[dropcap]О[/dropcap]ктябрь зурул 25-сса кьини цинявппагу дагъусттанлувтуран, хаснува лакран,хаснува 1-мур ЦIувкIуллал жяматран бусравсса кьинир. Ва кьини увну ур къучагъсса , нигь-ццах къакIулсса летчик,КIийла Совет Союзрал Виричу АхIмад-Хан Султан . Гьашину оьрмулул ванан 99 шин хъанахъиссар. АхIмад-Ханнул ппу Султан 1-мур ЦIувкIуллал шяравасса ивкIссар, ва цувагу ттул ниттил СахIибатлул ниттиуссуя.
Циксса буслай, чичлай бухьурчагу, цIунилва-цIунил махIаттал бару Хъунмасса Буттал кIанттул цIанийсса дяъвилий ванал ккаккан дурсса къучагъшиврул.
Дяъви байбишиннинма, Летно-испытательный институтраву летчик-испытательну зузисса чIумалва чIалай бивкIссар ва гьунар ххисса кьянкьа-кьурчIисса жагьил ушиву. Пахру багьлан бикIай кутIасса оьрмулий АхIмад-Ханнуща укун бюхттулсса цIа кьаритан бюхъаврия.
АхIмад-Хан Султаннул лайкь дурну дур кьунния лирчусса пачччахIлугърал наградартту.
КIийла Совет Союзрал Виричу хьусса чIумал ванан дахьра 24 шин диркIун дур. Хъунмасса Буттал кIанттул цIанийсса дяъвилий АхIмад-Хан Султаннул 49 душманнал самолет руртссар. ХIатта, ванащал ца полкраву бивкIминнал бусласимунийн бувну 64 самолет руртшиврияту хавар бур. Вайми АхIмад-Ханнул цанма кумаг буллалисса летчиктурал руртшиврий ккаккан дурну дур, тайнналмур захIматрангу лайкьсса кьимат бищун ччай.
Мукунма, тарихрал архивирттава ва архIал зий бивкIминнал бусласимунива кIулну бур АхIмад-Ханнул шамилчингу лайкь дуршиву Совет Союзрал Виричунал цIа, амма 1944 шинал репрессиярттахьхьун биривсса татарнал халкьуннал реабилитациялул масъалартту гьаз буллай тIий 1951 шинал му къадулун ккаккан бувну бур. Дахшишру дурну дур ванал нину татар миллатраясса душиврул.
Ва шинал ххал бигьавуртту дуллалисса чIумал дагьну нанисса самолет-ракетоносец хъинну захIматсса шартIирдай щяриртсса АхIмад-Ханнул. Обороналул министерствалул аьрали къуллугъчитурал баян бувссар И. Сталиннун АхIмад-ханнул къучагъшиврия ва ванан шамилчингу Виричунал цIа дулун лайкьшиврия. Амма И. Сталиннул хIукму бувссар ЯтIул ттугълил орденгу, Сталиннул премиягу дулун.
1-мур ЦIувкIуллал шяраваллил жяматийсса Советрал хIадур бувну бур Аьрасатнал Президент Владимир Путиннуйн лабизлазисса, АхIмад-Ханнул шамилчингу лайкь дурсса Виричунал цIа дулаврил хIакъиравусса чагъар. Шяраваллил жямат ва гъан-маччами бакI цIуцIаву дуллай бур. АхIмад-Ханнун 100 шин шаврицIун бавхIуну ванан шамилчинмур Виричунал ЦIуку багьан бан.
Пикри бур хIукуматрал арцу итадакьин дурну ягу жяматрал дартIун МахIачкъалаливсса, 1-мур ЦIувкIуллал шяравусса, Ваччавсса ва аэропортрайсса АхIмад-Хан Султаннул гьайкаллу цIудуккан дан.
Ххуйну хьунссия АхIмад-Хан увсса кьини, октябрь зурул 25-нний шяраваллил жямат, гъан-маччами МахIачкъалалив ХIамидовлул ва АхIмад-Хан Султаннул цIанийсса кучардал шанбачIулий дацIан дурсса виричунал гьайкалданучIа бавтIун ва дакIнийн утарча. Шиккува ихтилат банссия уттиния тихуннай ванан 100 шин шаврицIун дархIуну дуллансса давурттаягу.
Тавакъю буллай буру цинявннахь вай давурттавух чялишсса гьурттушинна дан.
ХIурматращал
АхIмад-Хан Султаннул
гъанчу Сайдун ХIажикьурбанов
