[dropcap]И[/dropcap]нсаннаву буми туннурду, цачIун бавзуну, ца ххуттайх биширчан, кIийлла ягу шамий­л­ла жула дуниял каен дан бюхъантIиссар.

* * *
«Илчилул» коррес­пондент Амин Аьбдуллаевлул шяраваллил хозяйствардай зий дурну дур 40-хъул шинну. Ва оьрмулул мутталий Аминнул ахьтта авлахъирттайх риртун дур 40 азарда километралияр ххишалассагу. Ккалли бан бучIир Амин дунияллул лагма ахьтта увкшиврун ягу МКС-райн (международная космическая станция) 100-ла хъамалу ившиврун.

* * *
Google компаниялул офисраву дакъасса дур даврийн учIан ва даврия гьан ккаккан дурсса чIун. Зузалтрахь дусса дур ччитари учIансса ва гьансса ихтияр.

* * *
Сингапур паччахI­лугърай ца квадратрал километралий ялапар хъанай усса ур 299000 инсан.

* * *
Ущу-щулгъаву яла анавармур дусса дур барзукка. Инсаннал янил ляпI учиннин ва 8 метралий ле­ххайсса дур. Ссятрай 100 километра ритлай ссур баву къачаннихха.

* * *
США-наву бачIвасса, инсантал ялапар къахъанахъисса къатрал аьдад ххисса дусса дур, къатта-къуш бакъасса, гъаривсса инсантуралмурнияр.

* * *
Инсан усса гьавалул кIиришиву хIаллих 160 градусрайн дияннин гьаз дулларча, инсан сагъ-саламатну, ххайжанттуйн къаувкна личIантIиссар тIар.

* * *
Ккарччив марцI дай­сса Colgate (колгейт) пасталул цIа испан мазрайн таржума хъанай дур «Вила инава аьс хьу» тIисса мяъналий.

* * *
«Цими ранг ду­ссар ссурулккуртлул?» — тIисса суалданун жавабру дулунтIиссар укунсса: Китайнаву – 5; США-наву – 6; Аьрасатнаву – 7.

ХIадур бувссар
Р. Къардашовлул