ЦIу лещан дувултрал идара Ккуллал райондалий тIивтIуну бур 2010-ку шинал. Ганияр махъ шикку хьунни ххуйчулиннайсса чIярусса дахханашивуртту.
2016-ку шинал декабрь зуруя шинай ва идаралий каялувшиву дуллай ур Хъусращиял шяраватусса Гъазил арс Къудуев Зайнуллугь. Ва зун увкIния махъ хьунни тамансса цIушиннарду. Цалчин – цIакь хьунни низам, пишалул усттаршиву. Оьвчайхту бачин цIу лещан дувай машинартту муданмагу хIадурну буссар. Республикалул МЧС-рал цIу лещан дувултрал идаралун цимилгу дуллуссар грамотартту ва барчаллагьрал чагъарду.
[dropcap]Р[/dropcap]еспубликалий гьарца шинал цIу лещан дувултрал кIулшивуртту ххал дуллалисса бяст-ччаллаву гьуртту хьусса Ккуллал райондалул 32-мур цIу лещан дувултрал командалул бувгьунни 1-мур кIану.
Республикалий гьарца шинал шай цIу лещан дувултрал кIулшивуртту ххал дуллалисса бяст-ччаллу. Уттигъаннугу МахIачкъалалив хьунни мукунсса конкурс. Муний гьуртту хьусса Ккуллал райондалул 32-мур цIу лещан дувултрал командалул бувгьунни 1-мур кIану. «Отделениялул яла ххуйма командир» тIисса номинациялий 1-мур кIану бувгьунни МахIаммадов Суреннул, «Яла ххуйма шофер» тIимуний 1-мур кIану бувгьунни МахIаммадов Русланнул, «Яла ххуйма цIу лещан дуву» тIимуний 1-мур кIану бувгьунни Кьурбайтаев Шамхалал.
ХьхьичIунсса кIанттурду бувгьуминнавух бия отделениялул командир Къуйчиев Жабраил ва цIу лещан дуву Аминов Мухтар. Ваниннин хьусса конкурсирттай цIу лещан дувултрал ца бутIул вайксса чIявусса цалчинми кIанттурду бувгьусса иш хьуну бакъар. Ва кIанугу ккалли бан багьлай бур отделениялул командир МахIаммадов Суреннул ва цIу лещан дувултрал идаралул каялувчи Къудуев Зайнуллагьлул цала канилуминная хъуннасса тIалавшинна душиврун, зузалтрал кIулшивуртту къухъна къахьун, вайннал ялув бавцIуну бушиврун.
Жувагу барча буванну ххув хьуми ва Ваччавсса цIу лещан дувултрал щалагу идаралул зузалт.
Лажин хIадур дурссар ХIажимурад ХIусайновлул
