Декабрьданул 10-нний хьусса пресс-конференциялий ххал бивгьунни «Ишбажаранчишиву машгьур даву» тIисса федерал проект дузрайн дуккан даврил масъала.

ДР-лул Ишбажаранчишиврул ва инвестициярттал агентствалул каялувчинал хъиривчу ХIажи-мурад Абашиловлул тIимунийну, «Ишбажаранчишиву машгьур даву» (популяризация предпринимательства) тIисса федерал проект духлай дур «ЧIиримур ва дянивмур ишбажаранчишиву ва цувалу зузисса ишбажаранчинал сипталун кабакьаву» тIисса национал проектравун.

Ми­ккун чIявусса да­гъусттанлувтал кIункIу бувансса мурад бур.
Федерал проект дузрайн ду­ккан даву мурадрай, гьашину республикалий тамансса давуртту дурну дур ишбажаранчиталгу хIала-гьурттуну. Ми давурттаву хъунмасса кIану бугьлай бур Республикалул ишбажаранчитуран кумаг байсса центрданул», — увкунни ХI. Абашиловлул.

«Ишбажаранчишиврул фабрика» тIисса проектрал каялувчи МахIаммад Кьурбайтаевлул тIимунийну, хIакьину республикалий бартдигьлай бур 3 программа: «Фабрика-ОьрчIру», «Фабрика-Старт» ва «Фабрика ПРО». Дук­лаки оьрчIансса ва студентътурансса Ишбажаранчишиврул олимпиада дуллай бур декабрьданул 3-19-нний.

Цалла бизнес дайдишин ччиминнан дайдирхьуссар «Фабрика-Старт» тIисса программа. ЦIанасса ппурттуву микку пиша лахьлай бур сайки 500 инсан. Ми­кку дарс дихьлай бур цIа дурксса уссал усттартал, компаниялул гьану бивзма, «Декарт медиа» тIисса вет-студиялул заллу ва мукунма цаймигу.