Уттигъанну цила оьрмулул юбилей кIицI ларгунни МахIачкъала шагьрулул Советский райондалул бакIчинал хъиривчуну зузисса 1-мур ЦIувкIуллал шяравасса Рамазанова Фируза Рамазаннул душнил.

---

Бадрижамал Аьлиева
[dropcap]Б[/dropcap]увну бур Фируза октябрьданул 9-нний 1969 шинал 1-мур ЦIувкIрав Рамазаннул ва Аминатлул кулпатраву. Махъ вай бивзун бур МахIачкъалалив. Шагьрулул 40-мур школагу къуртал бувну, Фируза був­ххун бур МахIачкъалаливсса Финансирттал техникумравун. Мугу къуртал бувну, Фирузал захIматрал ххуллу байбивхьуну бур Гъумук РАЙПО-рай финансист-экономистну зузаврия.

Лакрал райондалийн Фируза багьну бур Гъумучиял школалий зун тIайла увксса ласнащал – Гъазихан Рамазановлущал. Дагъусттаннал педагогикалул институтгу къуртал бувну, гай шиннардий Гъумуксса музыкалул школалул директорну, Гъумучиял дянивмур даражалул школалул музыкалул дарсирдал учительну зий ивкIсса Гъазихан МахIаммадович Лакрал ва Ккуллал районнай чIявуссаннан кIулссар. Ванал гьурттушиврийнуя га чIумал музыкалул школа цуппагу тIивтIусса.

[dropcap]Ф[/dropcap]ируза бур, цуппа чув бунугу, ссаха зий бунугу, инсаннан кумаг буван, чIарав бацIан хIадурсса инсан. Муниятугу духьунссар администрациялий­сса даву ванил дакIнил ларсъсса – инсантурал буруккиннначIан гъансса.

Махъ Фируза зун бивкIссар Гъумуква Районорал центра­лизованный бухгалтериялий. Рамазановхъал кулпат 1987 шинал бивзун бур МахIач­къалалив.

Ца-кIира шинайсса РОССГОСТРАХ-рал хъунмур инспекторну зийгу бивкIун, Фируза 1993-ку шиная тинмай зун бивкIссар Дагъусттан Респуб­ликалул Аьрасатнал Федерал Налоговый къуллугърай (ФНС России), финансирттал ва экономикалул отделданул каялувчину – хъунама бухгалтерну. Налогирттал инспекциялий зий ванил дурну дур аьмну 24 шин. Укунсса, куртIсса кIулшивуртту дусса, цилла даву цилла каний­сса ххюва кIисса кунма ххуйну кIулсса пишакартал бур ччимур идаралул каялувшиндарал чIаку зузалт, мукун Фирузайнгу оьвкуну бур МахIачкъала шагьрулийсса хъунисса медициналул центрдавасса цанний директорнал къуллугърай зун, миккумур давугу багьайсса даражалий дачин дурну дур ванил. Махъ Фируза бивтун бур шагьрулул Советский райондалул бакIчинал хъиривчуну.
Ванил заочнайну бувккуну бур Бизнесрал ва правалул институтгу.

[dropcap]Ч[/dropcap]ув зурчагу, цилла даву ххуйну кIулсса ва дуллалимур багьайсса куццуй дуллали­сса Фируза лайкь хьуну бур Аьра­сатнал Федерал Налогирттал къуллугърал бакIчи Михаил Мишустиннул чулухасса грамоталун, мукунма шагьрулул Советс­кий райондалул администрациялул чулухасса ХIурматрал грамотарттан ва барчаллагьирттан. Яла-яларив – хъунмар Фирузал хIурмат ва бусрав кIулминнал, архIал зий бивкIминнал ва зузиминнал дянив.

[dropcap]Ф[/dropcap]ируза бур, цуппа чув бунугу, ссаха зий бунугу, инсаннан кумаг буван, чIарав бацIан хIадурсса инсан. Муниятугу духьунссар администрациялий­сса даву ванил дакIнил ларсъсса – инсантурал буруккинначIан гъансса, цалва-цалва къайгъурдащал букIлакIиминнал дакI­ниймур лаласласисса, миннал мурадру щаллу буванмур буллалисса.

Гъазиханнул ва Фирузал ур кIия арс – Артур ва Арсен, бур оьрчIал оьрчIру. Ларсун ларай­сса кIулшивурттугу (ца ур юрист, вама – финансист), кIиягу арс зий ур МахIачкъалаллал администрациялий, Шагьрулул мажлисрал депутатътурал кумагчиталну. Арсен заочнайну дуклай ур Москавлив РГСУ-луву, «банковское дело» специализациялий.

Гъазихан МахIаммадовичгу ур цикссагу инсантурал чIарав авцIусса ва ацIлацIисса, цимивагу кулпатрал гьану бизлазаврил шадлугърал чIарав хьу­сса, инсантурал ххаришивуртту лахъа-хъун дуллалисса чув, цимирагу никиран, музыкалул кIулшиву да­къасса, тарбиягу дуллусса, дук­лаки оьрчIангу ххирасса муаьллим. Гъумучиял музыкалул школалия махъ Гъазихан дарсру дихьлай ур МахIачкъалаллал 42-мур школалий.

[dropcap]Ф[/dropcap]ирузал хъунама уссу Ма­хIаммад Рамазанов ялапар хъанай ур Аьшттарханнай, чIивима уссу МахIач – МахIачкъалалив, вай ишбажаранчитал бур. Бу­тта Рамазан аьпалул хьуну ур. Нину Аминат ялапар хъанай бур МахIачкъалалив.
Оьрмулул юбилейращал­гу барча буллай, дакIнийх­туну чIа тIий буру Фирузан цIуллусса, ххарисса оьрмулул лахъисса шинну, кулпатраву нахIушиву ва буллугъшиву, даврий – уттининнияргу ларай­сса бусравшиву ва цIу-цIусса хьхьичIуннайшивуртту.