Медаллу дуллунни жул корреспондентътурангу

[dropcap]Н[/dropcap]овостройрай администрациялул къатраву хьунни Дагъусттаннал аьрщарайн ххявхсса террористал бат бувну 20 шин шаврицIун бавхIусса мажлис.

Андриана Аьбдуллаева
[dropcap]Ш[/dropcap]икку шадлугърал даражалий юбилейрал медаллу дуллай бия 1999 шинал ЦIуссалакрал райондалий дяъвилул ишру нанисса чIумал кьини дурксса халкьуннал чIарав бавцIусса, кумагру бувсса инсантуран. Наградар­тту дуллай ия Дагъусттаннал ХIукуматрал Председатель Рамазан ЖахIпаров.

Мажлисрай гьуртту хьунни ЦIуссалакрал райондалул бакIчинал буржру чIумуйну биттур буллалисса ХIажи ХIажиев, ЦIуссалакрал райондалул бакI­чинал хъиривчу Аьли Исрапилов, Жяматийсса ишккакку Сиражуттин Илиясов.
Тай дяъвилул иширттая, террористурайн данди бавцIуну, къучагъшиврий жанну дуллусса вирттаврая гьарта-гьарзану чичлай, жяматрахь буслай бивкIун тIий, юбилейрал медаллан лайкь хьунни «Илчи» кказитрал журналистал – Андриана Аьбдуллаева, ПатIимат Рамазанова, «Дагестан» ГТРК-лул лакрал вещаниялул редактор Тамара Закарьяева (тай шиннардий «Илчи» кказитрай зий бивкIсса).

Медаллу ларсъминнавух бия М. Илиясовал цIанийсса ихIсандалул фондрал вакилтал – Светлана Юсупова ва Гулизар Султанова.
Жунма дакIнийссар, дяъвилул ишру нанисса чIумал жула «Дараччи» клубрал президент Мариян Илиясовал (аьпа баннав), МахIачкъалаливссагу, районнайссагу хъами лагма лаган бувну, хъуннасса даву дурссия кьини дурксса инсантуран кумаг буллай.

Тани ЦIуссалакрал чIарав ххуйну бавцIуссия щалагу Илиясовхъал кулпат. Сиражуттин Илиясовлул каялувшиндарай лагма лавгссия чIири-хъунсса каши дусса, махъ нанисса лакрал, Дагъусттаннал чиваркI. Юбилейрал медаллу дуллунни ва кьини Морис ва Марат Илиясовхъан, Аьли Исрапиловлун, ЦIуссалакрал ЦIуминалийсса азарханалул (№1) хъунмур Булбул Исрапилован, МахIачкъала шагьрулул Кировский райондалул администрациялул зузала ПатIимат Зайдиеван, Жамал МахIаммадовлун, АьвдурахIман Адамовлун, ХIасанхIусайн Камаловлун, Мирза Давыдовлун, Аьли Аьлиевлун, Манап Кабиевлун, тани Чапаевкаллал ополчентурал хъунаману ивкIсса Исрапил МахIаммадовлун, ХIасан Айгуновлун, АхIмад Нахаевлун ва чIявусса цайминнангу.
Барча тIий буру цинявнахь лайкьсса наградартту.