Учительнал цIа бюхттулну дикIан аьркинссар

Патишагьнал дирхьусса тарбиялул дарс

[dropcap]С[/dropcap]ултан Фотик Мехметхан ивкIун ур мютIи акъа­сса, кIанч ливксса дуклаки оьрчI. Дарсирай вичIи къадихьлай, низамрава уклай, ванал башттан айсса ивкIун ур цала учитель Окшамсиддин. 

Учительнал аьй дарча, Мехметханнул учайсса бивкIун бур: «На патишагьнал арсра, вища ттун цичIав бан къашайссар», — куну.

Учительгу, патишагь Мурат 1-нахь арсная аьрза бан намус хъанай, ссавур дуллай ивкIун ур. Амма Мехмет ялу-ялун ял­тту ихьлан, чIяву буллан ивкIун ур, ссавурданува увксса учительгу, кьянкьа дурну, лавгун ур патишагьначIан.
— Хъунама, ттул вихь бусан­сса ца зат бур, амма ттун вия намус хъанай бур, — увкуну бур учительнал.
— Нач мадувара, буси, — увкуну бур патишагьнал.
— Хъунама, вил арс дарсирдай низамрава уклай, мютIи акъа ур. Му ахчилай, ттуща аьркинсса куццуй дарс дишин бюхълай бакъар.
Аьй дарча му ур: «На патишагьнал арсра», — тIий, ттуйн гьужум буллай, — бувсун бур учительнал.
Патишагьнал, чансса хIаллай кьаивкIунгу ивкIун, учительнал вичIилухун щурщу бувну бур. Учитель гьанавиххи хьуну: «Ци планни. Гьич, ттуща къахьунссар», — тIун ивкIун ур. Патишагьналгу увкуну бур: «Пайда бакъассар, на увкумур бан багьантIиссар», — куну.

ХьхьичIва школалий лахьхьин байссия чичин ва буккин. Утти школалий ххал буллай бур буккин ва чичин шаппа цукун лахьхьин бувну бурив.
Гьунттий кьини дарсирай Мехмет цIунилгу вяйлиллан ивкIун ур. Учительнал аьй дайхту, гьармудан куна, цува щил арс уссарив буслан ивкIун ур. Му чIумал классрал нуз тIиртIуну, увххун ур цува патишагь.

Зун кIуллив 1949-ку шинал
И. Сталиннул амрулийну
дуккан дурсса школданул форма хъинну багьлул ххирасса янналия дурну диркIшиву. Ва диркIссар сунттул янна кунна кIукIлусса, дюрчIусса кашемир. Ва дайсса диркIссар хасъсса технологиялий яла ххуйми яттил ппалуя.

Ссигу бивзун, учительнал патишагьнайн ца лаян дурну дур. Яла лахъсса чIуний увкуну бур: «ЩихьчIав ихтияр дакъассар дарс зия дуллан, цIукъавххуна классравун уххан».
— Багъишла итигу увкуну, кьутI увкуну, цIунил ухху класс­равун, — куну бур ганал патишагьнахь. Патишагьналгу учительнал тIутIимур бувну бур.
Арс цала яруннил хьхьичI хьумунил махIаттал увну, банд лаган увну ур. Цала цIакьну чIалай ивкIсса буттайн учительнал лаян дурсса ккавккун, зума­ахъан къахъанай авцIуну ур. Чан­сса хIаллава, классрал нузайн кьутIгу увкуну, увххун, патишагьнал учительнахь багъишла ити куну бур.
Мехметлул хьхьичI щала дуниял кIурадарссаксса иш хьуну бур. Патишагьгума учительнайн мютIишиврул бара хьуну ур ва. Мунияр махъ тачIав Мехмет низамрава къаувккун ур.

Ва хавар ттун хъинну асар хьуна. Аьпа биву, ттула буттагу дакIнин агьуна ва був­­ккусса чIумал. Цал ттула ­уссия, дарсирдай вичIидихьлай ­акъар тIий, аьрза бувна учительнал. «ВичIилухух рархьуну ути, вичIидихьлантIиссарча», — увкуна буттал. Мехмет кунма­сса, къуллугъирттайсса бутта­хъул цIакьлин бувгьуну, учительтал ккалли-сан къабуллалисса оьрчIру ттизаманнул школардайгу чансса бакъар. ХIайп, нажагьсса бур патишагь кунмасса, учительнал кьадру-кьимат бусса, къуллугъчитал, нину-ппу.


[dropcap]С[/dropcap]оцсетирдаву цикссагу кка­ккай жунна дуклаки оьрчIал учительтал ккалли-сан къабуллалисса, учительтурайн гьужум буллалисса, нину-ппу оьрчIал хьхьичI учительтуращал оькки-ххуй буслай байбизлазисса суратру. ХIайп, бувчIлай бакъар нитти-буттан укун цала оьрчIру цала лиян буллалишиву. Укун­сса тарбия ларсъсса оьрчIал цала бакIрайн бала буцин бю­хъайшиву. Буцлайгу бур. Яла бур нину-ппу: «Ай, на ттула арс, душ цанма ччикун, ччимур канай, ччимур лахлай ябувссия», — тIий, оьрчIру бяйкьусса, тIайлакъабавцIусса циваннив къабувчIлай, гьарзат дукавриву, лаххавриву бусса кунма.

[dropcap]Б[/dropcap]юхъай, учительталгу циняв хьхьичIва кунмасса къабикIан. Ци чулийгу, учительнал цIа бюхттулну дикIан аьркинссар, учительнал хIурмат, кьадру-кьимат бикIан аьркинссар. Совет заманнай учительнал сий хъуннасса дикIайссия. Утти, оьрчIал ихтиярду дуручлачиссар тIий, учительтурал сий чIанччанналун руртун дур. Дарсирай вяйлиллалисса оьрчI-душ дахьва сусу-кIутIу барчагума учительнал, кIисса щун ихтияр дакъашиву буслай, оьрчIал хьхьичI учительнащал байбизлай бур нину-ппу. Нитти-буттал цала чул бугьлагьисса чIалай, оьрчIругу хъиннува ялтту бихьлай бур. ХьхьичIвасса дуклаки оьрчI, ттул чIумалссагу, учительнал ивкIу учирча, ивчIан хIадурсса икIайва.

[dropcap]Ч[/dropcap]Iирисса, цинявппа кувннан кув кIулсса, гъан-маччашиву дусса шяравугума учительнал ци-дунугу гьаз дан, дишин кумаг бува учирча оьрчIахь, цал оьрчIру зузи мабулларду тIий. ттюру-гъюру бай нитти-буттал. Учительнал цала оьрчIал цIаний бихьлахьисса захIматрая пикри буллай бакъар. Ци байссар иш багьний зун къаикIайсса, хъунанал хIурмат бакъасса оьрчIал. Жул нитти-буттал учайва: «ЧIи­висса кумаггу бусрав шай­ссар инсаннан, даврил ивкIусса цучIав акъассар», — куну. Учительная аьрза бан дакIнийн багьайххивав, сисайххивав.

— Учитель мудан тIайлассар, — тIисса зат цIакь бувну бия жул няраву.
Жул къатрал чIарах бия жяматрал хъуруннайнсса ххуллу. Хъуру лакьлакьисса, ххулув буллалисса чIумал къарду дархIуну нанисса хъами жул дарвазалул чIарах бачайва.
— Вай жул душругу буцияра зунма кумаг бан, ца-ца къар дахIин, — тIун дикIайва жул нину.
— Цалагу давуртту духьунссарча, — увкукун, ци давурттур вайннал дикIайсса, щаллусса кьини чяйрду хIачIлай щябивкIун бур учайва ниттил.
Яла, хIинчригу дуллуну, хъунмур ссугу, нагу гьан байвав: «Наси зула учительницан кумаг бан ца-ца къар дахIияра», — куну. Яла хъиривва оьвчайва: «Ца-ца дархIуну малихъанду, кIийла-шамийла насияра», — куну. Мяйжаннугу, ниттил тIийкун, бусрав шайсса бивкIун бур, шинну ларгун махъ ттула учительница Аймисай Саниевнал чIявуну кIицI лагайва цинма бувсса чIивисса кумаг.

Японнаву учитель яла хIурмат бумари

Ца чIумал на цIувххуссия Японнавасса ттула коллегахь, учитель Ямамотахь: «Японнаву та дувай учительнал кьини?» — куну. МахIатталгу хьуну, ганал увкунни: «ЖучIа учительтурал байран дакъассар». Нагу махIаттал унна, экономика, элму, техника хьхьичIуннайсса билаятрай учительнал хIурмат бакъашиврул. Цал, даву къуртал хьусса чIумал, Ямамотал оьвкунни ттуйн хъамалу. Ва школалия архну ялапар хъанай уну, жу метролий щябивкIру. Инсантал давурттая шаппай нанисса «пикрал» чIун дур. Метролул вагоннугу ккуччу тIий бувцIуну бур. Ца угьарасса адамина ивзунни на цала кIанай щяитан. Ттун бувчIлай бакъая угьарасса адаминал ттунма циван кIану був­ссарив, къащяикIлай ура, амма ганал на гужирай щяивтунна. КьатIув бувккун махъ на цIуххав Ямамотахь къужлул ттухава гаксса хIурмат циван бувссарив. Пишгу куну, ганал ккаккан дунни ттул хъазамраву ларчIсса учительнал лишан.

— Учительнал лишан ккар­ккун, учительнал хIурмат бан ивзссар га, — куну бувчIин бунни Ямамотал.
Нава цалчин хъамалу най ухьувкун, дачI­расса каруннищал къаачин, бахшиш ласун ччай ушиву бусав на ганахь.
Ямамотал бувсунни учительтурансса затру кьюркьуну дулайсса ттучан бушиву.
— Куклушиннарду анжагъ учительтураннив дусса? – цIуххав на.
Ямамоталгу жаваб дуллунни:
«Японнаву учитель яла хIур­мат бума инсанни. Японнал ишбажаранчитал хъинну ххари шайссар цала ттучандалийн учитель учIарча. Мунийну миннал сий гьаз шайссар», — куну.
Японнаву уссаксса хIаллай, на цимилагу бара хьура ва билаятрай учительнал хIурмат хъинну хъунмасса бушиврул. Метролуву бур учительтуран личIи бувсса кIанттурду, вайннан бур цанмасса ттучанну, цумур-духьурчагу транспортрайн билет ласун, учитель очерданий ацIлай акъар.
Ссан аьркинни японнал учительтуран учительнал байран, гьарица кьини байран куннасса духьувкун.
Рустан Бисенев

Ци кIулли, бюхъайхха учительнал захIматрал кьимат буну тIий Японнал билаят гьарица ишираву хьхьичIунсса.

Ттун ккавкссар концлагерь

[dropcap]Ц[/dropcap]а школалул директорнал гьан байсса бивкIун бур ва чагъар цачIана даврийн кьамул уллалисса гьарица учительначIан.

ХIурмат бусса учитель!
Ттун ккавкссар концлагерь, ттул яруннин ккавкссар цавагу инсаннан ккаккан къааьркинмур: дурккусса инженертурал газрал камерарду буллалисса куц, лавайсса даражалул хIакинтурал мюрщи оьрчIру загьрулул буллалисса куц, пишалул кIулшивуртту ларсъсса медсестрахъал вилттилиоьрчIру литIлатIисса куц, институтру бувккуну ларайсса кIулшивуртту ларсминнал хъами-оьрчI бивтун бичлачисса ва ччучлачисса куц. Мунияту, ттул вихшала дакъар дуккаврийн, кIулшивурттайн.
Ттул зухь миннатри: кумаг бара дуклаки оьрчIан инсантал хьун. Зул захIмат, зул хIарачат дунияллийн тачIав дурккусса жанаварт, вардиш хьусса психопатътал, кIулшивуртту ларсъсса Эйхмонтал къабуккан­сса бикIан аьркинссар. Буккин-чичингу, хIисавртту дангу кIулну бикIан аьркинссар, агана миннуя жула оьрчIаву инсаншиву тарбия дан кумаг бухьурча.

ХIадур бувссар
Андриана Аьбдуллаевал