[dropcap]О[/dropcap]ктябрьданул 11-нний ДГУНХ-лул къатраву хьунни «Зунттал районну лядуккан даву» тIисса элмий – практик конференция. Муний гьуртту хьунни ДР-лул БакIчи Владимир Васильев, АьФ-лул 

Ухссавнил Ккавкказуллал иширттал министр Сергей Чеботарев, республикалул ХIукуматрал, Халкьуннал Мажлисрал, министерстварттал ва идарарттал вакилтал, мукунма федерал экспертътал.

---

Владимир Васильевлул тIи­мунийну, зунттал районну лядуккан даврил луртан хъунна­сса дур, амма захIматшивурттугу къачансса дур, хIакьину миннуя ихтилат булланну. ЦIана жула оьрчIал конкурсирдай, олимпиадарттай, спортсментурал бяст-ччаллаву ххувшавуртту ласлай бур. Миннал дакI ххари дуллай дур.

Республикалул БакI­чи­нал личIину бувсунни захI­матшивурттаятугу. Мукунсса захIматшивурттал ца хъанай дур щин диялну дакъашиву. Мунал тIимунийну, гьашину му масъала дузал баншиврул республикалул бюджетраву ккаккан дурну дур 1,9 млрд.къуруш. Миннува 1,3 млрд. къуруш харж дан тIий бур зунттал районнайсса ялапарлувтал щинал дузал буван. Амма микку бур цамургу захIматсса масъала: чунни ми ишла дур­сса щин экьи гьантIисса, цукунни ми марцI дантIисса? Муния хIакьину пикри бан аьркин­ссар.

КIилчинмур захIматсса ма­съала – ххуллурдал тагьар. Мугу дузал бан най бур яла гъансса чIумал. Бюджетраву ккаккан дурну дур миннунсса арцугу.
Хъунмасса буруккин бутлай бур зунттал районнайсса экологиялул тагьарданул. Зунттаву салкьи хьусса чапалшивур­тту гъараллу ларчIун махъ, мар­ххалтту бавссуну махъ дучIайсса дур ЧIиркIайннал бярнивун.

Дагъусттаннал БакIчинал пикрилий, зунттаву ца захI­матссаннун ккаллину бур цIу лещан даврил масъалагу. ЦIанасса ппурттуву ДГУ-рал хIадур дуллай бур му масъала дузал бан­сса проект.
Яла Владимир Васильевлул бувсунни Дагъусттаннай бартдигьлай бушиву «Шяраваллил учитель» тIисса проект. Мунал бувсунни зунттал районнай социал объектру баврил масъалалул хIакъиравугу.

Конференциялий махъ лавхъунни мукунма Сергей Чеботаревлулгу. Мунал бувсунни федерал даражалий хIадур дуллали­сса зунттал районнал лябуккулул проектрая.
Дагъусттаннал зунттал районнайсса шяраваллал тагьардания бувсунни республикалул экономикалул министрнал буржру чIумуйсса бартбигьлагьисса ХIажи Султановлул.
Ххал бигьлагьисса масъалалул хIакъираву циламур пикри бувсунни Егор Гайдардул цIанийсса экономикалул политикалул институтрал элмулул бутIул каялувчи Ирина Стародубровскаял.
Конференциялий махъру лавхъунни мукунма АьФ-лул Конституциялул судья ХIадис ХIажиевлул ва цайминнал.
БатIаврил цалчинмур бутIул хIасил дурунни «Российская академия Народного хозяйства и государственной службы при президенте РФ» ФГБО-лул Ухссавнил Ккавкказуллал филиалданул директор Азамат Тлисовлул.
ХIадур бувссар
ХI. Аьдиловлул