Дагъусттаннайгу чирчуссар этнографиялул диктант

[dropcap]Н[/dropcap]оябрьданул 1-нний, халкьуннал Цашиврул кьинилун хасну, билаятрал кьатIувгу, жула регионнайгу «Хъуннасса этнографиялул диктант» чирчу­ссар. Ва хIисавссар халкьуннал дянивсса акциялул лагрулий дур­сса даврин.

З. АьбдурахIманова
Диктант чирчуну дур дунияллул 38 билаятрай оьрус маз кIулсса, личIи-личIисса диннал ва шиннардил оьрмулувусса халкьуннал.
Дагъусттаннайгу му кьини диктант чирчуссар 58 майданнив.

Сайки 1000-ксса инсан увкIун ия этнографиялул элмулуву цанма ци кIулну бурив ххал бан МахIачкъалаливсса Дусшиврул къатлувун. Гьурттучитуравух бия студентътал, элмийсса пишакартал, жяматийсса ишккаккулт, хIукуматрал къуллугъчитал ва политиктал.

Диктант чичин увкIминнавухсса ДР-лул ХIукуматрал Председательнал хъиривчу Анатолий Карибовлул, цинявннан тIайлабацIугу чIа увкуну, кIицI бувна шиная шинайн укунсса журалул акциярду машгьур хъанай душиву ва вайннул мурад, кIулшивуртту тикрал дан­сса, цIакь дансса бакъасса, агьали цанначIан ца гъан банссагу, дусшиврул гьану бизанссагу бушиву.

Диктант дия тестрал журалийсса. Тест сакин бувнугу бия 30 суалдания. Жула республикалуцIун бавхIуми суаллу бия халкьуннал ххазинарттая, щархъая, миллатирттал касмурдая цIухлахисса. Мисалдаран, бия суал, дагъусттан агьулданул бакъухъ байни ци ишла дувайссар тIисса, оьргърал чIюлушиннарду, ярагъ ссаяту байссар тIисса ва цаймигу.

Дагъусттаннал миллатир­ттацIун, щархъацIун, тIабиаьт­рацIун бавхIуми суаллахьхьун бигьану жавабру дулун хъанай бивкIхьурчагу, къабигьану бия чIявуми гьурттучитуран Архмур Востокрайсса, Камчаткалий­сса мюрщи миллатирттал багьу-бизулуцIун бавхIуми суаллахьхьун жавабру дулунгу.

Ва ишгу ялун-тулун сакиншинначитурал хIисавравун ласун бучIир.
100 балл ласуншиврулгу циняв суаллахьхьун жавабру дулун багьлай бия.