[dropcap]О[/dropcap]ктябрьданул 8-нний, Дагъусттаннал технический университетраву «Однозначно» цIанилусса федерал социал кампаниялул лагрулий
хьунни ххуллурдай мюхчаншиву дузал даврил хIакъиравусса пресс-конференция. Ванил сакиншинначитал хьунни «НигьачIаву дакъасса ххуллурду» цIанилусса экспертътурал центр.
Андриана Аьбдуллаева
Шикку гьуртту хьунни ДР-лул транспортрал ва ххуллул хозяйствалул министр Ширухан ХIажимурадов, «НигьачIаву дакъасса ххуллурду» тIисса экспертътурал центрданул хъунама директор Вадим Мельников, ДР-лул УГИБДД-лул хъунама Александр Шалагин, информациялул министрнал хъиривчу МахIаммадбаг АхIмадов, жагьилтурал иширттал министрнал хъиривчу ПатIимат Оьмарова, «112 къуллугърал» хъунама Жамалуттин Багов ва м.ц.
Дачин дурну ия пресс-конференция Дагъусттаннал УГИБДД-лул 1-мур отделданул хъунама Тарлан Гарайханов.
Кампаниялул агьаммур мурад бур ххуллурдай нигьачIисса тагьар хIасул дуллалисса иширттах ва ми къахьунсса чаран лякъаврих агьалинал къулагъас ххи даву. Кампаниялул лагрулий сакиншинначитурал мудан дюъ дихьлантIиссар, дакIнийн бутлантIиссар щупIиртуран, бучIи буллалиссаннуяр (60 км. ссятрай) анаварну бачин къабучIишиву.
— Ккаккан дурсса 60 километралийнияр анаварну (19 ккилометралул ххишалану) най ухьурча, аьчIа къадишайссар. Амма мунилгу ххуллий нигьачIисса тагьар хIасул дан бюхъайссар, — тIий бур сакиншинначитал.
«Однозначно» кампаниялул даву най дур Аьрасатнал 15 региондалий. Кампаниялул лагрулий Дагъусттаннай хьунтIий дур ххуллурдай аварияртту чан шаву мурадрайсса давуртту. ШупIиртуращал ва бахьттагьалтращал дуллантIий бур ххуллул низамрал хIакъиравусса консультация хIисаврайсса даву. Кампаниялул къулагъасралун ласунтIий бур детсадру, школарду, бахьттагьалтрал ххуллу лахъайсса кIанттурду, машлул ва дялахърулул центрду ва цаймигу жяматийсса кIанттурду.
Тарлан Гарайхановлул дурккунни АьФ-лул ХIукуматрал председательнал хъиривчу, Ххуллурдай мюхчаншиву дузал даврил ХIукуматрал комиссиялул председатель Максим Акимовлул оьвчаву.
— Махъсса 6 шинал дянив жущава бювхъунни кIилий чан бан ххуллурдай инсантал ливтIусса ишру. Аварияртту чан даврил ялув бавцIуну, 2024 шинайнин жунма аьркинссар 13 азарунния ливчусса инсантурал оьрмурду буруччин.
Вари «НигьачIаву дакъасса ва ххуйсса ххуллурду» тIисса национал проектрал лагрулий жува щаллу бан аьркинсса агьаммур масъала.
Къулай бан аьркинссар ххуллурду, дан аьркинссар чапарду, бишин аьркинссар чирахъру. Ххуллурдай бала-апатIру чан бансса ца агьамсса чаранну хъанахъиссар ххуллул низам дуруччаву. Аьрасатнал Госавтоинспекциялул давривугу ва масъалалух хъуннасса къулагъас дуссар, — тIий ур Максим Акимов.
Цала ихтилатраву Ширухан ХIажимурадовлул бувсунни декабрь зурул 15-ннийнин региондалул машиналул ххуллурдай 32-35 камерарду бишинтIишиву.
– Ванийнугу ххуллул низамрава бувкминнаща жавабрая лихъан къахьунтIиссар. Анаварну бачин бан ччисса чIумал, камерарду бушиву, аьчIа дишиншиву кIулну, низамрава къауккантIиссар шупIир. Жу хIакъи-хIисав дарду яла чIярусса ДТП-тту хъанахъисса, нигьачIаву ххишаласса кIанттурдал. ХьхьичIва-хьхьичI ми кIанттурдай бишинтIиссар камерарду, — увкунни ванал. Бувсунни уттинин хъунмур къулагъас федерал ххуллурдах диркIшиву, региондалулми ххуллурдайн ка диллай къадиркIшиву,. махъсса чIумал региондалул ххуллурду аьркинсса даражалийн буцин хъуннасса даву дуллай бушиву.
Александр Шалагиннул бувсунни 9 зурул дянив республикалул ххуллурдай 230 инсан ивкIушиву, гьарица кьини ца-ца инсан оьрмулуцIа хъанай ушиву ххуллурдай хьусса иширттаву. Вай гьантрай хIарчIсса шупIир сававну 12 шинавусса душ бивкIун бур.
-Ххуллурдай апатIру хьусса чIумал на чара бакъа лагара миккун. Анаварсса мутталий апатI хьуми ххассал бансса чаран ляхълан багьай. Хъунмасса барчаллагь Катастрофардал медициналул каялувчитуран, оьвчайхту, га цIана бучIай. Санавиация дучIан дурсса, апатI хьусса инсантал Москавлив биян бувсса кIанттурду хьуссар, — увкунни ванал.
Александр Шалагиннул кIицI лавгунни Дагъусттаннал халкь иш багьний чIарав бацIайсса бушиву, Аьрасатнал царагу региондалий, шикку кунма, ххуллурдай аварияртту хьусса чIумал, машинартту бацIан бувну, шайсса кумаг буллай чялиш бувккун къабикIайшиву. Ихтилат къуртал буллай, ванал барчаллагь увкунни Дагъусттаннал ХIукуматрал председательнал хъиривчу, ХIукуматрал чулухасса ва проектрал куратор ХIусайнов ХIажимахIаммадлухь проект щаллу дан хъунмасса кумаг буллай тIий.
