АхIмад-Хан Султаннул цIанийсса ЦIуссаккуллал №2 школалийн гьашину цалчинми классирттавун увкIун ур 124 дуклаки оьрчI.
П. Рамазанова
Сентябрьданул 2-нний АхIмад-Хан Султаннул цIанийсса ЦIуссаккуллал №2 школалийсса линейкалийн ябияйхтурив, байран кьини душиву чIалай бия – луттирдал, дустурал, тIутIал байран, пиш- пиш тIутIисса симаннал байран!
Школалул директор Татьяна Айгуновал бувсунни гьашину цалчинми классирттавун увкIшиву 124 дуклаки оьрчI. Нитти-буттахъул ва дуклаки оьрчIру барча буллай, ванил кIицI лавгунни дуккавугу биялсса захIмат бишин багьлагьисса даву душиву, цIусса кIанттай цIу оьрму дузал буллалисса нитти-буттахъул ххари буллан оьрчIалгу хIарачат булланссар тIисса умуд бушиву.
Райондалул администрациялул вакил, КIулшиву дулаврил управлениялул хъунама пишакар Ирина Мажидовалгу кIицI лавгунни дуккаврил шин оьрчIангу, учительтурангу даркьусса, кIулшивуртту куртIгу, цIакьгу дуллалаврицIун, творчествfгу итххяххан дуллалисса, рувхIанийсса ххазинартту оьрчIал дакIурдиву цIакь буллалисса шин хьунтIишиврий дакI дарцIуну бушиву. «Щаращи» ансамбльданул къавтIавурттал, 2 «в» классраву дуклакисса ПатIима Аьлиевал ва Дауд Кьурбановлул балайрдал байран чIюлу дурна. Школарттай ва кьинисса дарсругу хас дуруна Буттал кIанттул цIанийсса дяъвилий ххувшаву ларсун 75 шин шаврин. ЦIуссалаккуйн боевиктал ххявххун 20 шин хъанай духьувкун, «Ххувшаврил дарсру» хас дурну дия вай иширттангу. Дуклаки оьрчIал бувсуна микку гьуртту хьусса цала гъан-маччанаягу.
Жугу умудрай буру вай цалчинми классирттавун лавгсса оьрчIал школа къуртал бувну, вайнная ххуйсса пишакартал шайхту, вайннал бюхъу-хIарачатрая ва хьхьичIуншивурттая жулва кказитралгу гъирарай чичлансса сант дикIантIишиврий.