Булуххияра Къяннал библиотекалувун

Аьишат Саэдова

[dropcap]Л[/dropcap]у, кказит, журнал бивщусса чIапIаяту нани­сса нахIусса кьункьачIан дияйсса кьанкь, гьай-гьай, ком­пьютердануцIа къадикIай.

ТIайлар, чIунну цила бущилий най, инсаннал оьрмугу хъиннува анавар бувккун най бур. Инсан ясир увну ур техникалул. Жула учалагу бур: «Анавар­сса щин хьхьирийн къадияй­ссар», тIисса.

Мунияту жува, анавар къабувккун, дуллалимур, кIул хьун ччимур личIлулну дуллан багьлай бур. Муна му личIлулну дайсса инсаннал ца яла агьаммур давунугу хъанан дикIай кIулшиву ласаву. Му кIулшивручIансса ххуллул дайдихьу школалий­сса партардая най духьурчагу, кIулшивуртту гьарта-гьарза даврил ххуллий тIурча, библиотекалул хъинну хъунмасса кIану бугьлан бикIай.

Хъинну кIанийн бувтун бакьин бувсса библиотека бур Къяннал шяраву. Ва цуппагу бур шяраваллил администрациялул къатрал кIилчинмур зивулий. Шикку ва библиотекалул хъунмурну зий бур Саэдова Аьишат. Уттигъанну, Бугьараминнал кьинилун хас бувсса мажлисрайн лавгун унува, на увхссияв кIа биб­лиотекалувун.

Цалчинмур къатлул чIир­ттай лархъун дия Хъун дяъвилул вирттаврал суратру. Дия хъаннил кьинилун, Расул ХIамзатовлун, лакрал чичулт­ран ва шяраваллил культуралул иширттан хас дурсса личIи-личIисса стендру. Бия Мариям Ибрагьимовал чивчумур жям буллалисса 15 томрай сакин бувсса луттирдугу. Вай цала шяравасса ХIажимахIаммадов Энгельслул бахшиш бувшиву бувсуна Аьишатлул. Цила столданул чIаравгу дия лакрал буккултран хъинну кIулсса, Къяннал шяраваллил арс Мязайхъал Казбеклулмур суратгу.

Аьишатлул бувсуна гьашину 9 зурул мутталий буллуну бушиву цила шяраваллил бу­ккултрахьхьун 4000-ннийн бив­сса луттирду. Муданма луттирду ласласисса, ккалаккисса инсантурал сияхIгу дусса дия 90-ннийн дирсса.
КIилчинмур къатлуву бия хъинну лазилавкьуну дахиллай бивхьусса луттирдал ххазина. ЦIуллу баннав ина, Аьишат, вила даву дакIнихтуну дуллай, инсантурал дянив луттирдал ва кказит-журналлал сий ххишала дуллалисса. Булуххияра Къяннал библиотекалувун.