[dropcap]О[/dropcap]ктябрьданул 9-нний Дагъусттаннал БакIчи Владимир Васильевлул дунни Республикалул Мюхчаншиврул Советрал батIаву.

Владимир Васильевлул тIи­мунийну, республикалий «Земский учитель» тIисса программалун гьашину итадаркьуну дур 50 млн. къуруш, миннул кумаграйну бюхълай бур шяраваллил кIанттурдайн зун тIайла уккан 50 учитель.

БатIаврил масъалалул хIакъи­раву республикалул каялувчинал тIимунийну, коррупционертал хIасул хъанай бур ххютуй зузими гьарзану бусса кIанттурдай, миннащал талан аьркинссар. Ларгсса 2 шинай республикалий тIайласса давуртту дуллан бивкIссар, коррупциялущал талатаву дайдирхьуну. Республикалийн зана хьуссар закон ва право.
Махъ лахълахъиманал Совбезрал гьурттучитуран дакIнийн бувтунни цачIусса коррупциялийн къаршисса давуртту даврийну антимонопол законну лиявуртту чан хьуну душиву 70 процентрал, 40 процентрал гьарза хьуну душиву чIиримур ва дянивмур бизнесраясса дучIия бюджетравун.
Налогру салкьи даврил хIа­къираву Владимир Васильевлул бусаврийну, так «МарцIсса щин» тIисса программа дузрайн ду­ккан даврийну бювхъуну бур бюджетраву ккаккан дуван 1,9 млрд. къуруш дагъусттанлувтал ххуй-хъинсса щинал щаллу баншиврул. Ми арцу республикалий дартIсса налогирттая личIи дурну дур.
Гьашину 9 зуруй ашкара дурну дур коррупциялул ххуллийсса 612 тахсирлувшиву, аьч дурну дур 499 уголов дело, судрайн тIайла дурккун дур 358 материал. Ми давуртту тихуннайгу дуллай бур.
Яла ххал бигьлагьисса масъалалул хIакъираву ихтилат бунни ДР-лул виваллил иширттал министр Аьбдурашид МахIаммадовлул. Мунал тIимунийну, МВД-лул гьашину дурну дур хъуннасса профилактикалул даву коррупциялийн къаршину. Ашкара дурну дур коррупциялул ххуллий­сса 612 тахсирлувшиву, миннувух властрал органнавугу, цаппара министерстварттай ва ведомстварттайгу. Министрнал личIину бувсунни лурттурасри ласаврил иширттая. Гьарца 11-мур ашкара дурсса лурттурасса ласаву хьуну дур ляличIи чIярусса арцу ласаврил хIакъиравусса (в особо крупном размере), гьарца 2-мур ягу 3-мур – захIматсса ягу ляличIину захIматсса. Миннувух хIала-гьурттуну бур личIи-личIисса зузалт (къуллугъирттайсса), миннавух федерал идарарттай зузимигу. Масалдаран, увгьуну ур Росреестрданул ца каялувчи, бувгьуну бур мукунма дуккаврил, цIуллушиву дуруччаврил аралуву зий бивкIсса пишакартал, налогирттал къуллугъирттал системалуву зий бивкIми ва цаймигу.
Ххал бигьлагьисса масъалалул хIакъираву махъру лавхъунни ДР-лийсса Налогирттал къуллугърал управлениялул каялувчи Газинур Апсалямовлул. Ванал бувсунни управлениялул гьашину дурсса давурттал хIакъираву.
Ихтилат бунни мукунма республикалул юстициялул министр КазимахIаммад Сефикьурбановлул.
Махъру лавхъун махъ, Владимир Васильевлул увкунни: «18 ишираву 40 коррупциялул хIакъиравусса закон лиян даву хьуну дур. Му мукун дитан ххишала къабучIиссар». Мунал тапшур бунни му ххуллий дуллалисса давурттая цаппара хIаллава гьартану бусан.