«Дагъусттаннал Хъун хъатIуй» гьуртту хьуссар
Гьамиящиял шяравасса Шакиятлул душ Бабатова Зайнав ва ванил гьалмагъай Тамирханов Вадим
«Дагъусттаннал Хъун хъатIуй» гьуртту хьуссар Гьамиящиял шяравасса Шакиятлул душ Бабатова Зайнав ва ванил гьалмагъай Тамирханов Вадим
Андриана Аьбдуллаева
«Лакку билаятрал рухI» группалул администратор Разита Мушидова уттигъанну Италиянава зана хьунни. Гьашинусса миллатирттал культуралул ва искусствалул фестиваль World Folk Vision хьунни караматсса Италиянал билаятрай. Ухссавнил Ккавкказуллал федерал округрал национал директор ва сакиншиндарал комитетрал член хIисаврай, микку гьуртту хьунни жула Разитагу.
Жунма дакIнийссар ларгсса шиналмур фестиваль хьуссия Саоьдуллал Аьрабусттаннай. Микку ххув хьуссия Лаващиял райондалиясса «Авадан» ансамбль. ХIайп, гьашинусса фестивальданий, документру щаллу бансса мажал къавхьуну, вайннаща гьуртту хьун къабювхъунни. Амма оргкомитетран пикри бур цанна хъинну асар хьусса, дакIний лирчIсса ансамбльданун Щалагу дунияллийхсса тур сакин дан.
[dropcap]С[/dropcap]ентябрь зурул 29-нний Дарбантлив, «Нарын-Къала» стадиондалий, хьунни «Дагъусттаннал Хъун хъатIи» тIисса проект. Шикку гьуртту хьунни 30 чут, Дагъусттаннал 16 миллатрал вакилтураясса наврузбагтал ва жалинт. Аьмну «Дагъусттаннал Хъун хъатIуй» гьуртту хьунни 10 азаруннийн бивсса инсантал. ЦIуну ташу буллалими бакъассагу, вайннавух бия мусил, арцул, бирлиянтрал хъатIив буллалимигу.
«Дагъусттаннал Хъун хъатIи», яла чIявусса миллатру хIала бувхсса ва яла чIявусса халкь гьуртту хьусса хъатIи хIисаврай, ласунтIиссар Гиннеслул рекордирттал луттирайн. Учин ччимур вари, ва хъунмасса хъатIуй гьуртту хьуссар «Лакку билаятрал рухI» группалувасса, Гьамиящиял шяравасса, Шакиятлул душ Бабатова Зайнав ва ванил гьалмагъай Тамирханов Вадим. Вайннан Дарбантуллал шагьрулул округрал хъунаманал чулуха дуллуссар сертификат.
Ва ялагу, жул группалувасса душру-оьрчIру гьуртту хьунни Лакрал райондалун 90 шин шаврил байрандалий.
[dropcap]Н[/dropcap]а хьхьичIмур рубрикалий бувсъссия жула группалуву кIул хьусса жагьилтурал ташу бувшиву. Уттигу мукунмасса ца ташу хьунтIий бур. Муниятугу, октябрь зурул 13-нний Москавлив хьунтIисса «Серебряный кувшин» цIанилусса Ккавкказуллал хьхьичIунсса артистурал концертраягу на зухь хъиривми номердай бусанна. Ва концерт сакин дуллалиссар АРТ- ARCISS компаниялул.
Шикку, «бартбисулул ххуллу» тIитIавривухгу гьуртту хьуну, язими артистуран наградартту дуллантIиссар жула Разита.