Уттигъанну Каспийскалий хьунни аьралуннаву къуллугъ буван нанисса жагьилтал тIайла буклакисса шадлугърайсса батIаву. Жагьилтал тIайла буккан,
миннахь насихIатрайсса ва ххуллухъиндарайсса махъру учин бувкIун бия шагьрулул администрациялул, жяматийсса сакиншиннардал ва личIи-личIисса идарарттал вакилтал.
Бадрижамал Аьлиева
Шадлугърайсса митинг тIиртIуна шагьрулул аьрали комиссар Геннадий Кьурбановлул.
— Ххирасса оьрчIрув! Цалчин, зува къуллугъ буллалисса чIун гьан дувара зулла цIуллу-сагъшиврун шайссаксса хъунмасса мюнпат буну, зулла дакIурдил хIал шайссаксса цIакь ва лавай хьунну.
Гьарцагу аьрали бутIуву буссар спортзал, зулла тархъансса чIун гьан дулувара миву. ДакIний битияра му шинал дянив зува бивзсса гьану гихунмайсса оьрмулувугу зунма хъинну бучIи лякъинтIишиву. Хъамамабитари зува чIяву миллатру, чIяру динну дусса коллективравун нанишивугу. ДакIний битияра Зал ца ушиву ва хIурматрай бурган аьркиншиву цайми диннал тIалавшиннарду щаллу дуллалисса инсантурахгу.
Шаппа зул хъирив ниттихъал, ссурваврал марцIшиву дувайсса диркIхьурча, аьралуннаву зула хъирив зувару лакьлан аьркинсса, зун марцIшиву дуллан цаманай бурж бакъассар. Ци тагьар дунугу, гьарцагу ишираву ссавур дуну къуццу тIутIияра, цукунчIавсса провокациярттайх къалавгун, хъяврин хьун къабивкIун. Хъун дяъвилул шиннардийсса Совет Союзрал вирттаврал ккал хIисав дурну, Дагъусттан цалчинсса кIанай бушивугу хъамамабитари, гай вирттаврал цIардан лайкьну къуццугу тIутIияра, — увкуна Геннадий Шихаьлиевичлул.
Гихунмай ихтилатру бувна шагьрулул администрациялул бакIчинал хъиривчу Руслан МахIмудовлул, «Аьрасатнал ниттихъул» тIисса суккушиндарал Региондалулмур отделениялул председатель Таиса МахIаммадовал, Ветерантурал советрал председатель Тажуттин Чимаевлул, аьрали къуллугъ буллалиминнал буттахъал комитетрал председатель Залимхан Аьлиевлул ва м.ц.
Къуллугъ буван нанисса жагьилтуран буллуна аьрали билетру ва хъамакъабитулунсса бахшишру.
Шадлугъ чIюлу дурна «ЧIава аьралитал» тIисса кьюкьлувасса оьрчIал ва ОьрчIал творчествалул къатлуву тарбия хъанахъиминнал.
