Жу хьхьичIмур номерданий кIицI бувну буссия сессиялий кьамул дурну диркIшиву «2020 шинайнсса ва пландалий ккаккан
дурсса 2021 ва 2022 шиннардийнсса республикалул бюджетрал хIакъиравусса» закон.
Му закондалул хIакъираву аьщу-ххуттай авцIусса доклад бунни ДР-лул ХIукуматрал Председательнал цалчинма хъиривчу ХIажимахIаммад ХIусайновлул. Мунал тIимунийну, закондалул проект цалчин дурккун махъ республикалул каялувчинал дурну дур 4 тIайла дацIан даву (поправка), мукунна Халкьуннал Мажлисрал депутатътурал чулуха дурну дур 33 лабизаву. Муния махъ ялун нанисса шинал бюджетраву налогирттал доходирттал лагру гьарза хьуну дур 2,6 млрд. къурушрал ва ми хьуну дур 33,2 млрд.
Миннуяр ххишалагу, федерал бюджетраватусса арцуйнусса кумаггу лахъ бувну бур 10,5 млрд. къурушрал. Миннувату дотацияртту дур 7,9 млрд. субсидияртту ва субвенцияртту – 2,6 млрд. Мура чIумал межбюджет трансфертру чан хьуну дур 20,7 млн. къурушрал.
Республикалул бюджетрал аьмсса доходирттал лагру дур 138,5 млрд. къурушрал. Цалчин дурккусса чIумал диркIссар 125,3 млрд.
Харжлугъругу тIайла дацIан дурния махъ хьуну бур 138,5 млрд. цалчин дурккуну махъ бивкIун бур 129,9 млрд. Ялун ххину дуркIсса доходру тIайла дацIан дурну дур хьхьичIра диял къархьуми кIанттурдайн ва социал масъалартту чулийн буккан буван.
Му документ ххал бигьлагьисса ихтилатру бунни шанмагу фракциялул депутатътурал – Дагъусттаннал парламентрал цалчинма вице-спикер СайгидахIмад АхIмадовлул, вице-спикертал Камил Давдиевлул, МахIмуд МахIмудовлул.
Мува масъалалул хIасиллу даврил хIакъиравусса ихтилат бунни Парламентрал спикер Хизри Шихсаэдовлул.
Сессиялий ххал бивгьунни цаймигу масъалартту.
Лажин хIадур дурссар
ХI. Аьдиловлул
