«Зунттаву кьунттал дянив» – ризкьичитурачIа

Нину-виричугу, щиярчIав махъун къабагьлай, къавтIий бия

Жула зунттаву яхъана­хъисса чIявуми инсантурал цала дуланмагъ щаллу дуллай бур ятту-гъаттара ябаврийну ва гайннуя дучIаймур машлуй дуккан даврийну.

Зунттавусса СПК-рдал цала пирмарду, лухччив дур таксса инсантурахьхьун ишла дуллан ижаралий дуллуну. Уттигъанну муна мукунсса пирмалийн программалущал нани­сса Ваччиял шяраваллил Культуралул къатрал каялувчи Оьмариева Аьишат бакIчисса зузалтращал архIал нагу лавгссияв.


ХIажимурад ХIусайнов
Ссуттилсса зунттавусса тIа­биаьтрал исвагьишивриягу бусан ччива. Гьай-гьай, «мусил ссут» дуркIун, мурхьру цала хъахъи­сса лаххиярттаву бур. Кьинирдугу гъараллу дакъасса гъили­сса дур. Ялагу ва исвагьишиврул ягиншиву ци дур учирча, архний марххалттал кьяправу чIалачIисса зунттурдал санцинну марххала бакъами зунттурдал чIарав хъинну аьламатну чIалай дур. Ваччиял шярава 1-мур ЦIувкIуллал чулийнмай нанисса ххуллу лахъ хъанай, Щуну-Зунттул махьлийн бияйхту, яруннин чIалачIисса сурат дуссар ца ххаллилсса панорамалуха лахьлай.

Жу га кьини бувкIссияв хьхьи­чIара Бярнихи тIисса шяравалу диркIсса кIанттайсса пирмалий зузисса ризкьичитурачIан. Хьунабакьаву кIиччара арх дакъасса Къичурлухиял шяравалу диркIсса кIанттачIан гъансса щаращучIа хьуна.

Гъазиева Саржанат, нину-виричу

КIиккура ца кьунттул хьхьичI дацIан дурну дия Ккуллал райондалия 1944-ку шинал дизан дурсса шяраваллан хас дурсса мармарчарил улагу. Архний зун­ттал хъачIунттай щядиркIсса ттуруллал ялату чIалай дия ПпабакIу-зунттул бакIгу.
Гьай-гьай, тяхъашиву, барча бавуртту дайдишиннин, кувссай, лагма щябивкIун, хIасул бувна авадансса ссупра.

Бярнихсса пирмалий зузи­сса ризкьичитурачIан бувкIун бия Ваччиял шяраваллил администрациялул каялувчи Арсен МахIаммадов, ванал хъиривчу Роза Мадаева, администрациялул зузала Сулайман Кьурбанаьлиев, Ваччиял культуралул къатлул каялувчи Аьишат Оьмариева ва ванил лас Жамалуттин, худрук Муслим Суллуев, райондалул библиотекалул зузала Шавлухъ Аьлиева, Ваччиял шяраваллил СПК-лул каялувчи Шяпи Рамазанов, СПК-лул зузала Оксана МахIаммадова ва цаймигу хъамал.
Бярнихсса пирма ижаралий ларсун, кIикку ябуллай ия ттизайсса оьллу Хъусращиял шяравасса Арслан Гъазиев.

-Ттухь дур 25 гектар зун­ттал аьрщарал. Ябуллай ура 30-ннийн бивсса оьллу. Оьллаща ттирзусса накIлия дувара нис. Вай ласун, Кьукьма-зунттуйх хьуну, бучIай лазги, азирбижан. КIинттул ­оьллал бярчру бувайхту, гай личIи байссар оьллуми ва къячрими. Къячри ябуллали­сса цамур пирма дуссар Ваччиял махъсса лухччиний. Гай, шанна шинай бучгу бувну, яла баххару, ласун бучIай жулами инсантал ва ссурхIи. Лакку аьрщи барачат бу­сса аьрщи дур. Зун ччинал хIарачат барча, барачатгу чIал къавхьуну бучIай, — буслай ур цалла хозяйствалия Арслан.
КIиккува бия Арсланнул нину Саржанатгу. Ххал барча, кIа бив­кIун бия ацIва оьрчIал нину – нину-виричу!

— На бувссара Хъусращиял шяраву 1936-ку шинал, буттайн База, ниттийн Халун чайссия. Лас Кьурбан гъаттарал хIакин ия. Амма 62 шинаву аьпалухьхьун лавгссар. Жул дянив хьуссар ацIва оьрчI – арула арс ва шанма душ. Ца арс ахиратрахьхьун лавгунни. Вайми Аллагьнал бурувччуну бур. Навагу шикку АрсланнучIа яхъанай бура, — бувсуна ттухь циятува Саржанатлулгу.
Ваччату бувкIсса хъамаллурал увкуна ххуй-ххуйсса балайрду, бивзуна къавтIун, лавхъуна ххуй-ххуйсса махъру.
Жунма, бугьараминнан, дакI­нийссар СССР дусса чIумал хIухчу, доярка, хъузала, механизатор икIайва хIурмат лавайману, гьарца шаттирахун кIицI буллалиману.

Инсаннан аьркинсса дукия аьрщарая, хъу-лухччиния дурхха най. Хъу-лухччи цахарагу, жухарагу зузи дурну бур ва Бярнихсса пирмалий зузисса ризкьичиталгу. Мунияту на дакIнихтуну барчаллагь тIий ура Ваччиял шяраваллил администрациялухь ва культуралул зузалтрахь, укунсса аьр­ххи хIасул бувну тIий.
Улу, нину-виричугу, щияр­чIавгу махъун къабагьлай, къавтIий бия. Зунттал кьуват инсантуравугу бур. Варихха жула чIатIи мурад.