[dropcap]Д[/dropcap]екабрьданул 14-нний Буйнакскалийн къуллугърал аьрххилий увкIсса ДР-лул БакIчи Владимир Васильев хьунаавкьунни ДР-лул Централ

ва Зунттал округирттал районнал ва шагьрурдал хъунисриннал советирттал вакилтуращал. Хьунабакьаврий гьур­тту хьунни мукунма «Машук-2019» форумрал грантирттал конкурсрай ххув хьуми.

---

[dropcap]Б[/dropcap]атIаврий ххал диргьунни Дагъусттаннай бартдигьлагьи­сса приоритетсса проектру.
Владимир Васильевлул бувсунни республикалий хъанахъисса дахханашивурттал хIакъираву. Мунал тIимунийну, хIакьинусса кьини ми ишир­ттавун хIала буххан буван аьркинссар оьрмулул бугьарами инсантал, миннал аькьилшивугу, давуртту дуван кIулшивугу хIисавравун ларсун. Цаппара хIасиллугу дурну, мунал кIицI бунни дурсса давурттан хъин чулийсса кьимат бивщуну бушиву республикалул ва федерал даражалий.
Ихтилатру бунни ДР-лул БакIчиначIасса Хъунисриннал советрал председатель Аьбдулла МахIаммадовлул ва мува идаралул член Сайгид Кьурбановлул.

Дагъусттаннал социал-экономикалул лябуккулул иширттал хIакъираву махъ лавхъунни ДР-лул ХIукуматрал 1-ма вице-премьер ХIажимахIаммад ХIусайновлул. Мунал тIиму­нийну, 2020 шинал бюджетрал лагру хьунтIий дур 139 млрд. къурушрал. 2018 шинал бюджет бивкIссар 100 млрд. къурушрал. ЯлунчIил учительтурал, духтуртурал, тарбия бувултрал харжру лахъ бантIий бур 9 процент­рал, гьашинумуних бурувгун. ЯлунчIил лахъ бантIий бур яла чIивимур харжгу, му бикIан най бур 12 азарда къурушрая ливчу­сса. Му мукун буван бюхъантIий бур налогру гьарзану дучIан дуван бюхълай буну тIий ва Республикалул БакIчинал сипталийнусса проектирдан федерал бюджетраватугу кумаг бан най буну тIий. ЯлунчIил дучIан дантIий бур 45,5 млрд. къуруш налогирттал. Хъунмур къула­гъас дикIантIий дур дуккаврих ва цIуллушиву дуруччаврих.

«Ттул Дагъусттан» тIисса шанма бутIуя сакин хьусса проект бартдигьаврил хIакъираву бувсунни ми проектирдал (щинал дузал баврил, ххуллурду баврил ва къулайшинну дусса шагьрулул кIанттурдал) жяматийсса координатортурал.
«100 школа» тIисса проект­рал давуртту нанаврия бувсунни ДР-лул экономикалул министр ХIажи Султановлул.

Хьунабакьаврий ихтилатру бунни мукунма республикалул шяраваллил хозяйствалул ва бакIлахъиялул министр Абзагьир ХIусайновлул ва цаппара хъунисриннал.
Ахирданий Дагъусттаннал БакIчинал вичIи дирхьунни хъунисриннал чулухасса тавакъюрдах ва миккура дурунни цаппара идарарттал каялувчитурайн­сса тапшурлугъругу.