[dropcap]О[/dropcap]ктябрьданул 7-нний ДР-лул ХIукуматрал Председательнал хъиривчу Аьбдулмуслим Аьбдулмуслимовлул каялувшиврий хьунни шяраваллил хозяйствалул
бакIлахъия лакьаврил хIакъиравусса батIаву. БатIаврий гьуртту хьунни ДР-лул шяраваллил хозяйствалул министрнал цалчинма хъиривчу Аьдилхан ХIанакаев, министерствалул зузалт ва цаймигу.
Вице-премьернал тIимунийну, ларкьуну дур пархтIутIул бакIлахъия, ппиринж, ахъулсса ва ахънилсса уттигу лакьлайнма бур. Оператив ккаккиярттайн бувну, дукIумур шинах бурувгун, гьашину хъин чулийсса дахханашивуртту хьуну дур. Масалдаран, гьашину 8 азарда гектардания (ппиринжрал хъуруннал 37%) ларсун дур 36,8 азарда тонна. Мува бущилий лакьларча, ласун тIий дур пландалий ккаккан дурсса 95 азарда тонналияр ххишаласса.
Гьашину интту хъуру дургьуну дур 217 азарда гектарданий, ягу дукIунияр 2500 гектар ххишаласса.
Октябрьданул 4-ннийнин ссуттил хъуру дургьуну дур 16 азарда гектарданий. Хъунил давуртту уттигу найнна дур. Аьбдулмуслим Аьбдулмуслимовлул тIимунийну, цIана дугьлан аьркинссар хьхьичIра къадугьлай бивкIсса хъуругу, цIанасса ппурттуву дуллалисса мелиоратив давурттугу хIисавравун ларсун. ЛяличIисса къулагъас дикIан аьркинссар шяраваллил хозяйствалул техника хIадурну душиврух хъунил давуртту дуллалийни, цила чIумал гьанна хIадур баврих, техникалунсса ччуччия, оьргъашивуртту хIадур даврих.
БатIаврий гьуртту хьуминнал ххал бивгьунни мукунма кIинтнийнсса лазуни хIадур даврил масъалагу.
БатIаврил ахирданий вице-премьернал республикалул минсельхозпродран дунни цаппара тапшурлугъру.
