[dropcap]Л[/dropcap]аргсса нюжмардий, октябрьданул 19-нний, МахIачкъалалив «Аьрасат – ттул тарих» тIисса Тарихийсса паркраву дия ляличIиссара уттарашинна – ва кьини шиву «Ниттил мазрай­сса чичру – 2019» цIанилу чичлай бия лакку мазрайсса тотальный диктант.

Вара чIумал, онлайн-режимрай, лакку мазрайсса диктант чичлай бия Москавлив, Санкт-Петербурграй ва Нью-Йоркрайгу.

---

Бадрижамал Аьлиева
[dropcap]В[/dropcap]а кьинилийн хIадур хъанай сакиншиндарал комитет­рал барзру хьуссия. ДакIнийн бутан, дагъусттаннал миллатир­ттал мазурдийсса диктантир­ттал сиптачи «Аьрасат – ттул тарих» тIисса Тарихийсса музейри. Лакку мазраймур диктантрал сакиншиндаралсса бувссар Амучи Амуттиновлул каялувшиндаралусса Лакрал Национал советрал, Аьли Къаяевлул цIанийсса Дагъусттаннал тарихийсса обществалул (ванил вакилтал АхIмад Кьурбановлул ва Илияс Къаяевлул хьхьичIунсса гьурттушиндарайну), Давуд Амировлул каялувшиндаралусса Лакрал жагьилтурал обществалул, Лакрал театрданул, Лакрал радиолул, ДГУ-рал Дагъусттаннал халкьуннал литературалул кафедралул чIарав бацIаврийну, «Илчи» кказитрал ва «Дагъус­ттан» РГВК-лул информациялул чIаравбацIаврийну.
Диктантран язи бувгьуну бия лакрал хъунасса чичу МахIаммад-Загьид Аминовлул «Ниттил маз» тIисса цIанилусса бюххансса текст.

Миллатрал багьу-бизу, сянатру ккаккан дуллалисса майданну щаллу бувну бия Респуб­ликалул Халкьуннал творчествалул къатлул, Лакрал, Ккуллал, ЦIуссалакрал районнал Аьра­сатнал халкьуннал аслий­сса культуралул центрдал творчествалул коллективирттал, ми­ккува буллай бия халкьуннал канил пишардал мастер-классругу. Урувгнал яру ххари буллай дия Камил Чутуевлул рирщусса лак­рал шяраваллал, тIабиаьтрал суратирттая сакин дурсса выставкалул.
Лакрал миллатрал байрандалийн наними ярг-яргсса яннардаву хьунабакьлай, Тарихрал паркрал чурттурдай авурну бавцIуну бия жула лакку душ РахIима Сулаймановал каялувшиндаралусса къавтIаврил «Ссалам» ансамбльданул оьрчIру. Гихуннай ми оьрчIал цалла къавтIавурттайну хъунна дуруна Лакрал кьини.

Тарихийсса паркрал хъунмасса конференц-залдануву ххалаххи багьансса кIану ба­къая ва кьини. ЩябикIансса кIану чуври, бацIанссагума кIану ля­къин захIмат хъанай бия, мунияту къачансса инсантал бия щяв щябивкIун, ягу бавцIунийва диктант чичлачисса. Шадлугъ дачин дурну ия ДР-лул культуралул лайкь хьусса зузала Ссупиян Оьмаров. Цалва ихтилатраву ванал кIицI лавгунни лакрал диктант ва залдануву цалчин чичлай бушиву.
Лакрал байран дайдирхьуна лакку гимнрая – цинявппагу лавай бивзун. Хъирив махъ лавхъуна Лакрал Национал советрал каялувчи, диктантрал сакиншиндарал комитетрал каялувчи Амучи Амуттиновлул.

— ХIурмат бусса лак! Ва хIа­кьинусса кьинилийн хIадур хъанахъиссаксса хIаллай хъиннува бувчIунни жува лакку мазрая цуксса арх хьуну буссарув. Гъумукгума, Ваччавгума бур оьрус мазрай гъалгъа тIий, шагьрурдай хьунабакьлай бур цалва нину-ппу часса буссарив къакIулсса лак. Ва щийнчIав багьайсса, щиячIав цичIав тIалав дувайсса масъала бакъар, ва бур так жува – лакрал щаллу буван аьркинсса масъала – цуппагу ичIува жулва оьрчIащал, жущала жува лакку мазрай гъалгъа тIий. Жущава маз буруччин къахьурча, жуйнма «оьрус мазрай гъалгъа тIисса лак» учинтIиссар, маз бакъа­сса миллат – му миллат бакъану тIий. Нитти-буттал жучIанма биян бувсса ниттил маз хъирив нанисса жагьилтурачIан жува биян къабуварча, цири жура миннан кьадитайсса?! ХIакьину диктантрайн вайксса инсантал бучIаврия дакIнийхтуну ххарира, ларсъсса ручкарду, чагъардугума биял къавхьунни. Гьашину хьусса гъалатIру, лях лавгсса кIанттурдугу хIисавравун лавсун, умуд бур ва даву ялунчIил хъиннура ххуйну дувансса.

Сакиншиндарал комитетрал каялувчинал хъиривчу, Аьли Къаяевлул цIанийсса обществалул член, Тарихрал паркрал зузала, тарихрал элмурдал доктор, профессор АхIмад Кьурбанов:
— Хъинну ххарира хIакьину ва кIанай зул хьхьичI махъ ла­хъан. Ххарира ва зал щапI увкуну буцIаврия, шиву ляхсса ххуллурдугума бувцIуну бушиврия. ДакI дарцIуну ура укунсса залданущал лакку маз бухлагаврил дард ца 300 шинайсса яла дагьантIишиврий.

Лакрал театрданул хъунама режиссер Аслан МахIаммадов:
— Ттувун хIакьину нава ла­ккучу ушивриясса пахру багьунни – укун цачIун бавтIун, укун кувннал кув бувгьуну, ца заккана хьуну, аьркинний цачIун батIайшиву зу кка­ккан баврия. Жула лак укун кувн­нал кув бувгьуну буссаксса, мазран бивкIу бакъашиврий дакI дарцIунни хIакьину. Хъин дайдихьу хьуннав. «Ттун миллат ххирассар, на патриотра» тIурчагу, патриот мури – театрданувун, ука учIарчагу, билет лавсун учIарчагу, заназима, кказит ккалаккима, радиолух вичIидихьлахьима, лакку мазрай оьрчIащал ихтилат буллалима.
Филологиялул элмурдал доктор, профессор Ися Аьбдуллаев:

— ХIакьину жува буру лакку зумуну, Лаккуй, кIа яла хъуннамур шяраваллил хъун ккурчIайн бавтIссаннуяр хъис личIи бакъа. Укун ххаллилну бавтIсса вир­ттаврахьхьун, лакрахьхьун, укун­сса даву бакIрайн ларсун, ванил хъин дайдихьу дурминнахьхьун цIуллушиву дулуннав. Жува миллат хIисаврай тарихрал ххуттайн лавсъсса чIумал, цIакьлин бугьансса, ккаккан бувансса кIану – му жула ниттил мазри. Мунияту яла хъунмур дуаь, яла хъунмур леххаву – тачIаввагу жула къушлий лакку махъ, лакку маз чан къахьуннав тIисса дур. ХIакьину шиккусса батIаврил чIалачIи буллай бур жунма жува хъамабивтун бакъашиву, жула къириятгу, яхIгу, къиццигу бушиву, жущава жува бушиву щаллагу дунияллун ккаккан буван бюхълай бушиву. Жуйрасса яла хъуннамур ялуршингу – му маз хъамакъабитансса хIарачат бавур, буттахъая жучIанма ирсирай бувкIсса кунма му мукьахуннай наними никирттайн – мазрал заллухърунначIан биян бавур.

Лакрал радиолул хъунмур редактор Тамара Закарьяева:
— Лакрал яла оьккимур зай бур «вилах лещаннав» тIисса. Цамур калимагу дур «буттал аьпа бутIинсса арс къаукканнав» тIисса. Жулва маз бивчIан битаву – му ужагърай цIу, вилах лещавур. ХIакьину ттул дакI дарцIунни лакрал вилах къалещантIишиврий.
Бусурманнал рувхIанийсса управлениялул вакил МахIаммад Ссаламов:

— Ххирасса уссурвал, ссурвал! ХIакьину жува батIаврил савав дур хъинну агьамсса – жува гъалгъа тIий буру жулва мазрая. Аллагьнал ва жулла дуниял ляхъан дурсса куццуй – аьрщи, баргъ, барз, цIуртти ва цаймигу караматру, лишанну, мукунма жулва мазгу – ядувангу аьркинссар жура. Гьарцаннал цалва-цалва маз бушаву – мугу Аллагьнал чулухасса аьламатри. Учин ччимур мура, мазрал гьану Аллагьутааьланал бивхьуну бухьувкун, му буруччин аьркинссар, жучIава цамур мазгу бакъахьувкун. Пик­ри бувара, цуксса захIмат къахьунссия жунма цIана, циняв лагма лавгун, цIусса маз сакин буван, бумур буруччингума ваксса бигьа бакъасса.
Маз лахьхьавриву хъунна­сса жаваблувшиву дуссар нитти­хъай, нахIакьдан бакъар ни­ттил маз учайсса. Бутта ур хъамаличу – кIюрххил увккун шавату, хьхьувай учIайсса, нинурив мудан оьрчIащал дур. Аллагьнал кабакьиннав жунма маз буру­ччавриву.

«Аьрасат – ттул тарих» Тарихийсса паркрал каялувшиндарал чулуха бавтIминнал хьхьичI махъ лавхъуна му музейрал директорнал хъиривчу Ислам Ханмурзаевлул.
МахIаммад-Загьид Аминовлул ниттил мазраха чирчу­сса назму дюхханну дурккунни ЦIуссаккуллал 1-мур школалул дуклаки оьрчI Батирхан Султановлул.

Ихтилатру бувну махъ, байбивхьуна диктант чичлай.
Диктант дуккин вихшала дурну дия лакку мазрал учительтурал Ассоциациялул каялувчи, МахIачкъала шагьрулул 16-мур школалий лакку мазрал дарсру дихьлахьисса ПатIимат Аьлиевайн.
— Ттул умуд бур диктант чичлачисса гьарцагу инсаннал шивусса бюххансса махъру цала дакIнивун лавсун, вайннул ялув пикри буванссар, — тIисса му­къурттищал, ПатIимат Аьлиевал хъинну ххуйну, бувчIинну був­ккунни диктантрал текст. Диктант чирчуну, ми дартIун, ми ххал дуллалиссаксса хIаллай тамашачитуран ххаллилсса концерт ккаккан дурна Лакрал театрданул артистътурал ва лакрал районнаясса творчествалул коллективирттал. Ччинаща ва кьини бюхълай бия лакку дукрардал тIин-тIааьн ххал бувангу.

Диктантрал давуртту ххал дуллай бия лакку мазрал дарсру дихьлахьисса учительтал. Диктантрал жям дуллай, ПатIимат Аьлиевал хъуннасса ххаришиврущал баян бувна залдануву­сса инсантурал 95 процентраща бювхъушиву ва даву ххуйну чичин, баян бунни диктант цавагу гъалатI бакъа, ягу ца-кIива гъалатIращал чирчуминнал цIарду. Диктант чичлайрив бия личIи-личIисса къуллугъирттайсса, личIи-личIисса оьр­мулул шиннардивусса лак, министртурая тIайла хьуну, дуклаки оьрчIайн, пенсионертурайн бияннин.

Диктантрая махъсса пикрирду

Геннадий Кьурбанов, Каспийск шагьрулул аьрали комиссар:
— ЗахIматшиву личIисса да­къая, амма къакIулли ттущава цими гъалатI итххявхссарив. Мяйжаннугу, цIанасса чIумал уку-укунсса давуртту чара бакъа аьркинну дур. Жува ичIува жула оьрчIан лахьхьин къабуварча жула мазгу, жулла аьдатругу, кьатIаллил цамур мазгу, цайми аьдатругу лахьхьин дувантIиссар миннан. ИчIаллил коллективрая, хъирив школалия хъар шайссар маз лахьхьаву. Хъунмасса барчаллагь ва хъинну ххуйсса, хъинну тIайласса даву дуван бакIрайн ларсминнан.
Камил Сяидов, ДР-лул жагьилтурал иширттал министр:

— Хъинну захIматну бия чичлан, тIайламур бусаннив, гуж-къиялий чичинмур буллай усси­яв, цанчирча лакку мазрай­сса ихтилат, гъалгъа ттун ишлану бакъану тIий. Укунсса давуртту чIяруну дуллалиссаксса, инсантурал маз лахьхьаврил, му буру­ччаврил ялув чIявуну пикрирду буллантIиссар, цалва оьрчIащал лакку мазрай ихтилат буллан хIарачат буллантIиссар. Диктантрая махъ на нара ххишала­сса къулагъас дулланна маз ла­хьхьаврих, му оьрчIангу ла­хьхьин баврих.

Тимур Хъунбуттаев, «Прибой» медиахолдинграл ведущий, мукуна хъатIив ва цаймигу ххарисса ишру бачин бувайма:
— Лакку мазрайсса диктант дикIантIишиврия ттун хар-хавар бакъа кIул хьуна инстаграмрава. Муниннин цайми миллатирттал диктантру душиврия баллай, лакку мазрайссагу дувайссания тIий икIайссияв. На хъунмасса гъирарай гьуртту хьура ва давривух, ттун хIаз бия ттула гуж, лакку мазрал кIулшиву ххал дуван. Диктантрайн увкIун, гивуцири инсантал, ва кьини­сса даврил даража ккавккукун, хъинну ххари хьура. Ттул хъунмасса кьадру буссар ттулва миллатрал, мудангу хIадурссара ттула ххирасса миллатрал дуллалисса давурттавух гьуртту хъанан. Жагьилтурайнгу оьвтIий ура: нач мадулларди зулва мазрай гъалгъа тIун, лахьлахьияра ла­кку маз. (Шиккува кIицI лаган – Тимурдул цIа-бакI дурккунни диктант ххуйну чирчуминнал, ххюннияр чансса гъалатI итабавкьуминнал сияхIрай – Б. Аь.). Хъинну ччива, оьрмулул хъуними бакъасса, жагьилмигу буниялану цалва мазрах, культуралух, ми лахьхьаврих буруглай. Ттухьва ина ци миллатрал ура куну цIувххукун, на мудангу пахрулий «лаккучура» куну учара.
Адли Дибиров, цIанихсса музыкантътурал тухумраясса музыкант:

— ХIакьину куннасса даву хьхьичIра-хьхьичI аьркинссар жагьилминнан – цалва миллат, маз хъамакъабитаншиврул. Ччива укунсса давуртту, шинай цал дакъа, чIяру-чIяруну дуллай. ЧIивиний ттун оьрус маз бувагу къакIулссия, марцIну лакку мазъя кIулсса, на шяраву ялапар хъанай икIайссияв. ТIайламур бусан, цIана лакку мазрай чичин къакIулли, ихтилат буван ялагума кIулхьурчангу. Ялуннин хIарачат булланна навагу, ттула кулпатравумигу шайссаксса ла­кку мазрай гъалгъа тIутIи буллан. Лакку маз бухлаган къааьркин­ссар, маз куну – му анжагъ махъру, калимартту дакъар, му миллатрал культурар, багьу-бизур, му жулва пахрур. Мунияту жулва жагьилтурахь учин ччива – кIулну бикIияра, лахьхьияра жулва ниттил маз, кьадру бувара мунил.