[dropcap]О[/dropcap]ктябрьданул 16-нний Дагъусттаннал БакIчи Владимир Васильев хьунаавкьунни налогирттал буржру бусса идарарттал вакилтуращал.
Хьунабакьаврий гьуртту хьунни хъунисса буржру хьун бувсса 21 идаралул вакилтал.
Микку махъ лахълай, Владимир Васильевлул увкунни: «Жу ххишала щийчIав дюъ къадихьланну. Жу дуларду чIун, утти кьянкьану къуццу тIунну. Законну биттур къадуллалиминнал ялув кьянкьану бацIанну».
Дагъусттаннал УФНС-рал каялувчи Гъазинур Апсалямовлул бусаврийну, Дагъусттаннай налогирттал цачIусса бурж хьуну бур 9,5 млрд. къуруш. Гьашину ми буржру чан буван хьуну бур 3 процентрал, амма ми къагьассар.
Республикалий хIакьину 382 инсан буржлув хьуну ур 500-я лирчусса къурушру налогирттал . Ми циняв инсантал бусса бур УФНС-рал персонал контрольданий, миннащал дуллай бур за бувчIин баврил давуртту. Тамансса буржру бур юридий идарарттайгу.
Апсалямовлул гьартану бувсунни налогру къадуллалаврил, датIин къашаврил захIматшивурттая.
Владимир Васильевлул бавтIминнахь бувсунни Дагъусттаннай налогру датIаврил низам цIакь даврил давурттая.
Мунал тIимунийну, налогру дуллалиминнал кумаграйну гьашину республикалий бювхъуну бур бюджетраву арцу шамлий ххишала салкьи дуван. Мукунна шамлийну гьарза хьуну дур федерал бюджетравату дучIайсса арцугу. Дагъусттаннал БакIчинал бувсунни арцу чун харж дурссаривгу.
Мунал бурж буминнай дюъ дирхьунни: налогру дулаван аьркинссар цинявннан, мукунна законнугу биттур дуллан аьркинссар, цамур куццуй цучIав къазунтIиссар. «Ва чIумуйсса кампания дакъар, жу зий буру му ххуллий. Цинявннай дюъ дихьлай ура: налогру дуллантIиссар цинявннал! Законнугу биттур дуллантIиссар!», — увкунни Васильевлул.
Яла региондалул каялувчинал бувсунни марцIну зузисса ишбажаранчитуран ххуй-хъинсса шартIру сакин дуллай бушиву.
Муния махъ налогирттал буржру хьуминнал бувсунни буржру ссайну, цукун хьуссарив. Миннал сайки цинявннал бакIрайн лавсунни буржру бухлаган буван хIадурну бушиву.
