Вай гьантрай 50 шинал юбилей кIицI лаглай бур Аьшттарханнал паччахIлугърал консерватория.

Имара Саидова
Билаятрай ца яла хьхьичIун­мунин ккаллисса консерваториялул гьану бивзния шихунмай мива бувккун бур 5000-нния ливчусса выпускниктал. Аьшттарханнал паччахIлугърал консерваториялул хъунмасса бутIа бивхьуссар СКФО-рал ва Аьрасатнал музыкалул культура хьхьичIуннай давриву. ЦIанасса чIумалгу консерватория ккаллину буссар лавайсса даражалул музыкалул центрданун. Консерваториялул выпускниктал зий буссар Аьрасатнаву, Ингилиснаву, Германнаву, Американаву, Палангнаву, Мексикалив, Египетнаву, Израилнаву ва цаймигу хIукуматирттай.

Аьшттарханнал консерватория къуртал бувну бур машгьурсса пианист, Дагъусттаннал халкьуннал артист Хан Башировлул ва ДР-лул культуралул министр Зарема Буттаевал.
Юбилейран хас бувсса мажлисирттай, Дагъусттанная гьуртту хьуну, ххаллилсса музыкалул программа ккаккан дунни Хан Башировлул. Мукуна ва ши­кку хьунаавкьунни цала преподаватель, Аьра­сатнал лавайсса школалул лайкь хьусса зузала, профессор Людмила Кругловащал.

Шиккува кIицI лаган, Аьш­ттарханнал паччахIлугърал консерваториялул цикссагу лавай­сса даражалул пишакартал хIадур був­ссар Дагъусттаннал музыкалул идарарттангу.
Пахру бан лайкьсса ва авадан­сса бур консерваториялул тарихгу.