Дагъусттаннай МФЦ-ду тIивтIуния махъ, ялун чIалай хъинну бигьа хьунни жяматрал аьркинлугъру щаллу даврил масъалартту.
Ккуллал райондалий МФЦ тIивтIуссар 2012-ку шиналва, цуппагу Дагъусттаннал зунттавусса районнаву цалчинминнувух.
Уттигъанну на хьунаавкьура Ккуллал райондалул МФЦ-лул хъунама Пидуриев Илдар Аьлил арснащал. Цала идаралул даврия ванал бувсуна укун:
— Жу щаллу дувайсса аьркинлугъру украссар. ТIивтIуния шинмай, ца шиная гамунин гьарза хъанай, хIакьинусса кьини жуща бюхълай бур инсантуран аьркинсса 400-нийн дирсса хIаллихшиннарду щаллу дуван. Циняв кIицI къадуллай, бусанна цаппараннуя. Дувайссар прописка, паспорт баххана байссар, кьамул дувайссар личIи-личIисса аькIри, налогру. Ми дулунгу кумаг байссар жул зузалтрал. Ялагу жу бувайссар инсантурал къатрал, аьрщарал заллушиврул чагъарду, мунийн халкьуннал «зеленка» учай. Ниттихъан оьрчIансса пособия бишинсса документру щаллу байссар. ХIасил, жу инсаннал чIявусса къайгъурду бартбигьин бюхълахъисса идарану хъанахъиссару.
— ЗучIасса зузалтрал цукунсса кIулшиву дикIан багьлагьиссар?
— Гьай-гьай, колледж, институт бувккусса, компьютерданущал «дусшиву» дусса инсан хъинну икIай. Амма чара бакъа лахъсса ягу дянивсса кIулшиву дикIан аьркинссар тIисса тIалавшиннагу дакъассар. ЖучIан даврийн ухлахисса инсан цал шанна нюжмардийсса лагайссар жул даврицIун дархIусса давуртту лахьхьин дувайсса курсирдайн. Яла дувайссар аттестациягу. Зун ивкIун махъгу шанма зуруй ххал уллай бикIайссар, бюхълай бурив ванаща зун ягу бакъарив. Жул зузалайн учайссар «универсальный исполнитель» куну. Жу мудангу хIадурну буссару инсантурал мюхтажшинну щаллу дуван. Булухьхьияра жучIан.
ХIадур бувссар
ХIажимурад ХIусайновлул
