«Къалпуз бухъарча, гивугу лякъинтIиссар лаккучу» тIисса махъру хIакьсса махъру бур. Бусанна циваннив.

Уттигъанну жул кулпатравун ххуй бакъасса хавар бувххуна, Аллагьнал щинчIав укун­сса ккаккан къабагьаннав. Жула духтуртурал къатIайлану диагноз дирхьушиврийн щак буну, жун багьуна Обнинск шагьрулийсса онкологиялул центрданийн гьан. Аллагьнал жу бувцунав тIайланма азарханалул кIилчинмур зивулийн – гьутрурдал отделениялийн. Куявгу, оьрчIгу хIакиннащал ихтилат буван бувххуна ординаторскийлувун.

[dropcap]Н[/dropcap]а ттула кулпатращал жанахIраву ялугьлай буссияв. Кулпатрал я бавцIуна ординаторскийлул нузайн, тикку чивчуну бия «врач-онколог Магомедова Ата Набиевна» тIий. Ттул дакI аьжаивну гьалак дурккуна. КьутIгу куну нузайн, на увхра ординаторскийлувун, уххайхтува цIуххав:

— Вы из Дагестана?
— Да!
— Вы лачка?
— Да!
Столданух щябивкIун бия сахIибулхайр дусса лакку душ. Ва бия Хасавюртлив ялапар хъанахъисса ДучIиннал шяравату­сса Набинал ва ПатIиматлул душ АтIа. Къумашиву бусайхту: «Чув бур кулпат, оьвча, шивун буххан бува», — увкунни. «Къума малагара, ттул буттауссу, ттущава шаймур банна», — кунни АтIал.

Гава цIана ванил, хIакин­турайнгу оьвкуну, ххал дуруна цIунилгу кулпатрал диагноз. Жул бахттилун, цичIав ххуй дакъасса къаляркъуна. Яла-яла ттул дакIнивун, нава къуману унугу, пахру багьлай бия, Обнинск шагьрулийн бувкIун, цила кIулшивурттайн бувну лавайсса даражалийн чIивисса мутталий лавхъсса жула лакку душ АтIа Набиевная.
Жула чулуха хъунмасса барчаллагь учин ччай буру АтIал нитти-буттахь, укунсса душ тарбия бувну тIий.

АтIан чIа тIий буру оьрмулуву тIайлабацIу. ТачIав дайшишру къахьуннав, къумашиву къаккакканнав. Иш багьсса чIумал АтIа кунма лакрал чIарав бацIавансса лак чIяву баннав.

М. Булатов,
ш. Щар