[dropcap]О[/dropcap]ктябрьданул 23-нний Дагъусттаннал БакIчи Владимир Васильевлул дунни ДР-лул бюджетравун ччуччия ва аьгъушиву даххаврия налог­ру дучIан даву гьарза даврил хIакъиравусса батIаву.

[dropcap]Б[/dropcap]атIаврий гьуртту хьунни ДР-лул ХIукуматрал Председатель Артем Здунов, профилсса идарарттал ва АЗС-ирттал каялувчитал ва усру дайсса, мебель дайсса ишбажаранчитал.
БатIаврий махъ лахълай, ДР-лул БакIчинал бувсунни гьашину 9 зуруй АЗС-ирттая республикалул бюджетравун дуркIун душиву 190,7 млн. къуруш, дукIу вара чIумал – 136,3 млн. къуруш.
Владимир Васильевлул тIи­мунийну, агьалинал ахIвал ххуй-хъин баншиврул аьркин­ссар зун, налогру дуллан, коррупциялийн ва экономика лядуккаврихун дахчилачисса цаймигу иширттайн къарши буклан.

БатIаврий ихтилатгу хьунни бизнесрал хъирив бацIавуртту гьарза хъанай душивриягу.
Владимир Васильевлул бувсунни бизнесрая дартIсса налогру чун наниссарив. Мунал тIимунийну, 1 млрд. ва 700 млн. къуруш личIи дурну дур щина­ххуллу буван, 500 млн. – мелиорациялун, мукунна ххуллурду бакьин буван, «шяраваллил учитель» тIисса проектран.

2018 шиная шинмай заправкарттай зузими гьарза хьуну бур сайки шамлийну. БакIрай зий ивкIхьурча 562, цIана зий ур 1672 инсан.
Муния махъсса ихтилатраву Владимир Васильевлул бувсунни власть хIадурну душиву зун «ххютула» дуккан ччисса бизнесращал.