Аьрасатнал ХIукуматрал хъин чулий ккарккунни «ПаччахIлугърал кадастрданул кьимат бищаврил бутIуву АьФ-лул законнаву дахханашивуртту даврил хIакъираву Федерал закондалул проект.
Му документ хIадур бувссар Росреестрданул АьФ-лул Президентнал АьФ-лул Федерал Собраниялийнсса Рисала бартдигьаву мурадрай.
Дмитрий Медведевлул тIимунийну, му закондалул проектрал мурад хъанахъиссар кадастрданул багьа тIайлану ккаккан буллалаву, кадастрданул багьа рынокралмунияр лахъну ккаккан къабулланшиврул ва мунийну инсантал судирттайн занази къабулланшиврул, кьимат бищайминнал (оценщиктурал) гъалатIру тIайла бацIан буллалаву.
АьФ-лул экономикалул министрнал хъиривчу – Росреестрданул каялувчи Виктория Абрамченкол бувсунни «ПаччахIлугърал кадастрданул кьимат бищаврил хIакъираву» тIисса федерал закондалуву дахханашивуртту даврия. Мунил тIимунийну му документрал буручлачиссар къатрал ва цаймигу объектирдал цалархIал заллухъруннал ва властрал органнал мурадру. Му закондалул проектрай ккаккан бувну бур хьхьичIва кадастрданул кьимат бищайни итабавкьуну бивкIсса гъалатIру цукун бакьин буван аьркинссарив. Закондалул проект кьамул дурния махъ къатрал заллухъруннал ххишаласса харж буккан къабуллан тIий бур.
Закондалул проектрай мукунна ккаккан дурну дур 2022 шиная махъ циняв регионнан цасса кьимат бищаврил мутта (цикл) ва кьимат бищаврил цасса чIун (дата) – мукьра шинава цал (федерал мяъна дусса шагьрурдан – 2 шинава цал).
«Дагтехкадастр» БУ-лул каялувчинал хъиривчу Марат Абакаровлул тIимунийну, му закондалул проект хъинчулий ккаккаврил бусласиссар паччахIлугърал ишан ларсун душиву инсантурал мурадирттацIун кабакьаву дуван, цанчирча, кадастрданул кьимат бищаву дикIан аьркинссар инсантуран къулайшивуртту дусса, аьчухсса.
ХIадур бувссар
ХI. Аьдиловлул
