[dropcap]О[/dropcap]ктябрьданул 15-нний Расул ХIамзатовлул цIанийсса библиотекалуву хьунни цIа дурксса чичу, шаэр, тарихчи Сулайман Мусаевлул чивчусса луттирдал презентация.

Р. Къардашов
«Гъази-Гъумучи. КутIасса тарих» ва «Ажал – ттул пишари» тIисса луттирдаяту бувсунни, вай чивчусса автор, Сулайман Мусаевлул. Лакрал тарихрацIун бавхIусса, Сулайман Мусаевлул чивчусса луттирдал сериялуву, «Гъази-Гъумучи. КутIасса тарих» тIисса лу хъанай бур ванал канила бувксса, лакрал тарихрал кьадру бусса буккултран, ирглийсса бахшиш.
Луттирай Гъази-Гъумучиял тарих ккаккан бувну бур аьвзалзаманная байбивхьуну 1877 шинал хьусса Оьруснал паччахI­найн къаршину дагъусттаннал ва лакрал халкь гьаз шаврийн бияннин.

32 бутIуйх бавчIусса луттираву бур лакрал паччахIлугъ салкьи шаврия, хантурая, вайннал оьрмулия ва иширттая, Надир-шагь Баргъбуккаваллил Ккав­кказнавун ххявххун, ираннал чапхунчитуращал Дагъусттаннал ва лакрал тархъаншиврул цIаний бувсса дяъвирдаяту, лак­рал багьу-бизулия ва м.ц.
«Гъази-Гъумучи. КутIасса тарих» луттирая кутIану учин – ва бур архивирттал гьанулий, хъинну куртIну хъирив лаявур­тту дурну, лакрал тарихрая чивчусса лу.

Сулайман Мусаевлун чичул, шаэрнал, тарихчинал гьунардал ялун Занная ливккун бур таржумачиналгу пагьму-гьунар.
Мунил барашинна хъанай дур, цайми ванал дурсса таржумартту хIисаврайн къаласурчангу, Кьуран таржума буваву.
Робер Мерльлул паланг мазрай чивчусса лу – «Ажал – ттул пишари», ацIрахъул шинал хьхьичI буккайхтува таржума бансса мурад, так цIана щаллу бан бювхъунни тIий, буслай ия Сулайман Мусаев луттирал презентациялий.
Жужрал хьхьичIмукъуву таржумачи чичлай ур: «Мерль Робер, машгьурсса франкнал чичу, антифашист романдалий буслай ур гитлерлутурал концентрацион лагерьданул даврияту. Роман бачин бувну бур, Освенцим концлагерьданул начальник оьрчIнияцIакулсса дакIнийн бичавуртту кунма.

Цала пикрирду ялув бухIлахIаву дакъасса мазрай, авторнал цала луттирал герой жула дакI цай цIуцIиманаяту кIурааен уллай ур цала дурсса оьхIалшивурттая пашман акъа­сса цила хIакьсса жанаварданийн, инсантал литIай машиналийн». Луттирдал презентациялий махъру лавхъунни Сулайман Мусаевлущал ххаришиву кIидачIин бувкIсса, ванал бивхьусса захIматран бусравсса кьимат бишлашисса хъамаллурал: халкьуннал шаэр Сугъури Увайсовлул, тарихрал элмурдал доктор АхIмад Кьурбановлул, «Дараччи» фондрал хъунмур Гульшан Хасаевал, «Да­гъусттан» ВГТРК-лул хъунаманал хъиривчу Ссалам Хавчаевлул, Музыкантътурал союзрал хъунама Хан Башировлул ва м.ц.