ЦIуссалакрал райондалий арулла шяраваллил школарттай тIивтIунни «Точки роста» тIисса цифрардал ва гуманитар профиллал центрду.
ДакIнийн бутанну «Точки роста» федерал проектравун бавгьушиву ДучIиннал 2-мур, ЦIуссаккуллал 2-мур, Чапаевкаллал 2-мур, ЦIуссачIурттащиял 2-мур, ЦIуссалакрал, ТIюхчардал ва ЦIуссамихилтIиял школартту.
Имара Саидова
Ва проектрал лагрулий ялув кIицI лавгсса школартту дузал бувну бур уттизаманнул оборудованиярттал: интерактив улардал, 3D принтердал, квадрокоптердал, фотоаппаратирттал, видеокамерарттал ва цаймигу кьай-кьуйлул.
Центрду тIитIлатIисса мероприятиярттай гьуртту хьунни ЦIуссалакрал райондалул бакIчинал буржру биттур буллалисса ХIажи ХIажиев, кIулшивуртту дулаврил управлениялул хъунмур Светлана Къудаева, райондалул шяраваллал бакIчитал ва кIулшивуртту дулаврил идарарттал каялувчитал.
Укунсса Центрду тIитIаврийн бувну хъунмасса кумаг хъанахъиссар школарттай творчествалул давуртту, проектру ва цаймигу цIушиннарду дачин даврин.
Центрдал агьаммур мурадгу хъанахъиссар щархъавусса школарттай шагьрурдайсса школарттай куннасса шартIру дузал даву ва ми кувнния кув арх буцан къабитаву. Микку давуртту дачин дуллантIиссар хасъсса программарттай зун хIадур бувсса лавайсса даражалул педагогтурал.