Бугьараминнал хIурмат чан хьун къабитан

Мажлисрал ссупралух

Жунна гьарцаннан кIул­сса куццуй, аьдатравун дагьну дур хъунмасса хIурматращал Бугьараминнал кьини кIицI лаглагаву. Щала октябрь барз хъанай бур бугьараминнан хас бувсса барзну.

ЧIяйннал магьирлугърал къатравугу хьунни оьрмулул бугьараминнащалсса хьунабакьаву. Му тIиртIуна магьирлугърал къатлул хъунмур СалихIат Алхасовал, «ХIурмат бува хъунанал» тIисса цила назмулийну. Мукунма ванил бувсуна шяравусса личIи-личIисса давурттай захIмат бивхьусса инсантурая.
БавтIцири барча буллай, чIа увкуна цIуллушиву, оьрчIал дард къаккаккаву ва щаллара дунияллий паракьатшиву.

Бугьараминнал чулуха ихтилатру бувна МахIаммадова Минажатлул, Ибрагьимхалилова Пазилатлул, МахIаммадова Уммукусумлул, Мамедова Басиратлул, Кьурбанова Тамарил, Илдаров МахIаммадлул, АвдурахIманов Муслимлул ва цайминналгу.
Шяраваллил администрациялул чулуха ва цала цIания оьр­мулул бугьарами барча бувна шяраваллил администрациялул бакIчи МахIаммадов Исялгу.

Гьай-гьай, шиккува тIивтIуну бия авадансса ссупрагу. Увкуна ххуй-ххуйсса балайрду, дуруна къавтIавуртту. Мажлисрайн бувкIми рязину ливчIуна, ми барчаллагь тIий бия шяраваллил культуралул хъунмунихь ва администрациялухь.