«Культура» тIисса национал проектрал лагрулий Санкт-Петербург шагьрулий вай гьантрай дайдихьлахьиссар дуклаки оьрчIан хас дурсса культурно-просветительская программа «Град Петров».
Проект щурущи бувну бур Аьрасатнал Культуралул министерствалул 2013 шинал. Гьарца шинал муний гьуртту хъанай бур билаятрал гьарца регионнаясса дуклаки оьрчIру. Сакиншинначитурал маслихIатрайн бувну, проектрай гьуртту хьунтIиминнал сияхIравух хьхьичIва-хьхьичI бикIан багьлай бусса бур хьхьичIунну дуклакими, олимпиадарттай, конкурсирттай ххув хьуми, аьрали вузирдаву дуклакисса студентътал, ахIвал кIюласса кулпатирттавасса ва ятинсса оьрчIру.
Ва аьрххилул программалувун багьлай бур Эрмитажрайнсса, Мариинский театрданувунсса, «Павловск» музей-заповедникравунсса, «Петровская акватория» интерактив музейравунсса, Ленинград буручлай жанну дуллусса вирттаврал гьайкалданучIансса, диндалул тарихрал музейравунсса, «Россия – моя история» тарихрал музейравунсса ва цаймигу тарихийсса кIанттурдайнсса экскурсияртту. Программалунсса харж-хурж бихьлай бур Аьрасатнал Культуралул министерствалул. Регионнан багьлай бур анжагъ, группардугу сакин бувну, ххуллухсса багьа булун.
2019 шинал ва проектрай гьуртту хьун тIий усса ур Аьрасатнал личIи-личIисса шагьрурдаясса 6 азаллий 500 дуклаки оьрчI.
Дагъусттанная гьуртту хъанай усса ур 60 дуклаки оьрчI – МахIачкъала, Каспийск, Дарбант шагьрурдаясса ва Лакрал райондалиясса. Шиккува кIицI бан, районнава ва проектрай гьуртту хъанай бусса бур так ца Лакрал райондалиясса.
Тталаткьини райондалул администрациялул актовый залдануву райондалул бакIчи Юсуп МахIаммадов хьунаавкьунни Санкт-Петербурграйн нанисса Гъумучиял ва ШавкIуллал школарттал дуклаки оьрчIащал. Вайннахь ххуллухъин тIий, кIицI лавгунни дунияллий ца яла эмаратсса шагьрулийн аьрххилий гьансса тIайлабацIу районнал школарттая хьушиву так Лакрал райондалун. Умуд бивхьунни жула оьрчIалгу райондалул лажин лайкьсса даражалий ккаккан дантIишиврий. Ххуллухъиндаран дургьунни гьарца оьрчIал ка.
Дуклаки оьрчIал нитти-буттахъал цIания Юсуп МахIаммадовлухь барчаллагь увкунни Гъумучиял детсадрал хъунмунил хъиривчу Ума Аьлишаевал. КIицI лавгунни Юсуп МахIаммадов даингу хъуннасса къулагъас дуллай ушиву хъирив нанисса ник дуккавриву ва спортраву хьхьичIунмай шаврих, республикалул лагрулийсса ва кьатIувсса конкурсирттай, спортрал турнирдай гьуртту хьун тIайла буккан даингу цала чулуха кумаг байшиву.
Ххуллухъин баннав зун, оьрчIрув! Яргсса асардал вибувцIуну зана хьуннав зу. Ялугьланну Ухссавнил хъуншагьрулиясса зула асарду «Илчилул» буккултращал кIибачIиннин!
Лажин хIадур дурссар
Зулайхат Тахакьаевал
