[dropcap]О[/dropcap]ьрус миллатрал шаэр, ххуйну асарду аьч буву, Степан Щипачев ур: «ТIабиаьтран цила ххуйшиву къачIалан дикIайссар.

Га жула яруннахри ганин ххал шайсса», — тIий. Бакъаривла бяст бан бучIисса иш? Туну, дакI, яру бакъанма, цукунни тIабиаьтрал цила ххуйшиву хIасул дуллалисса? Ялагу жунна ккаккай­хха пархтIутIи бургъил чулиннай кIура даллай. Баргъ ттуруллал кIучI бувсса чIумалгума кIа бусса чулиннай дуруглан дикIай. ТIутIивгу кьунниялай, цала чIапIивгу лакьин бувну, шанан дикIай. Яла кIюрххил, инсан кунна, чантIа тIий, тIитIлан дикIай.

ТIабиаьтрал цила хIасул дурсса ххуйшивурттащал ганил чирчусса суратрай инсанналгу га сурат хъиннура ягин дуллалисса аьшру дихьлай ур. Мукун яруннаву, дакIниву ххуй­сса тIааьншиву хIасул дуллали­сса суратну хъанан дикIай хъу ттирхIуну махъ къаврдая дурсса лизурду. Укун­сса лизурдал суратру Аьрасатнал кканпитIру дувай заводругума ишла дуллай бур: кканпитIру дур лизурдал лагрулий дурну, цайннагу «Российские просторы» тIисса цIа дирзун.

Уттигъанну, Ваччату шавайн най, ЧIяйннаарив уккайхту, ттул янилун дагьуна Хъуннеххал тия чулийсса ца хъув муна ми лизурду. Щуну-Зунттул ссимиялу бия тайннул хъиннува ягин буллай. Ттунгу дакIнин дагьуна нава чIивиний, хъу ттихIлахIийни ниттил цищала хъув уцай­сса чIун. Га чIу­мал, кIирисса бургъил ччуччин къауван, ни­ттил цалчин ттивхIусса лачIая къаврду бувну, ттун гиву ххют дагьан дурсса лизу дайва. Нагу гиву щяитайвав. Цавай бувчIин захIматсса хъуцIурдил макьаннугу дикIайва баллай. Гьай-гьай, ххюнкIлул ппенппиритIрачIан цичIав къадияйва.
Хъуннеххал тия чулий янилун дагьсса лизурду дакъая къаврдая дурсса. (Утти зунттаву лачIа бугьлай бакъар). Тай дия ххалая дурсса лизурду. Цукун духьурчагу, валлагь-биллагь, хъинну тIааьнну янилун дагьлай дия.