[dropcap]О[/dropcap]ктябрьданул 14-нний Дагъусттаннал БакIчи Владимир Васильев гьуртту хьунни АьФ-лул ПрезидентначIасса Стратегиялул лябуккулул ва национал проектирдал советрал батIаврий.
БатIаву хьунни видеоконференциялул низамрай АьФ-лул ХIукуматрал Председательнал каялувшиврий.
Ххал диргьунни «Демография» ва «ЦIуллушиву дуруччаву» тIисса региондалул проектру.
Дмитрий Медведевлул бусаврийну, цIана зий бур оьрчIру садикирттал ва яслирдал дузал баврил, мукунма оьрчI-бакI яслирдаву бусса хъаннин зунсса кIанттурдал масъаларттаха. Ми давуртту бакIуйн дуккан дувансса арцу бюджетраву ккаккан дурну дур – гьашинусса шинан 65 млрд. къуруш. Цаппара регионнай давуртту хъинну нани дурну дур, амма дур захIматшивурттугу.
«ЦIуллушиву дуруччаврил» проект дузрайн дуккан даврил бутIуву билаятрал премьер-министрнал личIи дунни ххал дигьин цаппара темарду. Миннувасса ца дур къюкIлил ва туннурдал азарду. ХIакьину хьхьичI бавцIуну бур масъала 2024 шинайннин инфарктрал, инсультрал ва цаймигу азардал инсантал литIавуртту чан дуван 25%. Ми давурттан бюджетраву ккаккан дурну дур 11,6 млрд. къуруш.
Ххал бивгьусса масъаларттава цамургу агьамсса масъала бия 100-200 инсан ялапар хъанахъисса шяраваллаву ФАП-ру баву, мукунма мобил медициналул комплексру машан ласаву.
БатIаврий субъектирдал каялувчитурал ва исполнител властьрал регионал органнал бувсунни дуллалисса давурттал ва хIасул хъанахъисса захIматшивурттал хIакъираву.
Дагъусттан Республика «ЦIуллушиву дуруччаву» тIисса национал проектрал лагрулий 2019 шинал гьуртту хъанай дур 7 федерал проект дузрайн дуккан давриву.
«Демография» тIисса национал проектрал лагрулий Дагъусттан гьуртту хъанай бур цинярда ххюрагу федерал проектраву.
ХIадур бувссар
ХI. Аьдиловлул
