Ларгсса нюжмардий МахIачкъалалив Национал библиотекалий хьунни аьдатравун дагьсса Дагъусттаннал луттирдал «Тарки-Тау 2019» выставка тIитIлатIисса шадлугъ.
Залму АьбдурахIманова
Ва тIитIинсса мажлисрай махъ лавхъунни луттирдал ярмукIалул ух-бакIрая шихунайсса куратор, журналист, публицист ва художник Марат ХIажиевлул. Цала мукъуву ванал кIицI бунни выставкалух луттирдал минахуртал мюхтажну ялугьлай бикIайшиву.
ЯрмукIа тIитIаврин хасъсса шадлугърай гьурттугу хьуну, хъамаллурахьхьун аьла-ссалам буллалисса ихтилат бувунни ДР-лул ХIукуматрал Председательнал хъиривчу Анатолий Карибовлулгу. КIицI бунни ванал цинявннан ххира хьусса ва машгьур хьусса «Тарки Тау» луттирдал выставка уттавасса мукъул байрандалийн кIура дарну душиву.
— ДакI ххари хъанай дур, жучIанма ва ярмукIалий гьуртту хьун, гъирарай цала луттирдащал бувкIсса хъамал ххал хъанай. Шиная шинайн выставкалул география гьарта-гьарза хъанай дур, шиккун Аьрасатнал 18 региондалиясса вакилтал бувкIун бур. ЖучIана увкIун ур чил билаятраясса, хъинну архсса Канаданавасса хъамаличугу – шаэр Ренди Коэл. ДакIнихтуну ххариссару зул аьрххи жул Дагъусттаннайн багьаврия! — увкунни премьер-министрнал.
ДР-лул Чичултрал союзрал хъунама МахIаммад АхIмадовлул кIицI лавгунни ва луттирдал выставка жула агьалинал ва тиха-шиха бувкIсса хъамаллурал байрандалийн кIура дарну душиву ва цуппава сентябрь барз Дагъусттаннай шеърилугърал шадлугъру дуллай най бушиву.
— Уттигъанну жучIавагу, щала билаятрайгу ХIамзатовлул «КIяла кьурукьирттал кьинирдал» шадлугъру дуллай бивкIру.
Ми гьантрай билаятрал личIи-личIисса шагьрурдая ва чил хIукуматирттая Дагъусттаннайн 50-ннийн бивсса чичулт ва шаэртал бувкIун буссия. ДакI дарцIуну учин бюхъанссар укунсса журалул фестиваллая ва форумирттая жунма биялсса хайр-мюнпат буссар куну, — увкунни М. АхIмадовлул.
Выставкалул хъиривми гьантрайсса батIавурттал, мастер-классирттал ва ккуркки столлал сияхIгу хъинну авадансса, буллугъсса дия. Мисалдаран, хъиривмур кьини Поэзиялул театрдануву хьуна хъунасса шаэр А.С. Пушкиннун 220 шинан хасъсса Алексей Бобрусовлул иллюстрациярттал выставка. Мура кьини ахттакьунбизулуву шиккува хьуна «Ссалам, МахIачкъала!» тIисса цIанилусса ярмукIалул хъамаллурал ва гьурттучитурал шеърирду ккалаккисса творчествалул мажлисгу.
Ххал бивгьунни луттирду итабакьай идаралул масъалагу
Хъиривми гьантрай выставкалул лагрулийсса Жяматийсса советрал батIаврий Дагъусттаннай луттирду бищаврил масъалагу ххал бивгьунни. Магьирлугърал ва культуралул ишккаккулт гьурттусса ва батIавугу тIиртIуна АьФ-лул ва ДР-лул культуралул лайкь хьусса зузала Ссалам Хавчаевлул.
Ва масъалалул аьмсса тагьарданиясса гьарта-гьарзасса ихтилат бувна Дагъусттаннал луттирду итабакьай идаралул директор Марина Оьмаровал. КIицI бувна ванил дагъусттаннал культуралул ва литературалул ялунбучIантIимур, хIукуматрал луттирду итабакьай идаралух къулагъас къадуварча, пашмансса бушиву, шаэртураща ва чичултраща цала жиплуву думуницIух ва ара бакI дуккан дан къабюхълахъишиву.
— Жул идара Дагъусттаннал миллатирттал 11 мазрай литература итадакьлакьисса, хъинну уникалсса идара хъанахъиссар. Зун бивкIсса 1925 шиная шинмай шичча бувкссар Дагъусттаннал литературалул гьану бивзсса халкьуннал дакIнихсса творчествалун хасъсса луттирду, элмийсса литература, личIи-личIисса шаэртурал, чичултрал, аьлимтурал, литературалул пишакартурал давуртту. Гьар шинах жул басмаханалий дагъусттаннал автортурал личIи-личIисса, сайки 60-70-ннийн бивсса, луттирду бищайссар, — кунни ванил.
Ванил бусаврийну, жучIава ччяния шинмай къаитабакьайсса бур толковый словарьду, энциклопедияртту ва элмийсса-педагогикалул литература. Лащинну дусса дур оьрчIансса ва чIава жагьилтурансса луттирду бищаврилмур иш-тагьаргу.
— Ци захIматшивурттахун багьарчагу, дакI дарцIуну учин бюхъанссар цалсса, дагъусттаннал агьали цала-цала ниттил мазурдий гъалгъа тIий, шаэртал ва чичулт миллатирттал мазурдий чичлай, ккалай буссаксса, жул идарагу буссар куну. Дагъусттаннал луттирдал издательствалул коллективрал лякъинтIиссар ва даву дацIан къаритансса гужгу, каширдугу, — тIисса мукъурттий къуртал бунни ванил цила ихтилат.
