклай бушиврийн умуд бихьлай, чIа увкунни студентътуран тIайлабацIу.
Юсуп МахIаммадовлул дакI­нийн бувтунни Лакрал райондалия бувксса студентътуращал­сса хьунабакьавуртту уттинингу хьуну диркIшиву Гъумук ва МахIачкъалалив хъуннасса шадлугърал лагрулий, ххал бивгьуну бивкIшиву буттахъал миналийн зана хьун ччисса студентътал давурттал дузал баврийн багьайсса мурадру.

Макьаева Умамат Апаннинал душ дуклай бур 6-мур курсирай. Хирургиялул практика лархьхьуну дур Китайнал ва Сербиянал хьхьичIунсса
клиникарттай.

Бувсунни муния махъ зий байбивхьуну бивкIшиву жагьилтал ватандалийнмай кIункIу хьуншиврул миннан къулайсса шартIру дузал давриха.
Райондалул бакIчинал бувсунни мукунма махъсса шиннардий райондалий дурсса, дуллалисса ва кутIасса чIумул мутталий дан дакIнийсса давурттая. Миннул дянивгу хьхьичIун ласунмину кIицI лавгунни Европанал даражалийсса ххуллурду, Ух­ссавнил Ккавкказнаву хIакьинусса кьининин миннущал архIал бишин­сса бакъасса кьяйдалийсса кIива ламу. КIицI лавгунни лакрал миллатрал барткъалагайсса хиялну хьусса газ буцаврил буру­ккингу ахиргу ца чулийн багьну бушиву ва ялун нанисса шинал дайдишинтIий душиву мунил ялувсса давуртту.

ЦIуллу-сагъшиву дуруччаврия буслай, кIицI лавгунни АьвдурахIин Дибиров райондалийн увкIния махъ чIаланну ларай хьушиву цIуллу-сагъшиву дуруччаврил тагьар. «Агарда хьхьичIва Лакрал райондалул къашайшалт шагьрулийн занай бивкIхьурча медициналул кумаграл хъирив, утти чIаххувсса Ккуллал, Ахъушиял, Къарабудахккантуллал районная, хIатта Аьрасатнал шагьрурдаягума букIлай буссар Лакрал райондалул азарханалул цIа дургьуну», — кунни Юсуп МахIаммадовлул.

Гъумучатусса Биячуева Лариса Аьдиллул душ дуклай бур 6-мур курсирай. Хирургиялул практика лархьхьуну дур Германнаву. Гьуртту хьуну бур Аьрасатнал шагьрурдай хьусса личIи-личIисса конференциярттай.

Цаламур мукъуву Аьв­дурахIин Дибировлул аьщуйн щуну бувсунни райондалийсса цIуллу-сагъшиву дуруччаврил тагьардания, бувсунни щала билаятрай щурущисса программардая, миннуя хасну Лакрал райондалул азарханалун цуксса мюнпат хьуссарив, хIакьину азарханалун цуми пишакартал аьркинну бу­ссарив. Гьарза-гьартану бувсунни «Земский доктор» тIисса программалул хIакъиравугу.

Жагьилсса хIакинтуран мас­лихIатру буллалисса ихтилат­ру бунни жула медициналул пат­риархтал ХIажи ХIажиевлул ва ТIагьир ХIусайновлул.
Ихтилатирттая махъ ректорнахь ва Лакрал райондалул бакIчинахь студентътал цIухлай бия «Земский доктор» программалия, райондалийн зана хьун ччисса жагьилсса хIакинтал давурттал щаллу баврия, миннан­сса оьрмулул шартIру дузал даврия. Юсуп МахIаммадовлул бувсунни цIуну буллалисса азарханалул проектрай ккаккан бувну бушиву райондалийн зун бувкIсса пишакартал зузиссаксса чIумул мутталий яхьунсса ацIва квартира буван.
Муния махъ Юсуп МахIамма­довлул Сулайман Маммаевлул хъазамрайх бувтунни «Лакрал райондалул бусравсса инсан» тIисса лишандалул лента.

Дуккавриву хьхьичIунсса ва жяматийсса оьрмулуву чялиш­сса гьурттушинна дуллалисса студентътуран дуллунни райондалул администрациялул чулухасса ХIурматрал грамотартту ва арцуйнусса бахшишру.
Ххуйя, ххаллилъя му хьунабакьаву, ххишала бакъа рязину ливчIунни хьунабакьин бувкIмигу, лув лявкъумигу.