[dropcap]И[/dropcap]юнь зурул ахирданий Румыннал тарихрал, культуралул ва элмулул центрданун ккаллисса Яссы тIисса шагьрулий хьуссия «Инвентика» цIанилусса дунияллул халкьуннал дянивсса 23-мур изобретениярттал салон.
Андриана Аьбдуллаева
[dropcap]М[/dropcap]ероприятие хьунни Румыннал техникалул университетраву. АрхIала шикку хьунни изобретательтуран хас дурсса дунияллул халкьуннал дянивсса конференциягу. Шикку дия Вьетнамнавасса, Германнавасса, Ираннавасса, Молдованавасса, Польшанавасса, Португалиянавасса, Аьрасатнавасса, Румыннавасса ва Чехиянавасса автортурал изобретенияртту ва инновациялул проектру – аьмну 375 проект.
Аьрасатнавасса 16 проектравух дия Дагъусттаннал медициналул университетралссагу. Вайннал лайкь дунни мусил медаль ва салондалул диплом «Инвентика-19». Мукунма вайннал лавсунни Молдованал ЦIуллу-сагъшиву дуруччаврил, захIматрал ва социал иширттал министерствалул Национал агентствалул чулухасса цIанихсса кубок.
Дагъусттаннал медициналул университетрал хIадур дурну дия эпилепсия дусса оьрчIансса ЭВМ-сса программа. Мунил авторталгу хъанай бур неврологиялул кафедралул аспирант Фарида Мурачуева ва доцент Гайбатова Лаура. ЭВМ-рансса программа хIадур дурну дур пациентътурал база салкьи баву, азарунния, му мюрщи оьрчIал дянив ппив хъанахъаврия ва хъин дансса чаранная бусаву мурадрай. Программа ккаккан дурну дур хIакинтуран, аспирантътуран, ординатортуран.
Ва рутан тIий бур медициналул дуккаврил идарарттал, мукунма азарханардал ва поликлиникарттал программарттавун.
Программа мукунна ишла дуллантIий бур неврологтурал, приступру хъанахъисса къашайшалал ялув бацIаву ва ми ххал баврил даража гьаз баву мурадрай. Къашайшалтраща ишла дан бюхъантIиссар ва система азарунния бувсъсса ва хIакиннал назначенияртту дусса мобильная карта хIисаврайгу.
Ва хъунмасса мюнпат бусса проектрал автортуравасса ца, жула лакку душ Фарида Мурачуевахь, Дагъусттаннал медициналул университетрал коллективрахь барча тIий буру лайкьсса награда. Агьалинал цIуллу-сагъшиву дуруччаву мурадрай зу бихьлахьисса захIмат мудан дузрайн буккаваннав.
