Дубайлив – снайпер-хъаннил кьюкьа

Дубайнал полициялул даврийн кьамул буллалиссар утти хъами- снайперталгу. Ми хасъсса центрданий хIадур бувсса,

аьщуйн щуну битаврил усттаршиву ккаккан дурну махъ дипломру лавсъсса хъами бусса бур. Хъаннил- снайпертурал ца кьюкьа полициялий зун диркIссар.

Дагъусттаннаясса саллатIнан – танмихI

Волгоградрай Да­гъус­ттаннаясса кIия саллатI-контрактник, Вирттаврал аллеялийсса Абадлийсса цIарал къавтIилучIагу бавцIуну, семечки канай, ккиртту къав­тIилувун бичлай бувгьуну бур. Укун къавкъинсса тIул дур­сса вандалтуран чара бакъа танмихI бувантIий бур, цалсса контрактниктурал цIарду ашкара дуллай бакъар.

150 азарва долларданунсса Кьурандалул лу

УзбакIисттаннал низам дуруччай органнал бувгьуну бур 16 аьсрулийва итабавкьусса, 150 азарва долларданунсса Кьурандалул лу чIаххуврайсса Къиргъисттаннайн баххан ччисса инсантал. Ва Кьурандалул эмаратсса экземпляр Самаркьандрай итабавкьусса, цуппагу мусийх чивчусса бусса бур. Кув экспертътал ванил багьа 200 азарва долларди тIийгу бур.

Американал Турциянайнсса санкциярду дуркьунни

Американал президент Дональд Трамплул баян бунни Турциянайнсса санкциярду дукьан дуллалишиву ва билаятрал финансирттал министр­найн тапшур бувунни ва хIукму бартбигьин. Турциянал баян бувну бур Сириянавусса дяъви бацIан буллалишиву. Трамплул бувсунни Турциянал буллусса махъ бацIан буваншиврий дакI дарцIуну ушиву ва уттиния тинмай тайннащал маша буллан къадагъа къадикIантIишиву.

Дунияллий яла лахъимур набережная

«Каспий Дагестан» АО-лул хъунаманал дагъусттаннал премьер Артём Здуновлухь маслихIат бувну бур МахIачкъала ва Каспийск шагьрурду цачIун буллали­сса набережная буван. Му даву дуварча, дунияллий яла ла­хъимур набережная жучIава бикIантIий бур.

ХIадур бувссар
П. Рамазановал