[dropcap]Л[/dropcap]аргсса нюжмардий Ярославрай буссия республикалул ДР-лул национал политикалул ва диндалул иширттал министр Энрик Муслимов бакIчисса делегация.
Вайннал тIутIив дирхьунни 2010 шинал Ярославрай дацIан дурсса Совет Союзрал кIийла Виричу, летчик- испытатель АхIмад-Хан Султаннул гьайкалданучIагу. Дагъусттаннал делегациялуву ия Ярославрал областьрал Дагъусттаннал диаспоралул хъунама, Къяннал шяраватусса Шяпи Оьмаровгу. Ванал бувсунни Дагъусттаннал ва Ярославрал региондалул дянив танийра цIакь хьуну душиву дусшиврийсса арардугу, экономикалул ва культуралул хIала-гьурттушивугу.
— Аьмну региондалий яхъанай уссар дянивну ца мукьазара инсан Дагъусттаннаятусса. АхIмад-Хан Султаннул гьайкал республикалул ва региондалул дусшиврул лишаннунугу хьуна. 2017 шинал тIурчарив, МахIачкъалалив, 1999 шинал Дагъусттаннай виртталну ливтIусса Ярославрал ОМОН-далул талаталт Сергей Сниткиннун, Александр Селезневлун ва Игорь Серовлунгу гьайкал дацIан дурна.
Ва иширалгу дагъусттанлувтурал ва Ярославрал агьалинал дакIру гъан дурна. Ва ххуллухгу Дагъусттаннал делегация хIурматрай кьамул бунни губернаторнал хъиривчу Илья Баланиннулгу. Уттиния тинмайгу АхIмад-Хан Султаннул аьпалул хIурмат бюхттулну бушиву ккаккан буллалисса ва цаймигу кIирайннаннагу мюнпатсса давурттив дуллансса агьамсса ихтилатру хьунни, — увкунни Шяпи Оьмаровлул.
П. Рамазанова
